ISAÏAH 22 - Khasi CL Bible (BSI)

Ka khubor shaphang ka Jerusalem

¹ Kane ka dei ka khubor shaphang ka Them ka Jingïohipaw. Kaei kaba jia? Balei ki briew baroh jong ka nongbah ki rakhe lehkmen halor ki tnum ïing?

² Ka nongbah baroh kawei ka don ha ka jingkhihwin, la pyndap da ka jingsawa bad ka jingshongshit. Ki rangbah jong phi kiba la ïap ha kane ka thma kim shym ïap ha ka jingïaleh.

³ Ki nongïalam jong phi baroh ki la phet krad bad ki la shah kem ha shuwa ba kin ïoh siat uwei u khnam.

⁴ Mynta to iehnoh ïa nga marwei ban ïamkthang halor kito na ki briew jong nga kiba la ïap. Wat pyrshang ban pyntngen ïa nga.

⁵ Kane ka dei ka por jong ka jingkhih jingmut, ka jingshahjop, bad ka jingkulmar jingmut ha ka Them ka Jingïohipaw, bad U Trai U Nongsynshar Badonbor Baroh u la phah ïa ka ha ngi. Ïa ki kynroh jong ka nongbah jong ngi la tied pynkhyllem, bad ki jingkyang ban ïoh jingïarap ki la sawa hapdeng ki lum.

⁶ Ki shipai na ka ri Elam ki la wan da kaba shong halor ki kulai, ki da kieng atiar da ki ryntieh bad ki khnam. Ki shipai na ka ri Kir ki la khreh ïa ki stieh jong ki.

⁷ Ïa ki them kiba seisoh jong ka Judah la pyndap da ki kali ïapom; ki shipai halor ki kulai ki da ïeng ha khmat ki khyrdop jong ka Jerusalem.

⁸ Baroh ki jingïada jong ka Judah ki la khyllem. Haba kata ka la jia, phi la wallam ïa ki tiar ïaleh na ka jaka buh.

^9-10 Phi la shem ïa ki jaka ha kaba ki kynroh jong ka Jerusalem ki donkam ïa ka jingshna pynbha. Phi la leit khmih ïa ki ïing baroh ha Jerusalem bad phi la pynkhyllem katto katne na ki ban ïoh ki maw ban shna pynbha ïa ki kynroh jong ka nongbah.

¹¹ Khnang ban pynlang ïa ka um, phi la shna ka jaka pynlang um hapoh jong ka nongbah ban bat ïa ka um kaba tuid na ka pung kaba rim. Hynrei phim shym la pynshahshkor ïa U Blei, uba la thmu ïa kane baroh la slem bah bad uba la pynurlong ïa ka.

¹² U Trai U Nongsynshar Badonbor Baroh u la khot ïa phi ha kato ka por ban ïam bad ïam pangnud, ban khi ïa ki khlieh jong phi bad ban phong ki jaiñ khain.

¹³ Pynban, phi ïa-rkhie bad phi ïalehkmen. Phi pynïap ïa ki langbrot bad ki masi ban bam, bad phi dih waiñ. Phi ong, “Ngi lah ruh ban ïabam bad ïadih! Lashai ngin ïap.”

¹⁴ U Trai U Nongsynshar Badonbor Baroh da lade hi u la kren ha nga bad ong, “Ïa kane kaba sniew jong ki yn ym map da lei lei katba ki dang im. Ma nga, U Trai U Nongsynshar Badonbor Baroh nga la kren.”

Ka jingmaham ïa u Shebna

¹⁵ U Trai U Nongsynshar Badonbor Baroh u la ong ïa nga ban leit sha u Shebna, u nongpynïaidkam ha ka longïing syiem, bad ong ha u,

¹⁶ “Me mut me dei uei? Me don hok aïu ban shna ka jingtep ïa lade ha ka sharing mawsiang?

¹⁷ Me lah ban long uba donkam, hynrei U Trai un shim ïa me bad bret noh ïa me sharud.

¹⁸ Un shim ïa me kum ïa ka bol bad un kynting sha ka ri kaba kham khraw. Men ïap hangta hajan ki kali ïapom kiba me, me la sngewsarong. Me long ka jingjahburom ïa ka longïing jong u kynrad jong me.

¹⁹ U Trai un weng noh ïa me na ka jaka treikam bad pynhiar ïa me na ka kyrdan kaba halor.”

²⁰ U Trai u ong ha u Shebna, “Haba kata ka jia, ngan phah khot ïa u shakri jong nga u Eliakim u khun jong u Hilkaïah.

²¹ Ngan buh ïa ka jaiñkup bad u panpoh nongpynïaidkam jong me halor jong u bad ngan ai ha u ka iktiar baroh kaba me la don. U, un long kum u kpa ïa ki briew jong ka Jerusalem bad ka Judah.

²² Ngan ai lut ha u, ka iktiar hapoh jong u syiem, uba hiarpateng jong u Dabid. Un don ki shabi jong ka jaka treikam; kaei kaba u plie, ym don mano mano ban khang, bad kaei kaba u khang, ym don mano mano ban plie.

²³ Ngan pynskhem triang ïa u kum ïa u snar, bad un long ka tynrai jong ka jingpyndonburom ïa ka longïing jong u baroh kawei.

²⁴ “Hynrei ki ba-ha-ïing ha-sem jong u baroh bad kiba hapoh ka ïing jong u kin long ka jingbankhia ïa u. Kin sdien ha u kum ki khiew bad ki pliang kiba la wah ha u snar!

²⁵ Haba kata ka jia, u snar uba la pynskhem un sa kylluid bad hap. Bad kata kan long ka jingkut jong kiei kiei baroh kiba la sdien ha u.” U Trai u la kren.