ISAÏAH 3 - Khasi CL Bible (BSI)

Ka jingkulmar jingmut ha Jerusalem

¹ Mynta u Trai, U Trai Badonbor baroh un sa shim noh na Jerusalem bad Judah ïa kaei kaei baroh bad ïa uwei pa uwei ba ki briew ki shaniah. Un shim noh ïa ka jingbam bad ka um jong ki,

² ïa ki riewshlur bad ki shipai jong ki, ïa ki nongbishar bad ki nongïathuhlypa jong ki, ïa ki nongbatai kupar bad ki nongsaiñ hima jong ki,

³ ïa ki nongïalam shipai bad ki nongïalam paidbah jong ki, ïa ki nongmihkhmat paidbah jong ki bad ïa baroh kiba pyndonkam ïa ka myntor ban bat ïa kino kino ki jingjia.

⁴ U Trai un shah ïa ki briew ban shah synshar ha ki khynnah shynrang ki bym pat ïaw.

⁵ Uwei pa uwei un shim kabu ïa uwei pat. Ki samla kin ym burom ïa ki rangbah, bad ki riewpoh kin ym burom ïa kiba halor jong ki.

⁶ Ka por kan poi ha kaba ki dkhot jong ka kur kin jied uwei napdeng jong ki bad ong ha u, “Ma phi la kumno kumno phi don ei ei ban phong, kumta to long u nongïalam jong ngi ha kane ka por ka jingjynjar.”

⁷ Hynrei un jubab, “Ym ma nga! Ngam lah ban ïarap ïa phi. Ngam don jingbam ei ei lane ki jaiñ ruh kumjuh. Wat pynlong ïa nga u nongïalam jong phi!”

⁸ Ho-oid, ka Jerusalem ka long ba la tim! Ka Judah ka dang khyllem! Kano kano kaba ki kren lane ki leh ka long pyrshah ïa U Trai; ki ibeiñ khlem buhrieh ïa U Blei hi.

⁹ Ïa ki jingnoh shiliang jong ki yn bat pyrshah ïa ki. Ki leh pop khlem rieh kumba ki briew ka Sodom ki la leh. Ki long kiba la tim, bad ki la wallam ïa ka halor jong ki hi.

¹⁰ Ki briew kiba hok kin kmen, bad kiei kiei baroh kin bit kin biang ïa ki. Kin ïoh ban lehkmen ïa kaei kaba ki la trei.

¹¹ Hynrei ki briew kiba sniew ki long kiba la tim; kaei kaba ki la leh ïa kiwei mynta yn leh ïa ka ha ki.

¹² Ki nongai pisa kylliang ki banbeiñ ïa ki briew jong nga, bad ki nongai ram jong ki, ki thok ïa ki. Ko paidlang jong nga, ki nongïalam jong phi ki ïalam bakla ïa phi, khnang ba phin ym tip kano ka lynti ban phai pat.

U Trai u bishar ïa ki briew jong u

¹³ U Trai u la kloi ban kren ïa ka kam jong u, u long uba la kloi ban bishar ïa ki briew jong u.

¹⁴ U Trai u wallam sha ka jingbishar ïa ki tymmen ki san bad ïa ki nongïalam. U pynlong ïa kane ka jingkynnoh: “Phi la lute ïa ki bri sohwaiñ bad ki ïing jong phi ki dap da kiei kiei kiba phi la shim na kiba duk.

¹⁵ Phim don hok ban khñiot ïa ki briew jong nga bad ban shim kabu ïa kiba duk. Ma nga U Nongsynshar U Trai Badonbor baroh nga la kren.”

Ka jingmaham ïa ki kynthei ka Jerusalem

¹⁶ U Trai u ong, “Ha khmih haduh katno ki kynthei ka Jerusalem ki long kiba sarong! Ki ïaid da kaba pynhieng ïa la ki khmut. Ki ju long borabor kiba kynshleiñ. Ki shim ki sien jam kiba rit itynnat bad ki jingdeng ha ki matsohlah ki sawa.

¹⁷ Hynrei ngan pynshitom ïa ki — Ngan khi ïa ki khlieh jong ki bad ngan ieh lyndum ïa ki.”

¹⁸ Ka sngi ka wan haba U Trai un shim noh na ki kynthei ka Jerusalem ïa kiei kiei baroh kiba ki sngewsarong — ki jingdeng itynnat ba ki deng ha ki matsohlah jong ki, halor ki khlieh jong ki, bad ha ki ryndang jong ki,

¹⁹ bad ha ki ryndang-kti jong ki. Un shim noh ïa ka jaiñtapkhmat jong ki

²⁰ bad ïa ki tupia jong ki; ïa ki jingdeng myntor kiba ki deng ha ki kti jong ki bad ha ki syngkai jong ki;

²¹ ïa ki sati ba ki deng ha ki shynriah'ti jong ki bad ha ki khmut jong ki;

²² ïa ki jaiñ babha jong ki, ki jaiñ jynsur, ki jaiñkup bad ki pla kynsit;

²³ ïa ki jaiñ bastang jong ki, ki rumal linen jong ki, bad ïa ki jaiñ teh ryndang bad ki jaiñtapkhmat kiba jrong kiba ki tap ha ki khlieh jong ki.

²⁴ Ha ka jaka ba kin sleh jingiwbih kin sma iwkhong; ha ka jaka ki panpoh ba-itynnat kin teh da ki tyllai barew; ha ka jaka ban don u shñiuh ba-itynnat kin long kiba lyndum; ha ka jaka ki jaiñ ba-itynnat kin phong ki jaiñjot; ka jingbhabriew jong ki kan kylla sha ka jinglehrain.

²⁵ Ïa ki rangbah jong ka nongbah, ho-oid wat ki rangbah bakhlaiñ tam, yn pynïap ha ka thma.

²⁶ Ki khyrdop ka nongbah kin ïambriew bad kin kyang, bad ka nongbah hi kan long kum ka kynthei kaba shong ha madan kaba la shah sloit lyngkhuit.