ISAÏAH 15 - Khasi CL Bible (BSI)

U Blei un pynjot ïa ka Moab

¹ Kane ka dei ka khubor shaphang ka Moab. Ïa ki nongbah jong ka Ar bad ka Kir la pynjot tang ha kawei ka miet, bad ka jingkynjah ka tap ïa ka ri Moab.

² Ki briew jong ka Dibon ki kiew ïa u lum ban ïam ha ka jaka mane blei. Ki briew jong ka Moab ki la ïam ha ka jingsngewsih ïa ki nongbah jong ka Nebo bad Medeba; ki la khi ïa la ki khlieh bad ïa u 'ñiuhtmoh ha ka jingsngewsih.

³ Ki briew ha ki lynti bah ki la kup da ki jaiñ khain, ha ki jaka paidbah jong ka nongbah bad halor ki tnum ïing ki briew ki ïambriew bad kyang.

⁴ Ki briew jong ka Heshbon bad ka Elealeh ki kyang jam, bad ïa ka jingkyang jong ki lah ban ïohsngew kat shaduh Jahas. Wat ki shipai ki khynñiuh; ka jingshlur jong ki ka duh noh.

⁵ Ka dohnud jong nga ka kyang jam namar ka Moab! Ki briew ki la phet sha ki shnong jong ka Soar, bad sha ka Eglath Shelishiyah. Katto katne ki kiew ïa ka surok sha Luhith, ki da ïam haba ki leit; katto katne ki lait phet sha Horanaim, ki da ïam sngewsih jam.

⁶ Ka wahduid Nimrim ka rngad, u phlang harud jong ka u la ïapstai, bad ym don kano kano kaba jyrngam kaba dang sah.

⁷ Ki briew ki leit sha shiliang jong ka Them ki dieng Jamynrei, da kaba pyrshang ban lait phet lem bad la ki jingdon jingem jong ki.

⁸ Ha kylleng ki pud jong ka Moab la ïohsngew ïa ka jingkyang. La ïohsngew ha ki shnong jong ka Eglaim bad Beerelim.

⁹ Ha ka shnong Dibon ka wah ka saw da ka snam, bad U Blei u don kaei kaei kaba kham sniew ba la buh na ka bynta ki briew hangta. Ho-oid, yn don ka jingpynïap ba lyngkien snam ïa uwei uwei baroh ba la iehnoh ha Moab.