ISAÏAH 28 - Khasi CL Bible (BSI)

Ka jingmaham ïa ka Hima Bashatei

¹ Ka hima Israel ka la kut! Ka burom jong ka, ka la jah kum ki pansngiat syntiew ha ki khlieh jong ki nongïalam buaid. Ïa ki khlieh basarong jong ki la pyniwbih bha, hynrei hangta ki ïathiah, ki buaid bhor.

² U Trai u don ïa uta uba khlaiñ bad badonbor uba la kloi ban tur ïaleh ïa ki, uta u ban wan kum u phria bajur, kum u 'lapbah, kum ka jingshlei um bakhlaiñbor, bad kan tap lup ïa ka ri.

³ Ïa ka jingsarong jong kito ki nongïalam buaid yn ïuhroit hapoh ki kjat.

⁴ Ka burom jong kito ki nongïalam basarong ka nang jah noh kum ki soh Dumbur ba mih nyngkong jong ka aïom, ba la shim bad bam ïa ki tang shu ih.

⁵ Ka sngi kan wan haba U Trai Badonbor Baroh un long kum ka pansngiat badonburom jong ki syntiew na ka bynta ki briew jong u kiba dang sah.

⁶ Un ai ïa ka jingshemphang jong ka jingbishar hok ïa kito kiba trei kum ki nongbishar, bad ka jingshlur ïa kito kiba ïada ïa ki khyrdop ka nongbah na ka jingshah hiarthma.

U Isaïah bad ki nongïathuhlypa babuaid ka Judah

⁷ Wat ki nongïathuhlypa bad ki lyngdoh ki buaid bha bad ki ïaid sheng sheng. Ki la dih waiñ bad dih kyiad haduh katta katta haduh ba ki jynthut kulmar. Ki nongïathuhlypa ki ïabuaid haduh katta katta ba kim sngewthuh shuh ïa ki jingïohipaw ba U Blei u phah, bad ki lyngdoh ki buaid haduh ba kim lah shuh ban ai jingrai ïa ki kam ba la wanrah ha ki.

⁸ Ïa ki miej ha kiba ki shong la tap da ka prie bad ym don shuh ka bynta kaba khuid.

⁹ Ki mudui shaphang jong nga. Ki ong, “U mut aïu utai u briew ba u wan hikai? Uei uba donkam ïa ka khubor jong u? Ka long kaba bha tang na ka bynta ki khunlung ba dang shu iehnoh buiñ!

¹⁰ U pyrshang ban hikai ha ngi ïa kawei pa kawei ka kyntien, kawei pa kawei ka laiñ, kawei pa kawei ka jinghikai.”

¹¹ Lada phim shahshkor ïa nga, te U Blei un pyndonkam da ki nongwei kiba kren da kawei pat ka sur ktien ba sngew khyllah ban hikai ïa phi.

¹² U la ai ka jingshongthait bad ka jingjahthait ïa phi baroh, hynrei phi kyntait ban shahshkor ïa u.

¹³ Dei na kata ka daw ba U Trai un sa hikai ïa phi kawei pa kawei ka kyntien, kawei pa kawei ka laiñ, kawei pa kawei ka jinghikai. Te phin jynthut ha kawei pa kawei ka jingjam ba phi shim. Phin sa mynsaw, shah riam bad phin long koidi.

U mawdong jong ka Seïon

¹⁴ Mynta, phi ki briew ba leh meng kiba synshar hangne ha Jerusalem halor kane ka jaitbynriew, shahshkor ïa kaei kaba U Trai u ong.

¹⁵ Phi sarong ba phi la pynlong ïa ka jingïateh bad ka jingïap bad poi sha ka jingïakut bad ka pyrthei kiba ïap. Phi sngewthikna ba phin lait na ka jingjot haba kan wan, namar phi shaniah ha ki jinglamler bad ki jingshukor ban pyllait ïa phi.

¹⁶ Kane, mynta, ka dei kaei kaba U Trai Nongsynshar u ong: “Ngan buh ha Seïon ka nongrim kaba skhem bad bakhlaiñ. Ha ka ngan buh ïa u mawdong baskhem ha uba yn thoh ïa ki ktien, ‘Ka jingngeit kaba skhem ka long ruh kaba ïaishah.’

¹⁷ Ka jingbishar hok kan long u 'sai-thew na ka bynta ka nongrim, bad ka jinglehhok kan long u 'sai-sawar jong ka.” U phria un sar noh ïa baroh ki jingshukor ha kiba phi shaniah, bad ki jingshlei kin pynjot ïa ki jingsngewshngain jong phi.

¹⁸ Ka jingïateh kular kaba phi la pynlong bad ka jingïap yn pynduh, bad ïa ka jingïakut jong phi bad ka pyrthei kiba ïap yn pyndam noh. Haba ka jingjot ka sar, phin shahjop noh.

¹⁹ Kan shoh bad kan ïai shoh ïa phi, na kawei ka step sha kawei pat. Phin hap ban shah ïa ka bad sngi bad miet. Kawei pa kawei ka khubor thymmai na U Blei kan wanrah ïa ka jingshyrkhei bathymmai!

²⁰ Phin long kum u briew ba la thoh ha ka proberb, uba pyrshang ban thiah ha ka jingthiah kaba lyngkot palat bym lah ban jyrtieng, bad ka nep kaba rit palat ka bym lah ban tap ïa u.

²¹ U Trai un ïaleh kumba u la leh ha u lum Perasim bad ha ka them Gibeon, khnang ba un leh ïa kaei kaba u thmu ban leh — wat la ki jingleh jong u kin long kum kiba ikhyllah. Un pyndep ïa ka kam jong u baroh, ka kam bamaïan jong u.

²² Wat rkhiebeiñ ïa ka jingmaham ba nga ai ïa phi! Lada phi leh kumta, kan long kaba kham eh ïa phi ban lait im. Nga la ïohsngew ïa ka jingrai jong U Trai Badonbor Baroh ban pynjot ïa ka ri baroh kawei.

Ka jingstad U Blei

²³ To shahshkor ïa kaei kaba nga ong; pynleit jingmut ïa kaei kaba nga ong ha phi.

²⁴ Ym don u nongrep uba lur sah ïa ki lyngkha jong u bad uba pynkhreh ïa ki na ka bynta ka jingbet.

²⁵ Shisien ba u la pynkhreh ïa ka khyndew, u bet ïa ki symbai jong ki jingthung kum ïa u dil bad u kumin. U bet ha ki laiñ ïa u kew bad u barli, bad sawdong ha ki rud jong ka, u bet da kiwei pat ki symbai.

²⁶ U tip kumno ban trei ïa ka kam jong u namar U Blei u hikai ïa u.

²⁷ Um ju pyndonkam da u diengtied uba khia ban shoh ïa ki symbai dil ne kumin; hynrei u pyndonkam da ki dieng kiba sting kiba biang ka jingheh.

²⁸ Um pynsniew noh ïa u kew da kaba peh palat ïa u, bad u tip kumno ban ïuh ïa u da kaba pynïaid ïa ka kali dieng halor jong u khlem pynkhlur noh ïa ki symbai.

²⁹ Kane baroh ka jingstad ka wan na U Trai Badonbor Baroh. Ki jingthmu U Blei ki long kiba stad bad ki long borabor kiba wallam jingjop!