ISAÏAH 30 - Khasi CL Bible (BSI)

Ka jingïateh kular bymmyntoi bad ka Ijipt

¹ U Trai u la kren: “Kito kiba synshar ïa ka Judah kin jot noh namar ki ïaleh pyrshah ïa nga. Ki bud ïa ki jingthmu kiba ngam shym la shna, bad ki soi ïa ki jingïateh kular pyrshah ïa ka mon jong nga, da kaba kynton kawei ka pop halor kawei pat.

² Ki ïaleit sha Ijipt na ka bynta ka jingïarap khlem pan ïa ka jingai jingmut jong nga. Ki kwah ba ka Ijipt kan ïada ïa ki, ba kumta ki buh ïa ka jingshaniah ha u syiem ka Ijipt.

³ Hynrei u syiem un long khlem bor ban ïarap ïa ki, bad ka jingïada ka Ijipt kan kut ha ka jingjot.

⁴ Wat la ki nongkit 'tiensyiem jong ki, ki la lah poi lypa ha ki nongbah ka Ijipt, ka Soan bad ka Hanes,

⁵ ki briew jong ka Judah kin babe ba ki la shaniah ha kata ka hima ka bym lah ban shaniah, ka hima ka bym lah ban leh ei ei ïa ki haba ki khmih lynti ban ïoh jingïarap.”

⁶ Kane ka dei ka khubor jong U Blei shaphang ki mrad jong ka ri shyiap bashathie: “Ki nongkit 'tiensyiem ki ïaid lyngba ka ri bashyrkhei, ha kaba ki sing ki don bad ha kaba ki bseiñ kiba don bih bad ki Ïakjakor kiba her. Ki pynkit halor ki kada bad ki ut jong ki da ki jingai sngewbha baremdor na ka bynta ka hima ka bym lah ban ai ïa ki kano kano ka jingïarap.

⁷ Ka jingïarap kaba ka Ijipt ka ai ka long ka bymmyntoi. Kumta nga la khot-sin ïa ka Ijipt, ‘U Ïakjakor bym lah pynmynsaw.’”

Ki briew bymkohnguh

⁸ U Blei u la ong ïa nga ban thoh ha ka kot ba ki briew kiba kumno ki long, khnang ba kan don ka jingthoh jingkynmaw baneh shi rta, haduh katno ki la long kiba sniew.

⁹ Ki long borabor kiba ïaleh pyrshah ïa U Blei, kiba ïai shukor, kiba ïai kyntait ban shahshkor ïa ki jinghikai U Trai.

¹⁰ Ki ong ïa ki nongïathuhlypa ban sngap jar. Ki ong, “Wat kren ha ngi shaphang kaei kaba dei. Ïathuh ha ngi ïa kaei kaba ngi kwah ban ïohsngew. Ai ba ki jingïohi rngai jong ngi kin sah bad ngi.

¹¹ Wat ïeng ha ka lynti jong ngi bad wat kah ïa ka lynti ïaid jong ngi. Ngim kwah ban ïohsngew shaphang U Blei Bakhuid jong phi ki Israel.”

¹² Hynrei kane ka dei kaei kaba U Blei Bakhuid ki Israel u ong: “Phi kyntait ïa kaei kaba nga ong ïa phi bad phi shaniah ha ka jingleh jubor bad ka jingshukor.

¹³ Phi long kiba la shah pynrem. Phi long kum ka kynroh kaba jrong kaba don jingorpait naduh jrong haduh tbian; kynsan kynsan phin sa kyllon.

¹⁴ Phin sa pra kum u khra, uba la phret jin haduh ba ym don shuh ka lyngkhot, da kaba yn lah ban khat ïa ki rnga bakhluit, lane tong um na ka pung-um.”

¹⁵ U Trai Nongsynshar, U Blei Bakhuid ki Israel, u ong ha ki briew, “Phai noh bad to shaniah jar jar ha nga. Te phin long khlaiñ bad skhem.” Hynrei phi kyntait ban leh ïa kata!

¹⁶ Pynban, phi thmu ban lait im na ki nongshun jong phi da kaba shong ha ki kulai bastet. Phi pyrkhat ïa kaba dei — ka jinglait im ka long kaei kaba phi donkam! Phi pyrkhat ba ki kulai jong phi ki long kiba stet bha, hynrei kito kiba beh nadien jong phi ki kham stet!

