ISAÏAH 25 - Khasi CL Bible (BSI)

Ka jingrwai ïaroh

¹ A Trai, me long U Blei jong nga; ngan pyndonburom ïa me bad ïaroh ïa ka kyrteng jong me. Me la leh kiei kiei kiba phylla; me la long uba ïaineh ha kaba pyntreikam ïa ki jingthmu jong me kiba me la thmu naduh mynbarim.

² Me la pynjot ïa ki nongbah bad pynpra ïa ki jingtei-kut. Ki ïingsyiem kiba ki nongshun jong ngi ki la tei ki la jah noh junom.

³ Ki briew jong ki hima badonbor kin ïaroh ïa me bad yn sheptieng ïa me ha ki nongbah jong ki hima bashyrkhei.

⁴ Kiba duk bad ki bym don jingïarap ki phet sha me bad ki shongshngain ha ki por ka jingjynjar. Me ai jakarieh ïa ki na ki 'erïong bad ka jakarieh tngen na ka jingshit kyr-ang. Ki riewrunar ki tur ïaleh kum ka 'erïong tlang,

⁵ kum ka jingtyrkhong ha ka ri baryngkhiang. Hynrei ma me, A Trai, me la pynsngap jar ïa ki nongshun jong ngi; Me la pynsngap jar ïa ki jingpyrta jong ki riewrunar, kum u lyoh uba pynpyngngad ha ka sngi bashit.

U Blei u pynkhreh ka jingkhawai bah

⁶ Hangne halor u Lum Seïon, U Trai Badonbor Baroh un pynkhreh ka jingkhawai bah na ka bynta ki jaitbynriew baroh jong ka pyrthei — ka jingkhawai bah da ki jingbam bakyrhai eh bad ka waiñ bakynsai tam.

⁷ Hangne un sa weng kynsan ïa u lyoh jong ka jingsngewsih uba ju tap halor ki jaitbynriew baroh.

⁸ U Trai Nongsynshar un pynkut noh ïa ka jingïap junom! Un ñiad noh ïa ki ummat na ki khmat jong baroh bad un weng noh ïa ka jingjahburom kaba ki briew jong u ki la shah ha kylleng ka pyrthei. U Trai hi da lade u la kren!

⁹ Haba kane kan jia, baroh kin ong, “U long U Blei jong ngi! Ngi la buh ïa ka jingshaniah jong ngi ha u, bad u la pyllait im ïa ngi. U long U Trai! Ngi la buh ïa ka jingshaniah ha u, bad mynta ngi kmen namar ba u la pynim ïa ngi.”

U Blei un pynshitom ïa ki Moab

¹⁰ U Trai un ïada ïa u Lum Seïon, hynrei ki briew jong ka Moab kin shah ïuhroit, kumba ïa u phlangïap la ïuh haba shna sboh.

¹¹ Kin pyiar ïa la ki kti kumba ki pyrshang ban jngi, hynrei U Blei un pynjahburom ïa ki, bad ki kti jong ki kin ngam khlem ïoh jingïarap.

¹² Un pynjot ïa ki kut jong ki Moab bad ïa ki kynroh bajrong jong ki bad pynhap ïa ki shapoh khyndew.