ISAÏAH 14 - Khasi CL Bible (BSI)

Ka jingwanphai na ka jingshah ringmraw

¹ U Trai sa shisien pat un sngewsynei ïa ki briew jong u ki Israel bad un jied ïa ki kum la ki jong. Un shah ïa ki ba kin shong kin sah ha la ka jong ka ri sa shisien pat, bad ki nongwei kin wan bad kin shong kin sah hangta bad ki.

² Bun ki jaitbynriew kin ïarap ïa ki paid Israel ban leit phai sha ka ri kaba U Trai u la ai ha ki, bad hangta ki jaitbynriew kin shakri ïa ki Israel kum ki mraw. Kito kiba shisien ki la kem ïa ki Israel mynta kin shah kem ha ki Israel, bad ki paid Israel kin synshar halor jong kito kiba shisien ki la banbeiñ ïa ki.

U syiem jong ka Babilonia ha ka pyrthei kiba ïap

³ U Trai un ai ha ki paid Israel ka jingtngen na ki jingpang bad ki jingshitom jong ki bad na ka kam kaba khia kaba ki la shah pynbor ban trei.

⁴ Haba u leh ïa kane, ki dei ban tim ïa u syiem ka Babilonia bad ong: “U syiem barunar u la kyllon! Un ym banbeiñ shuh da lei lei ïano ïano sa shisien pat!

^5-6 U Trai u la pynkut ïa ka bor jong ki nongsynshar basniew kiba banbeiñ da ka jingbitar ïa ki briew bad ki bym ju sangeh ban pynshitom beiñ ïa ki jaitbynriew kiba ki la jop.

⁷ Mynta ha kaba khatduh ka pyrthei baroh kawei ka ïoh ïa ka jingjahthait bad ka jingsuk, bad uwei pa uwei u rwai da kaba kmen.

⁸ Ki dieng Kseh-Sypress bad ki dieng Kedar jong ka Lebanon ki risa da kaba kmen halor u syiem uba la kyllon, namar ym don mano mano ban khet ïa ki, mynta ba um don shuh!

⁹ “Ka pyrthei jong kiba ïap ka pynkhreh ban pdiang sngewbha ïa u syiem jong ka Babilonia. Ki sna-ïap jong kito kiba donbor ha ka pyrthei ki ïakhih ksar. Ki sna-ïap jong ki syiem ki ïeng na ki khet jong ki.

¹⁰ Ki baroh ki khot ïa u, ‘Mynta me la tlot kumba long ma ngi! Me long uwei na ngi!

¹¹ Me la mlien ban ïoh ka jingpyndonburom da ki sur jingtem ki duitara, hynrei mynta hangne me don ha ka pyrthei kiba ïap. Me thiah ha ka jingthiah jong ki ksaiñ bad la tap nep da ki wieh.’

¹² “Ko syiem ka Babilonia, u khlur step baphyrnai, me la hap na bneng! Ha kaba mynshuwa me la jop ïa ki hima, hynrei mynta la bret ïa me sha madan.

¹³ Me la kut jingmut ban kiew shaduh bneng bad ban buh ïa ka khet jong me halor ki khlur kiba hajrong tam. Me la pyrkhat ba men shong kum u syiem halor uta u lumbah ha ka phang bashatei ha kaba ki blei ki ïalumlang.

¹⁴ Me la ong ba men kiew ïa ki kliar jong ki lyoh bad ban long kum U Badonbor Tam.

¹⁵ Hynrei pynban, la pynhiar ïa me sha ka bynta kaba jylliew tam jong ka pyrthei kiba ïap.

¹⁶ “Kiba ïap kin peit seh bad ang ïa me. Kin kylli, ‘Hato une u dei u briew uba la pynkhih ïa ka pyrthei bad pynkhynñiuh ïa ki hima?

¹⁷ Hato une u dei u briew uba la pynjot ïa ki nongbah bad pynkylla ïa ka pyrthei sha ka ri shyiap? Hato une u dei u briew u bym ju pyllaitluid ïa ki koidi jong u lane shah ïa ki ban leit sha ïing?’