¹⁷ Shihajar ngut na phi kin ïaphet krad haba phi ïohi ïa uwei u shipai nongshun, bad san ngut ki shipai ki la biang ban pynlong ïa phi baroh ban phet krad. Yn ym don shuh ka kynhun shipai jong phi ka ban dang sah, lait noh sa tang u dieng lama ba sah marwei ha kliar jong u lum!

¹⁸ Pynban U Trai u ap ban leh-isynei ïa phi. U kloi ban sngewlem ïa phi namar u long borabor uba leh ïa kaba dei. Suk kito kiba buh ïa ka jingshaniah jong ki ha U Trai.

U Blei u kyrkhu ïa ki briew jong u

¹⁹ Ko phi ki briew kiba shong basah ha Jerusalem phin ym ïam shuh lano lano ruh. U Trai u long uba sngewsynei, bad haba phi kyang sha u ban ïoh jingïarap, un jubab ïa phi.

²⁰ U Trai un pynlong ïa phi ban ïaid lyngba ki por ba-eh, hynrei ma u hi un don hangta ban hikai ïa phi, bad phin ym donkam ban wad shuh ïa u.

²¹ Lada phi sakma noh na ka lynti sha kamon ne sha kadiang, phin ïohsngew ïa ka sur jong u hadien jong phi kaba ong, “Kane ka dei ka lynti. Bud ïa ka.”

²² Phin shim ïa ki bleithaw jong phi ba la sop da ka rupa bad ïa ki blei jong phi ba la tap da ka ksiar, bad phin bret noh ïa ki kum ïa ka jakhlia, bad phin pyrta, “Wat don shuh ha khmat jong nga!”

²³ Man ba phi bet ïa ki symbai jong phi, U Trai un phah slap ban pynlong ïa ki ban san bad ai ïa phi ka jingot kaba bun, bad ki jingri jong phi kin don shibun ki jaka bam phlang.

²⁴ Ki masi kyrtong bad ki kada kiba lur ïa ki lyngkha jong phi kin ïoh bam ïa u phlang bakynsai tam.

²⁵ Ha ka sngi ba ïa ki jaka ba la kerkut jong ki nongshun jong phi la kurup bad ba ïa ki briew jong ki la pynïap, ki wahduid kin tuid na baroh ki lumbah bad ki lumrit.

²⁶ U bnai un sa shai phyrnai kat ka sngi, bad ka sngi kan shai phyrnai hynñiew shah ban ïa kaba ju long, kum ka jingshai jong ki hynñiew sngi ha kawei ka sngi. Kane baroh kan jia haba U Trai un sop spaiñ bad pynkhiah ïa ki jingmong kiba u la ai ha ki briew jong u.

U Blei un pynshitom ïa ki Assyria

²⁷ Ïa ka bor bad ka burom U Trai yn ïohi naduh na sha jngai. Ka ding bad ka tdem ki pyn-i ïa ka jingbitar jong u. U kren, bad ki ktien jong u ki meh kum ka ding.

²⁸ U phah ïa ka lyer ha shuwa jong u kum ka jingshlei kaba kit lut ïa kiei kiei baroh. Ka sar ïa ki hima sha ka jingjot bad u pynkut ïa ki jingthmu basniew jong ki.

²⁹ Hynrei ma phi, ki briew jong U Blei, phin long kiba kmen bad phin rwai kumba phi leh ha ka miet jong ka Jingkhawai Niam bakyntang. Phin long kiba kmen kum kito kiba ïaid ryngkat bad ki sur jong ki tangmuri sha ka Templ U Trai, u nongkyrshan jong ki Israel.

³⁰ U Trai un shah ïa baroh ban ïohsngew ïa ka sur bamaïan jong u bad ïa ka bor jong ka jingbitar jong u. Kin don ki thylliej ding, ki jingjur eh u slap, ki phria bad u slap khlem sangeh.

³¹ Ki Assyria kin khynñiuh haba kin ïohsngew ïa ka sur U Trai bad sngew ïa ka bor jong ka jingpynshitom jong u.

³² Kumba U Trai u shoh bad u ïai shoh ïa ki, ki briew jong u pat kin ïa-ïaid ryngkat bad ki sur jong ki ksing bad ki duitara. U Blei hi da lade un ïaleh pyrshah ïa ki Assyria.

³³ Naduh mynshuwa eh ïa ka jaka la pynkhreh ha kaba ka ding bajur kan thang ïa u patsha ka Assyria. Ka long kaba jylliew bad kaba ïar, bad ba la kynton jrong da ki diengthang. U Trai un pyrsad da ka phylliah ding ban thang ïa ka.