ISAÏAH 16 - Khasi CL Bible (BSI)

Ka khep baduh jingkyrmen jong ka Moab

¹ Na ka nongbah jong ka Sela ha ka ri shyiap, ki briew jong ka Moab ki phah u khunlangbrot kum ka jingai sngewbha ïa uta uba synshar ha Jerusalem.

² Ki ap ha ki rudwah jong ka wah Arnon bad ki ïaid khlem jingmut shane shatai, kum ki sim kiba la shah beh noh na ki skum jong ki.

³ Ki ong ha ki briew jong ka Judah, “Ong ïa ngi kaei ba ngin leh. To ïada ïa ngi kum u dieng uba shat syrngiew tngen ha ka jingshit jong ka shiteng sngi, bad shah ïa ngi ban pynjahthait ha ka jingda jong me. Ngi long ki phetwir; to buhrieh ïa ngi ha ka jaka ha kaba ym don mano mano ban shem ïa ngi.

⁴ To ngin shong ha ka ri jong ngi. To ïada ïa ngi na kito kiba kwah ban pynjot ïa ngi.” (Ka jingshah banbeiñ bad ka jingpynjot kin kut, bad kito kiba pynjot ïa ka ri kin jah noh.

⁵ Nangta uwei na ki khun ki ksiew jong u Dabid un long syiem, bad un synshar ïa ki briew da ka jingïaineh bad ka jingieit. Un long uba kloi ban leh ïa kaba dei, bad un khmih ba yn leh ïa ka jingbishar hok.)

⁶ Ki briew jong ka Judah ki ong, “Ngi la ïohsngew katno ki briew jong ka Moab ki long kiba sarong. Ngi tip ba ki long kiba sngewmeng bad kiba sarong palat, hynrei ka jingkob jong ki ka long kaba thylli.”

⁷ Ki briew jong ka Moab kin lynñiar namar ki jingjynjar ba ki shah. Baroh kin ïam haba ki kynmaw ïa ka jingbam babha kaba ki ju bam ha ka nongbah jong ka Kir Heres. Yn beh ïa ki baroh sha ka jingduh jingkyrmen.

⁸ Ïa ki kper hajan ka Heshbon bad ïa ki bri sohwaiñ jong ka Sibmah la pynjot — kito ki bri sohwaiñ kiba ïa ka waiñ jong ki la pyndonkam ban pynbuaid ïa ki nongsynshar jong ki hima. Ha kawei ka sien ki dieng sohwaiñ ki saphriang kat shaduh ka nongbah Jaser, bad shaphang mihngi sha ka ri shyiap, bad shaphang sepngi sha kawei pat ka liang jong ka Duriaw Baïap.

⁹ Mynta nga ïam ïa ki sohwaiñ jong ka Sibmah kumba nga ïam namar ka Jaser. Ki ummat jong nga ki hap na ka bynta ka Heshbon bad ka Elealeh, namar ym don kano kano ka jingkheit soh kaba pynkmen ïa ki briew.

¹⁰ Ym don mano mano bakmen mynta ha ki lyngkha baseisoh. Ym don mano mano ba pyrta jam lane rwai ha ki bri sohwaiñ. Ym don ba ïuh ïa ki sohwaiñ ban shna waiñ; ki jingpyrta jam jong ka jingkmen ki la kut.

¹¹ Nga la ud da ka jingsngewsih namar ka Moab, da ka jingpangnud namar ka Kir Heres.

¹² Ki briew jong ka Moab ki pynlwait ïa lade da kaba leit sha ki jaka mane ha ki lumbah bad sha ki templ jong ki ban duwai, hynrei kan ym manbha ïa ki.

¹³ Kata ka dei ka khubor kaba U Trai u la ai mynshuwa shaphang ka Moab.

¹⁴ Bad mynta U Trai u ong, “Ha ki lai snem thik, ka spah bakhraw jong ka Moab kan jah noh. Na ki briew kiba bun jong ka, tang khyndiat ki ban lait im, bad kin long kiba tlot.”