¹⁸ Baroh ki syiem jong ka pyrthei ki thiah ha ki jingtep kiba itynnat,

¹⁹ hynrei mem don kano kano ka jingtep, bad ïa ka metïap jong me la bret shabar ba kan pyut. La tap ïa ka da ki met jong ki shipai ba la shah pynïap ha ka thma, la kynting ïa ka lem bad ki ha ka thliew mawsiang, bad la ïuh ïa ka.

²⁰ Namar me la pynjot pynpra ïa ka ri, bad pynïap ïa la ki briew, ïa me yn ym tep kum ïa kiwei pat ki syiem. Ym don mano mano na ka longïing basniew jong me ban lait im.

²¹ Ai ba ka jingpynïap kan sdang! Ki khun shynrang jong une u syiem kin ïap namar ki pop jong ki kpa tymmen jong ki. Ym don mano mano na ki u ban synshar ïa ka pyrthei lane tap ïa ka da ki nongbah.”

U Blei un pynjot ïa ka Babilon

²² U Trai Badonbor Baroh u ong, “Ngan tur ïaleh ïa ka Babilon bad wallam ïa ka sha ka jingjot jingpra. Ngan ym pynsah ei ei — yn ym don khynnah, yn ym don mano mano ba lait im. Nga, U Trai nga la kren.

²³ Ngan pynkylla ïa ka Babilon sha ka ahor ktieh, bad ki dkhoh kin shong hangta. Ngan sar ïa ka Babilon da u synsar u ban sar lut khoit ïa kaei kaei baroh. Nga, U Trai Badonbor Baroh, nga la kren.”

U Blei un pynjot ïa ki nong Assyria

²⁴ U Trai Badonbor Baroh u la smai ka jingsmai: “Kaei kaba nga la thmu kan jia. Kaei kaba nga la kut jingmut ban leh yn pyndep.

²⁵ Ngan pynjot ïa ki nong Assyria ha ka ri Israel jong nga bad ngan kyrdem halor jong ki lumbah jong nga. Ngan pyllaitluid ïa ki briew jong nga na ka lyngkor jong ki nong Assyria bad na ki jingkit kiba ki don ban bah.

²⁶ Kane ka dei ka jingthmu jong nga ïa ka pyrthei, bad ka ïa ka kti jong nga la kner ban pynshitom ïa ki jaitbynriew.”

²⁷ U Trai Badonbor Baroh u la kut jingmut ban leh ïa kane, u la kner ïa la ka kti ban pynshitom, bad ym don mano mano ba lah ban pynsangeh ïa u.

U Blei un pynjot ïa ki Philistia

²⁸ Kane ka dei ka khubor ïa kaba la pynbna ha ka snem kaba u Syiem Ahas u la ïap.

²⁹ Ko ki briew ka Philistia, u dieng uba la tied ïa phi u la kheiñ, hynrei phim don kano kano ka daw ban shadkmen. Haba uwei u bseiñ u ïap, uwei pat uba kham sniew u wan ha ka jaka jong u. Ka pylleng bseiñ ka pynmih ïa u Ïakjakor uba her.

³⁰ U Trai un long u nongaplangbrot ïa kiba duk jong ki briew jong u bad un shah ïa ki ban shong ha ka jingshngain. Hynrei un phah ïa ka 'nemsniew kaba shyrkhei ha phi ki Philistia, bad un ym pynsah im ïa uno uno ruh na phi.

³¹ To ud bad to kyang ban ïoh jingïarap, phi baroh ki nongbah ka Philistia! To sngewshyrkhei, phi baroh! U lyoh pui pui u wan na ka phang bashatei — u long ka kynhun shipai bym don ki khawpud hapoh ka kyrdan jong ka.

³² Kumno ngin jubab ïa ki nonglamktien kiba wan sha ngi na ki Philistia? Ngin ïathuh ïa ki ba U Trai u la seng nongrim ïa ka Seïon bad ba ki briew jong u kiba shahshitom kin shem ka jingshngain hangta.