ISAÏAH 35 - Khasi CL Bible (BSI)

Ka lynti jong ka jingkhuid

¹ Ka ri shyiap kan shadkmen, bad ki syntiew kin phuh ha ka ri khlaw.

² Ka ri shyiap kan rwai bad pyrta da ka jingkmen; kan long kaba itynnat kat ki lumbah ka Lebanon bad kaba seisoh kat ki pyntha ka Karmel bad Sharon. Baroh kin ïohi ïa ka jingitynnat U Trai, kin ïohi ïa ka jingkhraw bad ïa ka bor jong u.

³ Kin ai ka jingkhlaiñ ïa ki kti kiba la thait bad ïa ki khohsiew bakyiuh da ka jingtlot.

⁴ To ïathuh ïa baroh kiba rit mynsiem, “To long khlaiñ bad wat sheptieng! U Blei un wan ban pyllait ïa phi, un wan ban pynshitom ïa ki nongshun jong phi.”

⁵ Kiba matlah kin lah ban ïohi, bad kiba kyllut kin ïohsngew.

⁶ Kiba dkoh kin rynsied bad shad, bad kito ki bym lah ban kren kin pyrta da ka jingkmen. Ki wahduid kin tuid lyngba ka ri shyiap;

⁷ u shyiap uba khluit un kylla long ka pung, bad ïa ka ri ryngkhiang yn pyndap da ki umpohliew. Ha ka jaka ba ju shong ki myrsiang, u phlang bad u khah ha ki jaka jyrsieh kin mih.

⁸ Kan long ka lynti bah hangta, ba la khot “Ka Lynti jong ka Jingkhuid.” Yn ym don nongpop u ban ïaid ha kata ka lynti; ym don ki riewbieit ki ban ïalam bakla ïa kito kiba bud ïa ka.

⁹ Yn ym don sing hangta, ym don ki mrad bashyrkhei ki ban ïaid na kata ka lynti. Kito ïa kiba U Trai u la pyllait im kin ïaid sha ïing na kata ka lynti.

¹⁰ Kin poi sha Jerusalem da ka jingkmen, kin rwai bad kin pyrta da ka jingkmen. Kin long kiba kmen junom, kiba la lait junom na ka jingsngewsih bad ka jingpangnud.