ISAÏAH 10 - Khasi CL Bible (BSI)

¹ Phi long ba la tim! Phi thaw ïa ki aiñ bymhok ban banbeiñ ïa ki briew jong nga.

² Kata ka long kumno ba phi khang ïa kiba duk na kaba ïohpdiang ïa ki hok jong ki bad na kaba ïohpdiang ïa ka jingbishar hok. Kata ka long kumno ba phi knieh ïa ka jingdon jingem kaba dei jong ki riewkynthei bad ki khunswet.

³ Kaei phin leh haba U Blei u pynshitom ïa phi? Kaei phin leh haba u wallam ka jingpynjot halor jong phi na ka ri bajngai? Shano phin mareh ban shem jingïarap? Hangno phin buhrieh ïa ka spah jong phi?

⁴ Phin shah pynïap ha ka thma lane phin shah paring kum ki koidi. Pynban wat la katta ruh, ïa ka jingbitar jong U Trai yn ym pynkut; ka kti jong u kan dang ïai kner ban pynshitom.

U Patsha jong ka Assyria kum u atiar jong U Blei

⁵ U Trai u ong, “Ko Assyria! Nga pyndonkam ïa ka Assyria kum u dieng tangon ban pynshitom ïa kito kiba nga bitar.

⁶ Nga la phah ïa ka Assyria ban tur ïaleh ïa ka jaitbynriew bym don blei, ki briew kiba la pynbitar ïa nga. Nga la phah ïa ki ban lute, ban tuh bad ban ïuhroit ïa ki briew kum ïa u pui pui ha ki lynti.”

⁷ Hynrei u patsha jong ka Assyria u don ha ka jingmut ïa ki jingthmu jong u ban leh jubor. U la kut jingmut ban pynjot thiaw ïa shibun ki jaitbynriew.

⁸ U kob sarong, “Uwei pa uwei na ki rangbah ai hukum jong nga u dei u syiem!

⁹ Nga la hiarthma ïa ki nongbah jong ka Kalno bad Karkhemish, ki nongbah jong u Hamath bad u Arpad. Nga la hiarthma ïa ka Samaria bad ïa ka Damaskos.

¹⁰ Nga la kner ïa la ka kti ban pynshitom ïa kito ki hima kiba mane bleithaw, ki bleithaw kiba kham bun ban ïa kito ki jong ka Jerusalem bad ka Samaria.

¹¹ Nga la pynjot ïa ka Samaria bad ïa ki bleithaw jong ka baroh, bad ngan leh kumjuh ïa ka Jerusalem bad ïa ki bleithaw ba la mane hangta.”

¹² Hynrei U Trai u ong, “Haba nga pyndep ïa kaei kaba nga leh halor u lum Seïon, ngan pynshitom ïa u patsha jong ka Assyria namar ki jingkob bad ki jingsarong jong u baroh.”

¹³ U patsha jong ka Assyria u kob, “Nga la leh ïa ka baroh da lade hi. Nga long uba khlaiñ, uba stad bad uba sian. Nga la pyndam lut ïa ki pud hapdeng ki hima bad nga la shim ïa ki jingbam kiba ki la kynshew. Kum u masi kyrtong nga la ïuhroit ïa ki briew kiba shong basah hangta.

¹⁴ Ki hima jong ka pyrthei ki long kum ka skum sim, bad nga la lum da kaba suk ïa ka spah jong ki kumba lum ïa ki pylleng. Ym don ka thapniang ba khaweh ban pynsheptieng ïa nga; lane kano kano ka shyntur sim kaba la ang ban lynñiar ha nga!”

¹⁵ Hynrei U Trai u ong, “Hato u sdie un kam ba u kham khraw ban ïa uta uba pyndonkam ïa u? Hato ka kurat ka long kaba kham donkam ban ïa uta uba tar da ka? U dieng tangon um rah ïa u briew; u briew u rah ïa u dieng tangon.”

¹⁶ U Trai Badonbor Baroh un phah ka jingpang ban pynshitom ïa kito kiba la bsa bha mynta. Ha ki met jong ki yn don ka ding kaba pluh bad ïai pluh.

