ISAÏAH 31 - Khasi CL Bible (BSI)

U Blei un ïada ïa ka Jerusalem

¹ Kito kiba leit sha Ijipt ban ïoh jingïarap kin jot! Ki shaniah ha ka bor shipai bakhraw jong ka Ijipt — ki kulai, ki kali ïapom, bad ki shipai. Hynrei kim tip ban shaniah ha U Trai, U Blei Bakhuid ki Israel, lane pan na u ïa ka jingïarap.

² U tip ïa kaei kaba u leh! U phah ka jingjot. U phah ïa ki jingbyrngem ban pynshitom ïa ki briew kiba sniew bad kito kiba ïada ïa ki.

³ Ki nong Ijipt kim dei ki blei — ki long tang ki briew. Ki kulai jong ki kim dei kita kiba don ka bor bapalat liam. Haba U Trai u trei, ka hima bakhlaiñbor kan khyllem, bad ka hima batlot bor kaba ka ïarap kan kyllon. Baroh ar na ki kin shah pynjot.

⁴ U Trai u la ong ha nga, “Kam pher kumno ki nongaplangbrot ki kynhied bad ki pyrta, kim lah ban pyntieng ïa u sing ba un phet na ka jingri ba u la pynïap; ha kajuh ka rukom, ym don kano kano kaba lah ban khang ïa nga, U Trai Badonbor Baroh na kaba ïada ïa u Lum Seïon.

⁵ Kumba ka sim ka her tawiar halor ka skum jong ka ban ïada ïa ki khun rit jong ka, kumta ruh ma nga, U Trai Badonbor Baroh, ngan ïada ïa ka Jerusalem bad kyrshan ïa ka.”

⁶ U Trai u la ong, “Phi ki paid Israel, phi la leh pop pyrshah ïa nga bad ïeng ïaleh ïa nga. Hynrei mynta, to phai pat sha nga!

⁷ Ka por kan wan haba baroh na phi phin bret noh ïa ki bleithaw bapop kiba phi la thaw na ka rupa bad ka ksiar.

⁸ Ïa ka Assyria yn pynjot ha ka thma, hynrei ym da ka bor briew. Ki nong Assyria kin phet ïap na ka thma, bad ïa ki samla shynrang jong ki yn pynlong mraw.

⁹ U patsha jong ki un phet ha ka jingsngew shyrkhei, bad ki rangbah shipai kin sheptieng haduh katta katta haduh ba kin iehnoh ïa ki lama thma jong ki.” U Trai u la kren — U Trai ïa uba la mane ha Jerusalem bad uba ka ding jong u ka thang hangta ïa ki jingkñia.