ISAÏAH 2 - Khasi CL Bible (BSI)

Ka jingsuk baneh junom

¹ Kane ka dei ka khubor kaba U Blei u la ai ha u Isaïah u khun jong u Amos shaphang ka Judah bad ka Jerusalem:

² Ha ki sngi ban wan u lumbah ha kaba ka Templ ka ïeng un long uba jrong tam na baroh, uba da jrong eh halor ki lumrit baroh. Kiba bun ki jaitbynriew kin tuid sha u,

³ bad ki briew jong ki, kin ong, “Ïa ngin kiew ïa u lum jong U Trai, sha ka Templ jong U Blei ka Israel. Un hikai ïa ngi kaei kaba u kwah ïa ngi ban leh; ngin ïaid ha ki lynti kiba u la jied. Naba ka jinghikai jong U Trai ka wan na Jerusalem; na Seïon u kren ha ki briew jong u.”

⁴ Un bishar ïa ki jingkajia hapdeng ki jaitbynriew. Kin tied tyrnem ïa ki waitlam jong ki sha ki jinglur lyngkha bad ïa ki sum jong ki sha ki waitbnoh khyllad tnat. Ki jaitbynriew kin ym ïaleh thma shuh, kin ym pynkhreh thma shuh.

⁵ Mynta, ko ki khun ki ksiew jong u Jakob, to ngin ïaid ha ka jingshai kaba U Trai u ai ha ngi!

Ïa ka jinglehmeng yn pynjot thiaw

⁶ A Blei me la iehnoh ïa ki briew jong me, ki khun ki ksiew jong u Jakob! Ka ri ka dap da ki jingleh myntor na ka ri Mihngi bad na ka Philistia. Ki briew ki bud ïa ki dustur nongwei.

⁷ Ka ri jong ki ka dap da ka rupa bad ka ksiar, bad ym don jingkut ïa ki jingkynshew jong ki. Ka ri jong ki ka dap da ki kulai, bad ym don jingkut ïa ki kali ïapom jong ki.

⁸ Ka ri jong ki ka dap da ki bleithaw, bad ki mane ïa kita kiba ki la shna da ki kti jong ki hi.

⁹ Ïa uwei pa uwei yn pynlehrain bad yn pynjahburom. Wat map ïa ki, A Trai!

¹⁰ Kin rieh ha ki krem ha ki mawsiang lum lane tih ki thliew ha khyndew ban pyrshang ban lait na ka jingbitar U Trai bad ban rieh na ka bor bad ka burom jong u!

¹¹ Ka sngi kan wan ha kaba yn pynkut ïa ka jingsarong ba kynja briew bad yn pynjot thiaw ïa ka jinglehmeng ba kynja briew. Nangta tang ïa U Trai hi yn kyntiew burom.

¹² Ha kata ka sngi U Trai Badonbor Baroh un pynpoh ïa uwei pa uwei uba khrawbor, ïa uwei pa uwei uba sarong bad uba sngewmeng.

¹³ Un pynjot ïa ki dieng Kedar kiba jrong jong ka Lebanon bad ïa ki dieng Sning baroh ha ka ri Bashan.

¹⁴ Un pynmadan ïa ki lumbah bakynjang bad ïa ki lumrit,

¹⁵ ïa uwei pa uwei u mot bakynjang, bad ïa ki kynroh jong kawei pa kawei ka kut.

¹⁶ Un pynngam wat ïa ki liengbah kiba khraw bad kiba itynnat tam.

^17-18 Ïa ka jingsarong ba kynja briew yn pynkut bad ïa ka jinglehmeng ki briew yn pynjot. Ki bleithaw kin jah noh plain, bad tang ïa U Trai yn kyntiew burom ha kata ka sngi.

¹⁹ Ki briew kin rieh ha ki krem ha mawsiang lum lane tih thliew ha khyndew ban pyrshang ban lait na ka jingbitar jong U Trai bad ban rieh na ka bor bad ka burom jong u, haba u wan ban pynkhynñiuh ïa ka pyrthei.

²⁰ Haba kata ka sngi ka wan, kin bret sharud ïa ki bleithaw ksiar bad rupa ba ki la thaw, bad kin iehnoh ïa ki ha ki khnai tynjit bad ha ki lymbit.

²¹ Haba U Trai u wan ban pynkhynñiuh ïa ka pyrthei, ki briew kin rieh ha ki thliew bad ki krem ha ki mawsiang lum ban pyrshang ban lait na ka jingbitar jong u bad ban rieh na ka bor bad ka burom jong u.

²² Wat buh jingshaniah shuh ha ki briew ki bym lah ban im junom. Ki dondor haduh katno?