¹⁷ U Blei, u jingshai jong ka Israel, un kylla long ka ding. U Blei uba khuid jong ka Israel un kylla long ka thylliej ding, kaba ha ka shi sngi kan thang lut ïa kaei kaei baroh, wat ïa ki shiah bad ki shiah buid.

¹⁸ Ïa ki khlaw barben bad ïa ki jaka rep yn pynjot lut thiaw, ha kajuh ka rukom ba ka jingpang bashyrkhei ka pynjot ïano ïano.

¹⁹ Yn don tang khyndiat eh ki dieng kiba sah kiba wat i khunlung in lah ban ñiew ïa ki.

Khyndiat ngut kin wan phai

²⁰ Ka por ka poi ha kaba ki paid Israel kiba la lait im kin ym shaniah shuh ha ka jaitbynriew kaba la jan pynjot thiaw ïa ki. Da shisha kin buh ka jingshaniah jong ki ha U Trai, U Blei bakhuid jong ka Israel.

²¹ Khyndiat ngut ki paid Israel kin wan phai sha U Blei bakhlaiñbor jong ki.

²² Wat la mynta ki don bun ki paid Israel kumba don ki symboh shyiap harud ka duriaw, tang khyndiat ngut ki ban wan phai pat. La pynap ïa ka jingpynjot na ka bynta ki briew, bad ka long kaba dei ban ïoh pura.

²³ Ho-oid ha kylleng jong ka ri baroh kawei U Trai U Nongsynshar Badonbor Baroh un wallam ka jingpynjot, kumba u la ong ba un leh.

U Trai un pynshitom ïa ka Assyria

²⁴ U Trai U Nongsynshar Badonbor Baroh u ong ha ki briew jong u kiba shong basah ha Seïon, “Wat sheptieng ïa ki nong Assyria, wat haba ki banbeiñ ïa phi kumba ki nong Ijipt ki la ju leh.

²⁵ Tang hapoh khyndiat por ngan pyndep ban pynshitom ïa phi, bad nangta ngan pynjot ïa ki.

²⁶ Ma nga, U Trai Badonbor baroh, ngan sympat ïa ki da u shabuk jong nga kumba nga la sympat ïa ki briew jong ka Midian ha u Mawsiang Oreb. Ngan pynshitom ïa ka Assyria kumba nga la pynshitom ïa ka Ijipt.

²⁷ Haba kata ka por ka wan, ngan pyllaitluid ïa phi na ka bor jong ka Assyria, bad ka lyngkor jong ki kan ym long shuh ka jingbankhia halor ki tyrpeng jong phi.”

Ki nonghiarthma ki tur ïaleh

²⁸ Ka kynhun shipai nongshun ka la kurup ïa ka nongbah jong ka Ai! Ki la ïaid lyngba ïa ka Migron! Ki la iehnoh ïa ki bam jong ki ha Mikhmash!

²⁹ Ki la jam sha shiliang ïa ka khim bad ki la pynlut ïa ka miet ha Geba! Ki briew ha ka shnong Ramah ki la sngewshyrkhei, bad ki briew jong ka Gibeah ka shnong trai jong u Syiem Saul, ki la phet krad.

³⁰ To pyrta, ko ki briew jong ka Gallim! To shahshkor, ko ki briew jong ka Laishah! To jubab, ko ki briew jong ka Anathoth!

³¹ Ki briew jong ka Madmenah bad ka Gebim ki ïaphet ban lait im.

³² Mynta ki nongshun ki don ha ka shnong jong ka Nob, hangta ki pynkhih ïa ki jingkham jong ki kti jong ki ïa u Lum Seïon, ïa ka nongbah Jerusalem.

³³ U Trai Badonbor Baroh un wallam ïa ki bad pynhap shapoh kum ki tnat dieng ba la khet na u dieng. Ïa kiba sarong eh bad kiba kynjang tam jong ki yn khet bad yn pynjahburom.

³⁴ U Trai un khet ïa ki kumba ïa ki dieng hapdeng ka khlaw la khet da u sdie, bad wat ki dieng kiba kynsai tam jong ka Lebanon ki kyllon!