ISAÏAH 20 - Khasi CL Bible (BSI)

Ka dak jong u Nongïathuhlypa balyngkhuit

¹ Ha ki hukum jong u Sargon, u patsha jong ka Assyria, u rangbah ai hukum bahakhlieh tam jong ka kynhun shipai Assyria u la tur ïaleh ïa ka Ashdod ka nongbah Philistia.

² Lai snem mynshuwa, U Trai u la ong ïa u Isaïah u khun jong u Amos ban loit noh ïa ki juti jong u bad ïa ka jaiñ khain kaba u phong. U la kohnguh bad u la ïaid lyngkhuit bad da ka kjat suda.

³ Haba la kurup ïa ka Ashdod, U Trai u la ong, “U Isaïah u shakri jong nga u la ïaid lyngkhuit kylleng bad da ka kjat suda haduh lai snem. Kane ka dei ka dak jong kaei ka ban jia ïa ka Ijipt bad ïa ka Sudan.

⁴ U patsha jong ka Assyria un ïalam lyngkhuit ïa ki koidi kiba u la kem na kito ki ar tylli ki ri. Kiba samla bad kiba tymmen, kin ïaid da ka kjat suda bad lyngkhuit, bad ki rain jong ki ba khlem tap, kaba wanrah ka jinglehrain halor ka Ijipt.

⁵ Kito kiba buh ïa la ka jingshaniah ha ka Sudan bad kiba la kob sarong shaphang ka Ijipt kin shaïong jingmut; la pynkhih ïa ki jingkyrmen jong ki.

⁶ Haba kata ka por ka wan, ki briew kiba shong shi lynter ka rud duriaw jong ka Philistia kin ong, ‘Khmih ïa kaei kaba la jia ha ki briew kiba ngi la shaniah ban ïada ïa ngi na u patsha jong ka Assyria! Kumno ngin ïohlait im?’ ”