ISAÏAH 26 - Khasi CL Bible (BSI)

U Blei un ai ka jingjop ïa ki briew jong u

¹ Ka sngi kan wan haba ki briew kin rwai ïa kane ka jingrwai ha ri Judah: Ka nongbah jong ngi ka long kaba skhem! U Blei da lade hi u ïada ïa ki kynroh jong ka!

² To plie ïa ki khyrdop ka nongbah bad to ai ba ka jaitbynriew baïaineh kan rung, ka jaitbynriew kaba ki briew jong ka, ki leh ïa kaba dei.

³ Ma me, A Trai, me ai ka jingsuk bajanai ïa kito kiba batskhem ïa ka jingthmu jong ki bad kiba buh ïa la ka jingshaniah ha me.

⁴ To ngin shaniah ha U Trai junom; un ïada ïa ngi borabor.

⁵ U la pynhiar ïa kito kiba sarong; u la pynjot ïa ka nongbah baskhem ha kaba ki shong, bad u pynlong ba ki kynroh jong ka kin pra bad hap sha tbian.

⁶ Kito kiba la shah banbeiñ, ki ïaid halor jong ka mynta bad ki ïuh ïa ka hapoh ki kjat jong ki.

⁷ A Trai, me pynlong ka lynti kaba beit na ka bynta ki briew kiba bha; ka surok kaba ki ïaid ka long kaba madan.

⁸ Ngi bud ïa ka mon jong me bad ngi buh ka jingkyrmen jong ngi ha me; me long tang ma me uba ngi kwah.

⁹ Mynmiet nga thrang ïa me da ka dohnud jong nga baroh; haba me bishar ïa ka pyrthei bad ki briew jong ka, baroh kin tip kaei ka long ka jingbishar hok.

¹⁰ Wat la me lehsbun ïa ki riewbymman, pynban kim ju hikai ban leh ïa kaei kaba dei. Wat hangne ha ka ri jong ki briew kiba hok ki dang leh ïa ka bymdei; ki kyntait ban ithuh ïa ka jingkhraw jong me.

¹¹ Ki nongshun jong me kim tip satia ba men pynshitom ïa ki. A Trai, buh ïa ki ha ka jingjahburom bad ai ba kin jynjar; ai ba kin jynjar da ka jingpynshitom kaba me la pynkhreh. To pyn-i ïa ki haduh katno me ieit ïa la ki briew.

¹² Men ai ïa ngi ka jingroi jingpar, A Trai; baroh kata kaba ngi pyndep ha ka jingjop ka long ka jingmih na kaei kaba me leh.

¹³ A Trai, U Blei jong ngi, ïa ngi la synshar da kiwei pat, hynrei tang ma me, me long U Trai jong ngi.

¹⁴ Mynta ki la ïap noh bad kin ym im shuh; ki sna-ïap jong ki kin ym mih, namar me la pynshitom bad pynjot ïa ki. Ym don uwei ruh u ban kynmaw shuh ïa ki.

¹⁵ A Trai, me la pynlong ïa ka hima jong ngi ban roi, da kaba pynïar ïa ka ri ha baroh sawdong, bad kane ka la wallam ïa me ka burom.

¹⁶ Me pynshitom ïa la ki briew, A Trai bad ha ka jinglyng-a ki duwai ha me.

¹⁷ Ma me A Trai, me la pynlong ïa ngi ban lynñiar, kum ka briew kaba lynñiar ha ka jingsuh kha.

¹⁸ Ngi don ha ka jingpang bad ka jingkordit, hynrei ngim pynmih ei ei. Ngim shym la ïoh jingjop na ka bynta ka ri jong ngi; ngim shym la ïoh jingjop ei ei.

¹⁹ Kito kiba dei napdeng ki briew jong ngi kiba la ïap kin im biang! Ki met jong ki kin wan phai biang sha ka jingim. Baroh kito kiba ïohthiah ha ki jingtep jong ki kin kyndit thiah bad kin rwai namar ka jingkmen. Kumba ka umjer baphyrnai ka pynthymmai bor ïa ka khyndew, kumta ruh U Trai un pynkhie im pat ïa kito kiba la ïap la slem.

Ka jingbishar bad ka jingpynïoh pat

²⁰ To rung shapoh ki ïing jong phi, ko ki briew jong nga, bad to khang ïa ka jingkhang shadien jong phi. To buhrieh ïa lade katto katne por haduh ba ka jingbitar U Blei kan kut.

²¹ U Trai u wan na ka jaka shong jong u na bneng ban pynshitom ïa ki briew jong ka pyrthei namar ki pop jong ki. Ki jingpynïap briew ha ka pyrthei ïa kiba la leh ha kaba rieh, yn pynpaw, bad ka khyndew kan ym lah shuh ban buhrieh ïa kito ïa kiba la pynïap.