ISAÏAH 33 - Khasi CL Bible (BSI)

Ka jingduwai ban ïoh jingïarap

¹ Ki nongshun jong ngi ki la shahjop! Ki la lute bad shetkylla, wat la ym shym don kiba la lute ne shetkylla ïa ki. Hynrei ka por ban lute bad shetkylla kan kut, bad ma ki hi kin sa long kiba shah lute bad kiba shah shetkylla.

² A Trai, to isynei ïa ngi. Ngi la buh ïa ka jingkyrmen ha me. To ïada ïa ngi man la ka sngi bad to pynim ïa ngi ha ki por jong ka jingjynjar.

³ Haba me ïaleh na ka bynta jong ngi, ki jaitbynriew kin phet ïap na ka jingsawa ka thma.

⁴ Ïa ki jingdon jingem jong ki la knieh bad la rah noh kum ka jinglute.

⁵ Katno uba khraw u long U Trai! U synshar halor kiei kiei baroh. Un pyndap ïa ka Jerusalem da ka jinglehhok bad ka jinglong ba-beit bad pynlong ka jingskhem ha ka hima.

⁶ U ïada borabor ïa la ki briew bad u ai ïa ki ka jingstad bad ka jingtip. Ka jingkynshew spah bakhraw tam jong ki ka long ka jingtiengburom ïa U Trai.

⁷ Ki rangbah kiba shlur ki pan jingïarap. Ki nongkit 'tiensyiem kiba pyrshang ban wallam ka jingsuk ki ïam sngewsih kthang.

⁸ Ki lynti bah ki long kiba ma shibun ba ym don uba ïaid ba ïeng ha ki. Ïa ki jingïateh kular la pynkheiñ bad ïa ki jingïakut ym shym burom. Ym don shuh ka jingïaburom ïano ïano ruh.

⁹ Ka ri ka sah shrah bad long ri shyiap. Ki khlaw ka Lebanon ki la tyrkhong, ka them baseisoh ka Sharon ka long kum ka ri shyiap, bad ha Bashan bad ha u lum Karmel ki sla ki hap na ki dieng.

U Trai u maham ïa ki nongshun jong u

¹⁰ U Trai u ong ha ki jaitbynriew, “Mynta ngan leh ïa la ka kam. Ngan pyn-i katno nga long uba donbor.

¹¹ Phi pynlong ïa ki jingthmu bymlarkam bad kiei kiei baroh kiba phi leh ki long ki bym don jingmyntoi. U Mynsiem jong nga u long kum ka ding ka ban pynjot ïa phi.

¹² Phin sa lwet kum ki maw ba la thang ban pynlong mawshun, kum ki shiah ba la thang haduh ba ki la kylla dpei.

¹³ Ai ba uwei pa uwei uba hajan bad uba hajngai un ïohsngew ïa kaei kaba nga la leh bad pyndem ha ka bor jong nga.”

¹⁴ Ki briew kiba pop jong ka Seïon ki khynñiuh da ka jingsheptieng. Ki ong, “Ka jingbishar U Blei ka long kum ka ding kaba meh junom. Hato uno uno na ngi un lait im na ka ding kaba kum kata?”

¹⁵ Phi lah ban lait im lada phi ong bad phi leh ïa kaba dei. Wat pyndonkam ïa ka bor jong phi ban shukor ïa kiba duk bad wat pdiang ïa ka pisa bashukor. Wat ïasnohkti bad kito kiba thmu ban pynïap briew lane ban leh ïa kiwei ki kam sniew.

¹⁶ Te phin long shngain; phin long skhem kum ka kut bakhlaiñ. Phin don ka jingbam ban bam bad ka um ban dih.

Ka lawei kaba dap da ka burom

¹⁷ Sa shisien pat phin ïohi ïa u syiem ba u synshar ha ka burom bakhraw ha ka hima kaba pyiar ha baroh ki liang.

¹⁸ Ki jingsheptieng jong phi kiba mynshuwa ïa ki nonglum khajna nongwei bad ki nongsyntiat kin shu long sa tang ka jingkynmaw.

¹⁹ Phin ym ïohi shuh ïa ki nongwei kiba hangamei kiba kren da ka ktien kaba phim sngewthuh.

²⁰ Khmih ïa ka Seïon, ka nongbah ha kaba ngi rakhe ïa ki Jingkhawai Niam jong ngi. Peit ïa ka Jerusalem! Katno ka long ka jaka kaba shngain ban shong ban sah ha ka! Kan long kum ka ïingjaiñ ïa kaba yn ym pynkynriah shuh, kiba ïa ki snar ym shym la phut noh, bad ïa ki tyllai ym shym la pyndkut.

²¹ U Trai un pyn-i ha ngi ïa ka burom jong u. Ngin shong ngin sah harud ki wah bad ki wahduid kiba ïar, hynrei ki liengbah jong ki nongshun kin ym ïaid ha ki.

^22-23 Baroh ki tyllai teh ha kito ki liengbah kim don jingmyntoi; ki jaiñ pdiang lyer kim lah ban pyiar! Ngin knieh noh ïa baroh ka spah jong ki kynhun shipai nongshun, bad kan bun haduh katta katta ba wat ki briew kiba dkoh ruh kin ïa-ïoh bynta. U Trai hi da lade un long u syiem jong ngi; un synshar halor jong ngi bad un ïada ïa ngi.

²⁴ Yn ym don uba shong ba sah ha ka ri jong ngi, u ban dang ud pang, bad ïa ki pop baroh yn map.