ISAÏAH 23 - Khasi CL Bible (BSI)

Ka khubor ïa ka Phoenisia

¹ Kane ka dei ka khubor ïa ka Tyros. To lynñiar da ka jingsngewsih, phi ki maji ha ki duriaw-bah! Ïa ka kadlieng ha ka shnong jong phi, ka Tyros, la pynjot; ki ïing bad ka kadlieng jong ka ki don ha ka jingjot. Kumba ki liengbah jong phi ki wan phai na Sypros, phi tip ïa ka khubor.

^2-3 To ïam pangnud, phi ki nongkhaïi ka Sidon! Phi phah ïa ki rangbah sha shiliang ka duriaw ban thied bad ban die ïa u kew uba mih ha Ijipt bad ban ïakhaïi bad baroh ki jaitbynriew.

⁴ Ko nongbah Sidon, pha long kaba la jahburom! Ki jingjylliew jong ka duriaw-rit bad duriaw-bah ki la kyntait ïa pha bad ki ong, “Ngam ju don kino kino ki khun. Ngam ju pynheh pynsan ïa ki khun shynrang ne ki khun kynthei.”

⁵ Wat ki nong Ijipt kin kyndit bad khuslai haba ki tip ba ïa ka Tyros la pynjot.

⁶ To lynñiar da ka jingsngewsih, phi ki briew ka Phoenisia! Pyrshang ban phet ïap sha Spain!

⁷ Hato kane kan long ka nongbah bakmen jong ka Tyros, ïa kaba la tei naduh mynbarim? Hato kane ka dei ka nongbah kaba la phah ïa ki nongshong shnong sha shiliang ka duriaw ban buhai shnong?

⁸ Uei uba la thmu ban wanrah ïa kane ha Tyros, kata ka nongbah u patsha, kiba ki khun syiem kiba khaïi pateng ki la long ki briew ïa kiba la ñiewburom eh ha ka pyrthei?

⁹ U Trai Badonbor Baroh u la thmu ïa kata. U la thmu ïa kata khnang ban pynkut noh ïa ka jingsarong jong ki ha kaei kaba ki la leh bad ban pynpoh ïa ki rangbah ïa kiba la ñiewburom.

¹⁰ Khie leit bad rep ïa kata ka ri, phi ki briew ha ki jaka buhai shnong ha Spain! Ym don shuh mano mano ban ïada ïa phi.

¹¹ U Trai u la kner ïa la ka kti halor ka duriaw bad u la jop ïa ki hima. U la hukum ban pynjot ïa ki jaka pdeng jong ki jingkhaïi pateng ka Phoenisia.

¹² Ko ka nongbah Sidon, ka jingkmen jong pha ka la kut, bad ki briew jong pha ki shah banbeiñ. Wat la kin lait phet sha Sypros, pynban kin ym pat lait na ka jingma.

¹³ (Ki dei ki nong Babilonia, ym ki nong Assyria, kiba la pynlong ba ki mradkhlaw kin tur ïa ka Tyros. Dei ki nong Babilonia kiba la tei ïa ki mot-kerkut, kiba la pyntwa ïa ki jingtei-kut ka Tyros bad ki la iehnoh ïa ka nongbah ha ka jingjot.)

¹⁴ To lynñiar da ka jingsngewsih, phi ki maji ha ka duriaw-bah! La pynjot ïa ka nongbah kaba phi shaniah.

¹⁵ Ka por ka poi ha kaba ïa ka Tyros yn klet noh hynñiewphew snem, kat ka rta u syiem. Haba kita ki snem ki la kut noh, ka Tyros kan long kum ka nuti ha ka jingrwai:

¹⁶ Shim ïa ka duitara, khie leit sawdong ïa ka shnong, Pha ka bapli ka nuti ba la klet noh! To tem bad rwai biang ïa ki jingrwai jong pha To wallam ïa ki rangbah sa shisien pat.

¹⁷ Haba ki hynñiewphew snem ki la kut, U Trai un sa shah ïa ka Tyros ban leit phai pat sha ka kam khaïi kaba mynshuwa, bad kan aiwai ïa lade sha baroh ki hima jong ka pyrthei.

¹⁸ Ïa ka pisa kaba ka kamai da ka jingkhaïi pateng, yn pynkyntang sha U Trai. Pynban kan ym buh tyngkai, hynrei kito kiba mane ïa U Trai, kin pyndonkam ïa ka pisa jong ka ban thied jingbam bad ki jaiñ ki nep kiba ki donkam.