ISAÏAH 34 - Khasi CL Bible (BSI)

U Blei un pynshitom ïa ki nongshun jong u

¹ Ale, phi ki briew jong ki hima baroh! To ïalumlang bad to shahshkor. Ai ba ka pyrthei baroh kawei bad uwei pa uwei uba shong ha ka un wan hangne bad shahshkor.

² U Trai u bitar ïa baroh ki hima bad baroh ki kynhun shipai jong ki. U la pynrem ïa ki sha ka jingjot.

³ Yn ym tep ïa ki metïap jong ki, hynrei kin pyut hangta bad kin iwtung; bad ki lumbah kin saw da ka snam.

⁴ Ka sngi, u bnai bad ki khlur kin lwet jin. Ka sahit bneng kan jah noh kum ka kitab ba la kli, bad ba ki khlur kin hap kum ki sla na u dieng sohwaiñ bad u dieng Dumbur.

⁵ U Trai u la pynkhreh ïa ka waitlam jong u ha bneng, bad mynta kan mait ïa ki Edom, kita ki briew ïa kiba u la pynrem sha ka jingjot.

⁶ Ïa ka waitlam jong u yn tap da ka snam bad ka khleiñ jong ki, kum ka snam bad ka khleiñ jong ki langbrot bad ki blang ïa kiba la kñia. U Trai un pynlong ïa kane ka jingkñia ha ka nongbah Bosrah; un pynlong ïa kane ka jingpynïap bakhraw ha ka ri ki Edom.

⁷ Ki briew kin kyllon kum ki masi kyrtong khlaw bad ki masi lyngraw, bad ka khyndew kan saw da ka snam bad yn tap da ka khleiñ.

⁸ Kane ka dei ka por ha kaba U Trai un pyllait im ïa ka Seïon bad pynhiarkput halor ki nongshun jong ka.

⁹ Ki wah ka Edom kin kylla um bsiang, bad ka khyndew kan kylla kyndok. Ka ri baroh kawei kan ing kum ka bsiang.

¹⁰ Kan ing mynsngi bad mynmiet, bad ka tdem kan kiew na ka junom. Ka khyndew kan sah lehnoh-ei na kawei ka rta sha kawei pat, bad yn ym don shuh u ban ïaid lyngba jong ka.

¹¹ Ki dkhoh bad ki tyngab kin shimti ïa ka ri. U Trai un ym pynseisoh shuh ïa ka, kumba ka la long ha shuwa ka jingpynlong ïa ka pyrthei.

¹² Yn ym don syiem u ban synshar ïa ka ri, bad ki nongïalam baroh kim don shuh.

¹³ Ki shiah bad shiah buid kin mih ha baroh ki ïingsyiem bad ki shnong ba la ker kynroh, bad ki myrsiang bad ki dkhoh kin shong ha ki.

¹⁴ Ki mradkhlaw kin ïaid kai hangta, bad ki ksuid kin ïakhot para ma ki. U mrad kynsha ba shang mynmiet un wan hangta bad un wad jaka shongthait.

¹⁵ Ki dkhoh kin thaw ïa ki skum jong ki, kin kha pylleng bad pynmih ki khun, bad sumar ïa ki hangta. Ki pukni kin ïalum hangta, kiwei hadien kiwei pat.

¹⁶ To wad ha ka kitab jong U Trai ïa ki jingthaw ba-im bad pule ïa kaei ba ka ong. Yn ym don tang kawei ruh na kine ki jingthaw ka ban jah noh, bad yn ym don tang kawei ruh ka ban ym don lok. U Trai u la hukum ba kan long kumta; ma u hi da lade un wallam lang ïa ki.

¹⁷ U dei U Trai u ban ïasam ïa ka ri hapdeng jong ki bad ai hapdeng jong ki ban ïa-ïoh bynta lang. Kin ïa-im ha ka ri na kawei ka rta sha kawei pat, bad kan long ka jong ki junom.