ISAÏAH 24 - Khasi CL Bible (BSI)

U Trai un pynshitom ïa ka pyrthei

¹ U Trai un sa pynjot ïa ka pyrthei bad un pynlong kynjah ïa ka. Un sa khyrwait ïa ka khmat jong ka pyrthei bad pynsakma ïa ki briew jong ka.

² Uwei pa uwei un ïakynduh ïa kajuh ka kupar — ki lyngdoh bad ki briew, ki mraw bad ki kynrad, kiba thied bad kiba die, kiba ai kylliang bad kiba shim kylliang, kiba riewspah bad kiba duk.

³ Ka pyrthei kan ka pra bad kan jot. U Trai u la kren bad ïa kata yn pyndep.

⁴ Ka pyrthei ka tyrkhong bad ka stai noh; ka pyrthei baroh kawei ka kylla tlot; ka pyrthei bad ka sahit bneng, baroh ar, kin pyut noh.

⁵ Ki briew ki la pyntngit ïa ka pyrthei da kaba pynkheiñ ïa ki aiñ jong U Blei bad da kaba ïaleh pyrshah ïa ka jutang kaba u la pynlong ban neh junom.

⁶ Kumta U Blei u la pynbna ïa ka jingtim ha ka pyrthei. Ki briew jong ka ki hap ban siew ïa kaei kaba ki la leh. Kiba im ki la nang duna bad nang duna.

⁷ Ki bri sohwaiñ ki la ïapstai bad ka um sohwaiñ ka la nang duna. Baroh kiba la long shisien kiba kmen, mynta ki sngewsih,

⁸ bad ka sur bakmen jong ki duitara bad ki ksing jong ki ka la duh noh.

⁹ Ym don shuh ka jingrwai bakmen ha ka por ba dih waiñ; ym don basngewtynnat shuh ïa ka jingmad jong ka.

¹⁰ Ha ka nongbah, baroh kiei kiei ki long ha ka jingkulmar, bad ki briew ki la setkut ïa lade ha ki ïing jong ki ban shngain.

¹¹ Ki briew ki pyrta ha ki lynti bah namar ym don waiñ shuh. Ka jingkmen ka la duh noh junom; la beh noh ïa ka na ka ri.

¹² Ka nongbah ka long hapdeng ka jingjot, bad ïa ki khyrdop jong ka la pyntwa noh.

¹³ Kane ka dei kaei ka ban jia ha baroh ki jaitbynriew kylleng ka pyrthei. Kan long kum ka jingkut jong ka jingot, haba ïa ki soh Olib la dep tied pynhap na uwei pa uwei u dieng bad ba ïa ki sohwaiñ bakhatduh la kheit na ki dieng sohwaiñ.

¹⁴ Kito kiba lait im kin rwai da ka jingkmen. Kito kiba don ha sepngi kin ïathuh katno ba U Trai u long uba khraw,

¹⁵ bad kito kiba ha mihngi kin ïaroh ïa u. Ki briew kiba im harud ka duriaw kin ïaroh ïa U Trai, U Blei ki Israel.

¹⁶ Na ki bynta bajngai tam ka pyrthei ngin ïohsngew ïa ki jingrwai jingïaroh ïa ki Israel, ka jaitbynriew bahok. Hynrei ym don jingkyrmen na ka bynta jong nga! Nga shu duh lehnoh-ei! Ki nongshetkylla ki ïai shetkylla, bad ka kam shyrkhei jong ki ka nang sniew nang sniew.

¹⁷ To shahshkor ïa nga, phi baroh! Ki don ki jingshyrkhei, ki 'liewlep, bad ki jingriam kiba ap ïa phi.

¹⁸ Uno uno uba pyrshang ban lait na ka jingshyrkhei un hap ha ka 'liewlep, bad uno uno uba lait na ka 'liewlep un ngat ha ka jingriam. U 'lapbah un theh na suiñbneng, bad ïa ki nongrim jong ka pyrthei yn pynkhih.

¹⁹ Ka pyrthei kan orpait bad kan kad.

²⁰ Ka pyrthei hi kan khih kum u nongbuaid bad khih shane bad shatai kum ka ïingtrep ha ka 'erïong. Ïa ka pyrthei la pynkhia da ki pop jong ka; kan khyllem bad kan ym lah khie khlieh shuh.

²¹ Ka por kan poi haba U Trai un pynshitom ïa ki bor ba-halor bad ïa ki nongsynshar ka pyrthei.

²² U Blei un buh khapngiah ïa ki syiem kum ki koidi ha ka thliew. Un set ïa ki ha ka ïingbyndi haduh ka por jong ka jingpynshitom ïa ki.

²³ U bnai un kylla dum, bad ka sngi kan ym tyngshaiñ shuh, namar U Trai Badonbor Baroh un long u syiem. Un synshar ha Jerusalem halor u Lum Seïon, bad ki nongïalam jong ki briew kin ïohi ïa ka burom jong u.