ISAÏAH 11 - Khasi CL Bible (BSI)

Ka Hima kaba don jingsuk

¹ Ka pateng longsyiem jong u Dabid ka long kum u dieng ba la khet; hynrei kumba ki tnat bathymmai ki khie lung na ka dyngkhong, kumta u syiem bathymmai un mih napdeng ki khun ki ksiew jong u Dabid.

² U Mynsiem jong U Trai un ai ha u ka jingstad bad ka jingtip bad ka jingtbit ban synshar ïa ki briew jong u. Un tip ïa ka mon jong U Trai bad un pyndonburom ïa u,

³ bad un shem jingsngewbha ha kaba kohnguh ïa u. Un ym bishar da kaba paw shabar lane da kaba shu ïohsngew pateng,

⁴ un bishar hok ïa kiba duk bad un ïada ïa ki hok jong ki bymdonbor. Ha ka hukum jong u, yn pynshitom ïa ki briew, bad ki briew basniew kin ïap.

⁵ Un synshar ïa ki briew jong u da ka jingbishar hok bad da ka jinglong skhem.

⁶ Ki suri bad ki langbrot kin ïa-im lang ha ka jingsuk, bad ki 'labasa kin ïadem lang bad ki khunblang. Ki khun masi bad ki khun sing kin ïabam lang, bad ki khynnah rit kin sumar ïa ki.

⁷ Ki masi bad ki dngiem kin ïabam lang, bad ki khun jong ki kin ïadem lang ha ka jingsuk. Ki sing kin ïabam phlangïap kumba bam ki masi.

⁸ Wat ïa i khunlung yn ym pynmynsaw lada i ïalehkai hajan u bseiñ uba don bih.

⁹ Halor u Lum Seïon, u lum uba kyntang jong U Blei, yn ym don kano kano kaba pynmynsaw lane kaba sniew. Ka ri kan shlei da ka jingtip ïa U Trai kumba ki duriaw ki dap da ka um.

Ki briew kiba shah ringmraw kin wan phai

¹⁰ Ka sngi ka wan ha kaba u syiem bathymmai na ka longïing syiem jong u Dabid un long ka dak ka shin ïa ki jaitbynriew. Kin ïalumlang ha ka nongbah ba kynja syiem jong u bad ai ka jingpyndonburom ïa u.

¹¹ Haba kata ka sngi ka wan, U Trai sa shisien pat un pyndonkam ïa ka bor jong u bad un wallam pat sha ïing ïa kito kiba na ki briew jong u kiba la shah iehnoh ha Assyria bad Ijipt, ha ki ri jong ka Pathros, ka Sudan, ka Elam, ka Babilonia bad ka Hamath, bad ha ki rud duriaw bad halor ki dewlynnong jong ki duriaw.

¹² U Trai un kyntiew ïa ka lama ai dak ban pyn-i ïa ki jaitbynriew ba u lumlang sa shisien ïa ki briew jong ka Israel bad Judah kiba la shah pynsaphriang bad u wallam pat ïa ki na ki sawdong jong ka pyrthei.

¹³ Ka hima Israel kan ym bishni shuh ïa ka Judah, bad ka Judah kan ym long shuh ka nongshun jong ka Israel.

¹⁴ Ryngkat lang kin tur ïaleh ïa ki Philistia ha ka phang sepngi bad lute ïa ki briew kiba shong ha ka phang mihngi. Kin hiarthma ïa ki briew jong ka Edom, bad ka Moab, bad ki briew jong ka Ammon kin kohnguh ïa ki.

¹⁵ U Trai un pynrngad ïa ka Sues, ka khmut duriaw, bad un wallam ka lyer khluit ban pynrngad ïa ka Ïuphratis, da kaba iehnoh ïa ki hynñiew tylli ki wahduid, khnang ba uno uno u lah ban ïaid sha shiliang.

¹⁶ Kan don ka surok bah shabar jong ka Assyria na ka bynta kito kiba ki briew jong u ki Israel kiba dang im hangta, kumba ka la don ïa ki kpa tymmen jong ki haba ki la iehnoh ïa ka Ijipt.