ISAÏAH 12 - Khasi CL Bible (BSI)

Ka jingrwai ainguh

¹ Ka sngi ka wan ha kaba ki briew kin rwai, “Nga ïaroh ïa me A Trai! Me la bitar ïa nga, hynrei mynta me pyntngen ïa nga bad mem bitar shuh ïa nga.

² U Blei u long u nongpynim jong nga; ngan shaniah ïa u bad ngan ym sheptieng. U Trai u ai ha nga ka bor bad ka jingkhlaiñ, u long u nongpynim jong nga.

³ Kumba ka um kaba sngur ka wanrah jingkmen ïa uba sliang, kumta ki briew jong U Blei kin shadkmen haba u pyllait im ïa ki.”

⁴ Ka sngi ka wan ha kaba ki briew kin rwai, “To ainguh ïa U Trai! To khot kyrpad ïa u ban ïarap ïa phi! Ïathuh ha ki jaitbynriew baroh ïa kaei kaba u la leh! Ïathuh ïa ki haduh katno u long uba khraw!

⁵ To rwai ha U Trai namar kiei kiei kiba khraw kiba u la leh. Ai ba ka pyrthei baroh kawei kan ïohsngew ïa ka khubor.

⁶ Ai ba uwei pa uwei uba shong basah ha Seïon un pyrta bad un rwai! U Blei bakhuid jong ka Israel u long uba khraw, bad u shong hapdeng ki briew jong u.”