ISAÏAH 17 - Khasi CL Bible (BSI)

U Blei un pynshitom ïa ka Syria bad ïa ka Israel

¹ U Trai u la ong, “Ka Damaskos kan ym long shuh ka nongbah; kan long tang ka thup ki jingjot jingpra.

² Ïa ki nongbah jong ka Syria yn sa iehnoh junom. Kin long ka jaka pynbamphlang ïa ki langbrot bad ki masi, bad ym don mano mano ba beh noh ïa ki.

³ Ka Israel kan long kaba khlem jingïada, bad ka Damaskos kan duh noh ïa ka jinglaitluid jong ka. Kito ki nong Syria kiba lait im kin don ha ka jinglehrain kum ki briew jong ka Israel. Nga, U Trai Badonbor Baroh, nga la kren.”

⁴ U Trai u la ong, “Ka sngi ka wan ha kaba ka jingkhraw jong ka Israel kan poi sha kaba kut, bad ïa ka spah jong ka yn bujli da ka jingduk.

⁵ Ka Israel kan long kum ka lyngkha ha kaba ïa u riewhadem la ot bad la kheit, kan kynjah kum ka lyngkha ha ka Them Rephaim haba la pynsah lyngkhuit ïa ka.

⁶ Tang khyndiat ki briew kin lait im, bad ka Israel kan long kum u dieng Olib na kaba la kheit lut ïa ki soh Olib lait noh ar ne lai tylli kiba ha kliar eh, lane khyndiat kiba la iehnoh ha ki tnat kiba shapoh. Nga, U Trai U Blei jong ki Israel, nga la kren.”

⁷ Haba kata ka sngi ka wan, ki briew kin phai sha U Nongthaw jong ki ban ïoh ïarap, U Blei bakhuid jong ki Israel.

⁸ Kin ym shaniah shuh ha ki duwan kiba ki la thaw da ki kti jong ki, lane shaniah ha ki kam ki kti jong ki hi — ki dak jong ka bleithaw Asherah bad ki duwan ban thang jingiwbih.

⁹ Haba kata ka sngi ka wan, ïa ki nongbah kiba la ïada bha yn iehnoh bad yn ieh ha ka jingjot jingpra kum ki nongbah kiba ki Hib bad ki Amor ki la iehnoh mynba ki phet ïap na ki paid Israel.

¹⁰ Ko Israel, pha la klet noh ïa U Blei uba la pyllait ïa pha bad uba la ïada ïa pha kum u mawsiang bah. Pynban, pha la thung ki kper bakyntang khnang ban mane ïa u blei nongwei.

¹¹ Hynrei wat haba ki khie lung bad ki phuh syntiew ha ka step ba pha thung ïa ki, yn ym don kano kano ka jingot. Yn don tang ka jingjynjar bad ka jingpang ka bym lah pynkoit.

La jop ïa ki hima nongshun

¹² Ki hima kiba khlaiñbor ki don ha ka jingkhynwin ha ka jingsawa kum ka jingkyrhuh jong ka duriaw, kum ka jingphaloh jong ki jingat phyllung kiba khraw.

¹³ Ki jaitbynriew ki ïaid shaphrang kum ki jingat phyllung kiba wan stet, hynrei U Blei u sneng ïa ki bad ki kynran, la beh noh ïa ki kum u pui pui ha ki sharing lum, kum u phlangïap ha ka 'erlangthari.

¹⁴ Ha ka por janmiet ki pynlong ka jingpyntriem, hynrei kat ban da step ki la jah noh. Kata ka dei ka kupar jong uwei uwei uba lute ïa ka ri jong ngi.