ISAÏAH 32 - Khasi CL Bible (BSI)

U syiem uba don ka jinglong ba-beit

¹ Kan don ka sngi ha kaba yn don u syiem u ban synshar ha ka jinglong ba-beit, bad ki nongïalam ka ri ki ban synshar ha ka jinglehhok.

² Uwei pa uwei na ki un long kum ka jingkah na ka lyer bad ka jaka ban rieh na ki 'erïong. Kin long kum ki wahduid kiba tuid ha ka ri shyiap, kum ka jingkah syrngiew u mawsiang bah ha ka ri shrah.

³ Ki khmat bad ki shkor jong ki kin ïohi bad kin ïohsngew ïa ki jingdonkam jong ki briew.

⁴ Kin ym long shuh ki bymïaishah, hynrei kin trei ha ka jingshemphang bad kin ong ïa kaei kaba ki mut.

⁵ Yn ym don u ban pyrkhat ba uba bieit u long uba donburom lane ban ong ba u riewshukor u long uba hok.

⁶ Uba bieit u kren bieit bad u pyrkhat ban leh ïa kiei kiei kiba sniew. Kaei kaba u leh bad kaei kaba u ong ka long ka jingibeiñ ïa U Trai, bad um ju bsa ïa kiba thngan lane um ju ai ka jingdih ïa kiba sliang.

⁷ U briew uba mutlop u long uba sniew bad u leh ïa ki kam kiba sniew; u ïasylla ban pynsniew ïa kiba duk da ki jingshukor bad ban khanglad ïa ki ban ïoh ïa ki hok jong ki.

⁸ Hynrei u briew uba donburom u lehhok bad u ïeng skhem na ka bynta kaei kaba dei.

Ka jingbishar bad ka jingbha pat

⁹ Ko phi ki kynthei kiba im suk, ki bym don ki jingkhuslai, to shahshkor ïa kaei kaba nga ong.

¹⁰ Phi lah ban sngewhun mynta, hynrei kum ha kane ka por ha ka snem ka ban wan, phin long ha ka jingduh jingkyrmen namar yn ym don sohwaiñ ba phin ïohlum.

¹¹ Phi la ju im suk, phim don ki jingkhuslai; hynrei mynta, to khynñiuh da ka jingsheptieng! To loit ïa la ki jaiñ bad teh da ki jaiñjot sawdong ïa la ka syngkai.

¹² To tied ïa la ki shadem ha ka jingsngewsih namar ki lyngkha baseisoh bad ki bri sohwaiñ ki la shah pynjot,

¹³ bad ki bniap shiah bad ki shynraiñ ki mih ha ka ri ki briew jong nga. To ïam na ka bynta ki ïing baroh ha kaba ki briew ki la ju long kiba kmen bad ka nongbah kaba la ju dap da ka jingim.

¹⁴ Wat ïa ka ïingsyiem yn iehnoh bad ka nongbah kan long kynjah jar. Ki ïing bad ki jaka ba la tei kut kiba ïada ïa ki kin don hapdeng ka jingjot junom. Ki kada khlaw kin ïashang hangta, bad ki langbrot kin shem ki jaka phlang hangta.

¹⁵ Hynrei sa shisien pat U Blei un phah ha ngi ïa U Mynsiem jong u. Ka jaka shrah kan sa kylla seisoh, bad ki lyngkha kin sa pynmih ki jingbam kyrhai.

¹⁶ Ha kylleng ka ri, ïa ka hok bad ka jingbishar hok, yn pyndep.

¹⁷ Namar ba uwei pa uwei un leh ïa kaei kaba dei, kan don ka jingsuk bad ka jingshongshngain junom.

¹⁸ Ki briew jong U Blei kin lait na ki jingkhuslai, bad ki ïing jong ki kin suk bad kin shngain.

¹⁹ (Hynrei u phria un hap ha ki khlaw, bad ïa ka nongbah yn pynjot.)

²⁰ Katno kan long kaba kmen haba uwei pa uwei un ïoh kyrhai ka um na ka bynta ki jingthung bad ki jaka pynbamphlang bashngain ha kylleng na ka bynta ki kada bad ki masi.