ISAÏAH 18 - Khasi CL Bible (BSI)

U Blei un pynshitom ïa ka Sudan

¹ Sha lyndet ki wah jong ka Sudan don ka ri ha kaba la ïohsngew ïa ka jingsawa jong ki thapniang.

² Na kata ka ri, ki nongkit 'tiensyiem ki la wan arsut ïa ka Nile ha ki lieng ba la shna da ki khah. Khie noh sha ïing, ko nonglamktien bastet! Rah noh ïa ka khubor sha ka ri jong phi kaba la pynïakhlad ïa ki wah, sha ka jaitbynriew jong phi kaba khlaiñ bad kaba donbor, sha ki briew jong phi kiba jrong bad kiba jlih ka sniehdoh, ïa kiba la sheptieng ha kylleng ka pyrthei baroh.

³ To shahshkor, phi baroh kiba shong ha ka pyrthei! To ap ïa ka lama ai dak kaba yn kyntiew halor ki kliar jong ki lumbah! To shahshkor ïa ka jingput ïa ka ronsing!

⁴ U Trai u la ong ha nga, “Ngan jngoh sha tbian na bneng kumba ka umjer ka wandur jar jar ha ki miet basyiad ha ka aïom ot, kumba ka sngi ka phyrnai itynnat ha ka jingshit ka sngi.

⁵ Ha shuwa ba yn lum ïa ki sohwaiñ, haba ki syntiew ki la hap lut bad ba ki sohwaiñ ki la ih, u nongshun un pynjot ïa ki nong Sudan da kaba suk kumba ka tari ka ot ïa ki tnat na u dieng sohwaiñ.

⁶ Ïa ki metïap jong ki shipai jong ki yn iehnoh ha ki sim bad ki mradkhlaw. Ha ka lyiur ki sim kin bam ïa ki, bad ha ka tlang ki mrad.”

⁷ Ka por ka wan haba U Trai Badonbor Baroh un pdiang ïa ki jingainguh na kane ka ri ba la pynïakhlad ïa ki wah, kane ka jaitbynriew kaba khlaiñ bad kaba donbor, ki briew kiba jrong bad kiba jlih ka sniehdoh, ïa kiba la sheptieng ha ka pyrthei baroh. Kin wan sha u Lum Seïon, ha kaba la mane ïa U Trai Badonbor Baroh.