ISAÏAH 19 - Khasi CL Bible (BSI)

U Blei un pynshitom ïa ka Ijipt

¹ Kane ka dei ka khubor shaphang ka Ijipt. U Trai u wan sha Ijipt, u da shong ha u lyoh uba ïaid stet. Ki bleithaw jong ki Ijipt ki khynñiuh ha khmat jong u, bad ki briew jong ka Ijipt ki duh noh ïa ka jingshlur jong ki.

² U Trai u ong, “Ngan pynkhih ka thma poh-ïing ha Ijipt bad ngan pynphai ïa u para pyrshah ïa u para bad u paramarjan pyrshah ïa u paramarjan. Ki nongbah ba-ïashun kin ïaleh kawei ïa kawei pat, bad ki syiem ba-ïashun kin ïaksaid ban ïoh ïa ka bor.

³ Ngan pynpulom ïa ki jingthmu jong ki nong Ijipt bad ngan pynjot ïa ka jingsngewskhem jong ki. Kin kyrpad ïa ki bleithaw jong ki ban ïarap ïa ki, bad kin leit ban kylli na ki nongleh byrtong bad kylli na ki mynsiem jong kiba ïap ban ïoh jingmut.

⁴ Ngan aiti ïa ki nong Ijipt sha u nongsynshar lehbor, sha u syiem runar u ban synshar ïa ki. Nga, U Trai Badonbor Baroh, nga la kren.”

⁵ Ka um kan rit ha ka Nile, bad ka wah kan sdang ban rngad.

⁶ Ki shnat jong ka wah kin iwtung katba ki dang rngad suki suki. Ki khah bad ki japung kin jlop,

⁷ bad baroh ki jingthung ba la bet ha ki rudwah jong ka Nile kin tyrkhong bad yn sa rong noh.

⁸ Uwei uwei baroh uba kamai ïa lade da kaba khwai ha ka Nile un ud khuslai bad un ïam; ki khwai bad ki jar jong ki kin long ki bymmyntoi shuh.

⁹ Kito kiba thain ïa ka jaiñ linen kin don ha ka jingduh jingkyrmen;

¹⁰ Ki nongthain jaiñ bad ki nongtrei kiba tbit kin diaw bad kin noh mynsiem.

¹¹ Ki nongïalam jong ka nongbah Soan ki dei ki bieit! Ki briew kiba stad tam jong ka Ijipt ki ai ka jingai jingmut ba khlem pyrkhat bha! Kumno ki nud ban ïathuh ïa u syiem ba ki dei ki nongmih bujli ïa ki riewstad hyndai bad ïa ki syiem?

¹² Ko syiem Ijipt, shano kito ki nongai jingmut bashalak jong me? Lehse ki lah ban ïathuh ha me ïa ki jingthmu jong U Trai Badonbor Baroh kiba u don ïa ka Ijipt.

¹³ Ki nongïalam jong ka Soan bad jong ka Memphis ki dei ki bieit. La khmih lynti ïa ki ban ïalam ïa ka ri, hynrei ki la ïalam bakla ïa ka.

¹⁴ U Trai u la pynlong ïa ki ban ai ka jingai jingmut kaba pynkulmar. Kaba mih nangta ka long ba ka Ijipt ka leh ïa kaei kaei baroh kaba bakla bad ka ïaid sheng sheng kum u briew uba buaid uba syntuid ha la ka jong ka prie.

¹⁵ Ym don mano mano ha Ijipt, uba riewspah ne uba duk, uba donnam ne u bym donnam, uba lah ban tyrwa ban ïarap.

Ka Ijipt kan mane ïa U Trai

¹⁶ Ka por ka wan haba ki briew jong ka Ijipt kin long kiba khawpud kum ki kynthei. Kin khynñiuh ha ka jingsngewtriem haba ki ïohi ba U Trai Badonbor Baroh u la kner ïa la ka kti ban pynshitom ïa ki.

¹⁷ Ki briew jong ka Ijipt kin sngewtriem ïa ka Judah ha man ka por ba la pynkynmaw ïa ka kupar kaba U Trai Badonbor Baroh u la khreh na ka bynta jong ki.

¹⁸ Haba kata ka por ka wan, ïa ka ktien Hebru yn kren ha ki san tylli ki nongbah jong ka Ijipt. Ki briew hangta kin shim jingsmai ha ka kyrteng jong U Trai Badonbor Baroh. Ïa kawei na ki nongbah yn khot, “Ka Nongbah jong ka Sngi.”

¹⁹ Haba kata ka por ka wan, kan don ka duwan ïa U Trai ha ka ri Ijipt bad u rishot maw ba la pynkyntang sha U ha ka pud Ijipt.

²⁰ Kin long ka dak jong ka jingdon ryngkat jong U Trai Badonbor Baroh ha Ijipt. Haba ïa ki briew hangta la banbeiñ bad ki la kyang jam sha U Trai ban ïoh jingïarap, un phah ïa uno uno ban pyllait ïa ki.

²¹ U Trai un pynpaw ïa lade ha ki nong Ijipt, bad nangta kin tip bad kin mane ïa u, bad kin wallam ha u ïa ki jingkñia bad ki jingainguh. Kin pynlong ki jingkular kyntang ha u bad kin pyndep ïa kaei kaba ki kular.

²² U Trai un pynshitom ïa ki Ijipt, hynrei pynban un pynkhiah ïa ki. Kin phai sha u, bad un ïohsngew ïa ki jingduwai jong ki bad pynkoit ïa ki.

²³ Haba kata ka por ka wan, kan don ka surok bah hapdeng ka Ijipt bad ka Assyria. Ki briew jong kito ki ar tylli ki ri kin ïaleit ïawan hapdeng jong ki, bad ki ar tylli ki ri kin ïamane lang.

²⁴ Haba kata ka por ka wan, ïa ka Israel yn kyrdan lang bad ka Ijipt bad ka Assyria, bad kine ki lai tylli ki ri kin long ka jingkyrkhu ïa ka pyrthei baroh.

²⁵ U Trai Badonbor Baroh un kyrkhu ïa ki bad un ong, “Ngan kyrkhu ïa pha, ko Ijipt, ki briew jong nga; ïa pha, ko Assyria, kaba nga la thaw; bad ïa pha, ko Israel, ki briew kiba la jied jong nga.”