ISAÏAH 29 - Khasi CL Bible (BSI)

Ka kupar ka Jerusalem

¹ Ka duwan U Blei, kaba long ka Jerusalem hi, kam lah khie khlieh shuh! Ka nongbah ha kaba u Dabid u la sher dara kam lah khie khlieh shuh! Ai ba sa kawei ne ar ki snem kin wan bad leit, ryngkat bad ki jingkhawai bad ki Jingkhawai Niam,

² bad nangta U Blei un wallam ka jingjot ïa ka nongbah ïa kaba la khot “ka duwan U Blei.” Kan don ka jingïam bad ka jingïambriew, bad ka nongbah baroh kawei kan long kum ka duwan ba la tap da ka snam.

³ U Blei un tur ïaleh ïa ka nongbah, un don sawdong jong ka bad un kerkut ïa ka.

⁴ Ka Jerusalem kan long kum u ksuid uba ksaid ban kren napoh khyndew, ka sur ba la set kaba mih na ka khyndew.

⁵ Ko Jerusalem, baroh ki nongwei kiba tur ïaleh ïa pha kin shah beh noh kum ïa u pui pui, bad ki kynhun shipai bashyrkhei jong ki kin her kum u phlangïap.

⁶ Kynsan kynsan bad khlem poi pyrkhat U Trai Badonbor Baroh un pyllait im ïa pha da ki 'erïong bajur bad ki jingkhih jumai. Un phah ïa ki 'erlangthari bad ka ding baklang;

⁷ te baroh ki kynhun shipai jong ki hima kiba tur ïaleh ïa ka nongbah jong ka duwan U Blei, baroh ki tiar ïaleh jong ki bad ki tiar ki tar — baroh kiei kiei — kin jah noh kum ka jingphohsniew, kum kaei kaei ba la shu mutdur mynmiet.

⁸ Baroh ki hima kiba ïalumlang ban tur ïaleh ïa ka Jerusalem kin long kum u briew uba ïap-tyrsaw uba phohsniew ba u bam jingbam bad u kyndit na ka jingïohthiah hapdeng ka jingthngan, lane kum u briew u ban sa ïap na ka jingsliang uba phohsniew ba u dih um bad u kyndit na ka jingïohthiah ryngkat bad u pdot ba-tyrkhong.

Ki jingmaham ba la kyntait

⁹ To long uba mutlop! To long uba matlah! To long uba buaid khlem kano kano ka waiñ! To ïaid sheng sheng khlem dih wat tang shi jaw!

¹⁰ U Trai u la pynshoh samthiah ïa phi, bad phi sdang ban ngat ha ka jingïohthiah kaba jur. Ki nongïathuhlypa ki dei ban long ki khmat jong ki briew, hynrei U Blei u la pynmatlah ïa ki.

¹¹ Ïa ka jingmut jong kawei pa kawei ka jingïohipaw u nongïathuhlypa yn buhrieh noh na phi; kan long kum ka kot kli ba la khang pynskhem da ka muhor. Lada phi leit rah ïa ka sha uno uno uba tip ban pule bad ong ïa u ban pule ïa ka ha phi, un ong ba um lah ban pule namar ba la khang pynskhem da ka muhor ïa ka.

¹² Lada phi ai ïa ka ha uno uno u bym lah ban pule bad ong ïa u ban pule ïa ka ha phi, un jubab ba um tip kumno ban pule.

¹³ U Trai u la ong, “Kine ki briew ki ong ba ki mane ïa nga, hynrei ki ktien jong ki kim don jingmut ei ei, bad ki dohnud jong ki, ki long shawei pat. Ka niam jong ki kam long ei ei, hynrei ka long tang ki aiñ bad ki rukom briew, kiba ki shu spel lyndet.

¹⁴ Kumta ngan sa pynkyndit ïa ki da kawei hadien kawei pat ka jingtied kaba kim poi pyrkhat. Kito kiba stad kin kylla long ki bieit, bad baroh ka jingsian jong ki kan long lehnoh-ei.”

Ka jingkyrmen na ka bynta ka lawei

¹⁵ Kito kiba pyrshang ban buhrieh ïa ki jingthmu jong ki na U Trai, kin jot noh! Ki pynïaid ïa ki rukom treikam jong ki ha kaba rieh bad ki pyrkhat ba yn ym don ba ïohi ïa ki lane tip ïa kaei kaba ki leh.

¹⁶ Ki pynkylla khongpong ïa kiei kiei baroh. Kano kaba kham donkam, u nongthaw khiew ne ka dewbyrtha? Hato lah mo ba kaei kaei kaba u briew u la thaw kan ong ha u, “Phim shym la thaw ïa nga?” Lane hato ka lah ban ong ha u, “Phim tip ïa kaei kaba phi leh?”

¹⁷ Kumba ka don ka jingong, kan ym slem ba ka khlaw barben kan sa long ka jaka rep, bad ka jaka rep kan sa long pat ka khlaw.

¹⁸ Ynda kata ka sngi kan wan, kiba kyllut kin sa lah ban ïohsngew ba la pule jam ïa ka kot, bad ba kiba matlah, kiba ju im ha ka jingdum, kin plie ïa la ki khmat bad ïohi.

¹⁹ Ki briew kiba duk bad kiba rit kyrdan kin shem pat ïa ka jingsuk kaba U Trai, U Blei Bakhuid jong ki Israel, un ai.

²⁰ Kan sa long kaba kut ïa kito kiba banbeiñ ïa kiwei bad kiba pyn-i jingñiewbeiñ ïa U Blei. Ïa uwei pa uwei u nongpop yn pynjot.

²¹ U Blei un pynjot ïa kito kiba kren sniew ïa kiwei, kito kiba khanglad ïa ka jingpynshitom ïa ki riewrunar, bad kito kiba kren lamler ban khang ïa ki briew kiba hok ban ïoh ïa ka jingbishar hok.

²² Kumta mynta U Trai, U Blei ki Israel, uba la pyllait ïa u Abraham na ka jingjynjar, u ong, “Ko ki briew jong nga, phin ym shah pynlehrain shuh, bad ki khmat jong phi kin ym i-blad shuh da ka jinglehrain.

²³ Haba phin ïohi ïa ki khun kiba ngan ai ha phi, te phin sa pdiang ba nga long U Blei Bakhuid ki Israel. Phin sa burom ïa nga bad phin ïeng ha ka jingtiengburom ïa nga.

²⁴ Ki briew kiba bieit kin nang ban sngewthuh, bad kito kiba khñium borabor kin kmen ban ïoh jinghikai.”