ISAÏAH 13 - Khasi CL Bible (BSI)

U Blei un pynshitom ïa ka Babilon

¹ Kane ka dei ka khubor shaphang ka Babilon, kaba u Isaïah u khun jong u Amos u la ïohpdiang na U Blei.

² Halor u lum uba syllen to pynïeng ïa ka lama thma! To pyrta ïa ki shipai bad rah ïa ka kti jong me kum ka dak ïa ki ban tur ïaleh ïa ki khyrdop jong ka nongbah kaba sarong.

³ U Trai u la khot ïa ki shipai jong u kiba sarong bad kiba sngewskhem ban ïaleh ïa ka thma bakhuid bad ban pynshitom ïa kito kiba u bitar.

⁴ Shahshkor ïa ka jingriew halor jong u lumbah — ka jingsawa jong u paidbah byllien, ka jingsawa jong ki jaitbynriew bad ka jingïalumlang jong ki hima. U Trai jong ki nongïapom u la pynkhreh ïa ki shipai jong u na ka bynta ka thma.

⁵ Ki ïawan na ki ri kiba jngai bah ha kiba kut ka pyrthei. Ha ka jingbitar jong u, U Trai u wan ban pynjot ïa ka ri baroh kawei.

⁶ To ud ha ka jingpang! Ka sngi ka jong U Trai ka la hajan, ka sngi ha kaba U Badonbor Baroh u wallam ka jingpynjot.

⁷ Ki kti jong uwei pa uwei kin noh kyrwep, bad ka jingshlur jong uwei pa uwei kam lah kyrda.

⁸ Ki baroh kin shah pynshyrkhei, bad ka jingpang kan ban ïa ki, kum ka jingpang jong ka briew ha ka por suh kha. Kin ïakhmih iwei ïa iwei pat ha ka jingtieng, bad ki durkhmat jong ki kin pluh da ka jinglehrain.

⁹ Ka sngi ka jong U Trai ka wan — kata ka sngi barunar jong ka jingbitar bashyrkhei bad bashla jong u. Ïa ka pyrthei yn pynlong ka ri khlaw, bad ïa uwei pa uwei u nongpop yn pynjot thiaw.

¹⁰ Uwei pa uwei u khlur bad kawei pa kawei ka thup khlur kin sangeh ban tyngshaiñ, ka sngi kan long kaba dum haba ka mih, bad u bnai un ym ai kano kano ka jingshai.

¹¹ U Trai u ong, “Ngan wallam ka jingpynjot halor ka pyrthei bad ngan pynshitom ïa ki riewbymman baroh namar ki pop jong ki. Ngan pyndem ïa uno uno uba sarong bad ngan pynshitom ïa uno uno uba sngewmeng bad uba runar.

¹² Kito kiba lait im kin kham ñiar ban ïa ka ksiar.

¹³ Ngan pynlong ïa ki bneng ban khynñiuh bad ïa ka khyndew yn pynkhih shabar na ka jaka jong ka ha kata ka sngi ha kaba ma nga, U Trai Badonbor Baroh, nga pyn-i ïa ka jingbitar jong nga.

¹⁴ “Ki nongwei kiba shong ha Babilon kin phet krad sha la ki jong ki ri, ki da sakma kum ki skei kiba lait phet na ki nongbeh mrad, kum ki langbrot khlem u nongsharai.

¹⁵ Ïa uno uno uba shah kem yn dung pynïap.

¹⁶ Katba ki dang khmih ha ka jingbymlah leh ei ei, ïa ki khunlung jong ki yn tied pynïap, ïa ki ïing jong ki yn lute, bad ïa ki tnga jong ki yn batbor.”

¹⁷ U Trai u ong, “Nga pynkhih ïa ki Mid ban tur ïaleh ïa ka Babilon. Kim salia ïa ka rupa bad kim shah pynshoi da ka ksiar.

¹⁸ Da ki ryntieh bad ki khnam jong ki, kin pynïap ïa samla shynrang. Kin ym pyn-i jingisynei ïa ki khunlung bad kin ym sngewsynei ïa ki khynnah.

¹⁹ Ka Babilonia ka dei ka hima kaba itynnat tam na baroh, ka dei ka jingsngew sarong jong ki briew jong ka. Hynrei ma nga, U Trai, ngan pynkhyllem ïa ka Babilon kumba nga la leh ïa ka Sodom bad ka Gomorrah!

²⁰ Yn ym don mano mano ban shong pat ha ka da lei lei. Ym don u nong Arab uba ïaid sakma u ban pynïeng ka ïingjaiñ hangta bad ym don uno uno u nongaplangbrot u ban ïalam pynbamphlang ïa ka kynhun langbrot hangta.

²¹ Kan long ka jaka ha kaba ki mrad ka ri shyiap kin shong bad ki dkhoh kin shna ïa ki skum jong ki. Ki Ostrit kin shong hangta, bad ki blang khlaw kin ïaid sarong lyngba ki jingjot jingpra.

²² Ki mot bad ki ïingsyiem kin sawa da ki jingpah jong ki haïena bad ki myrsiang. Ka por jong ka Babilon ka la wan! Ki sngi jong ka ki la jan kut.”