ISAÏAH 21 - Khasi CL Bible (BSI)

Ka jingïohipaw ïa ka jingkyllon jong ka Babilon

¹ Kane ka dei ka khubor shaphang ka Babilonia. Kum ka 'erlangthari kaba sar sha shiliang ka ri shyiap, ka jingjot kan wan na ka ri kaba shyrkhei.

² Nga la ïohi ka jingïohipaw jong ki jingjia ba-ishyrkhei, ka jingïohipaw ïa ka jingshetkylla bad ka jingpynjot. Ko kynhun shipai jong ka Elam, to tur ïaleh! Ko kynhun shipai jong ka Media, to kerkut ïa ki nongbah! U Blei un pynkut ïa ka jingshitom kaba la wanrah da ka Babilon.

³ Kaei kaba nga la ïohi bad ïohsngew ha ka jingïohipaw ka la pyndap ïa nga da ka jingsngewtriem bad sngewpang, ka jingpang kum ka jong ka kynthei ha ka por suh kha.

⁴ Ka khlieh jong nga ka king, bad nga khynñiuh da ka jingsheptieng. Nga la khmih lynti ïa ka janmiet ban wan, hynrei kam shym wallam ei ei hynrei tang ka jingtriem.

⁵ Ha ka jingïohipaw la dep khreh ïa ka jingkhawai; ïa ki jaiñ rben la siang na ka bynta kiba shah khot sngewbha ba kin shong. Ki da ïabam bad ïadih. Kynsan la sawa ka hukum: “Ko rangbah shipai! Pynkhreh ïa ki stieh jong phi!”

⁶ Nangta U Trai u la ong ha nga, “Khie leit bad buh u nongap phira, bad ong ïa u ban ïathuh ïa kaei kaba u ïohi.

⁷ Lada u ïohi ïa ki rangbah kiba wan halor ki kulai, shi jur shi jur, bad ki rangbah kiba shong halor ki kada bad ki ut, u dei ban da khmih bniah biang biang ïa ki.”

⁸ U nongap phira u pyrta, “Ko kynrad, nga la ïeng ap phira ha ka kam jong nga mynsngi bad mynmiet.”

⁹ Kynsan, hangne ki wan! Ki rangbah halor jong ki kulai, shi jur shi jur. U nongap phira u ai ka khubor, “Ka Babilon ka la kyllon! Baroh ki bleithaw kiba ki la mane ki la kyllon ha ka jingpait jingpra ha madan.”

¹⁰ Ko paid Israel jong nga, phi la shah shoh kumba shoh kew, hynrei mynta nga la pynbna ha phi ïa ka khubor babha ba nga la ïohsngew na U Trai Badonbor Baroh, U Blei jong ki Israel.

Ka khubor shaphang ka Edom

¹¹ Kane ka dei ka khubor shaphang ka Edom. Don uwei uba pyrta ïa nga na Edom, “Ko nongap phira, shen sa katno ba ka miet kan kut? Ïathuh ïa nga sa katno shen kan kut noh.”

¹² Nga jubab, “Ka step ka wan, hynrei ka miet kan wan biang. Lada phi kwah ban kylli biang, sa wan pat bad kylli.”

Ka khubor shaphang ka Arabia

¹³ Kane ka dei ka khubor shaphang ka Arabia. Phi ki briew jong ka Dedan, kiba ki kynhun leit jingleit jong phi ki shong dara ha ka rudnong bashrah jong ka Arabia,

¹⁴ to ai um ïa ki briew kiba sliang kiba wan sha phi. Phi ki briew jong ka ri Tema, to ai jingbam ïa ki nongphetwir.

¹⁵ Ki briew ki ïaphet ban ïohlait im na ki waitlam kiba la khreh ban pynïap ïa ki, na ki ryntieh kiba la khreh ban siat, na baroh ki jingma jong ka thma.

¹⁶ Nangta U Trai u ong ha nga, “Hapoh shisnem thik ka jingkhraw jong ki jait jong ka Kedar kan poi sha kaba kut.

¹⁷ Ki 'rang bahryntieh ki long ki rangbah kiba shlur tam jong ka Kedar, hynrei tang khyndiat na ki yn iehnoh, nga U Trai U Blei ki Israel, nga la kren.”