ISAÏAH 1 - Khasi CL Bible (BSI)

¹ Kane ka kitab ka don ki khubor shaphang ka Judah bad ka Jerusalem kaba U Blei u la pynpaw ha u Isaïah u khun jong u Amos ha ka por ha kaba u Ussaïah, u Jotham, u Ahas bad u Hesekaïah ki long ki syiem ka Judah.

U Blei u sneng ïa ki briew jong u

² U Trai u ong, “Ko ka pyrthei bad ka sahit bneng, shahshkor ïa kaei kaba nga ong! Ki khun kiba nga la pynheh pynsan ki la ïeng ïaleh pyrshah.

³ Ki jingri ki tip mano ba long trai ïa ki, bad ki kada ki tip hangno u kynrad jong ki u bsa ïa ki. Hynrei kata ka kham bun ban ïa kaba ki briew jong nga ki Israel ki tip. Kim shemphang ei ei.”

⁴ Phi long ba la tim, phi ka jaitbynriew bapop, phi ki riew jakhlia bad bymman! Ki pop jong phi ki tan ïa phi sha trai. Phi la kyntait ïa U Trai, U Blei bakhuid jong ki Israel, bad phi la pynphai ïa la ki ingdong sha u.

⁵ Balei phi ïai ïeng ïaleh pyrshah ïa u? Hato phi kwah ban shah pynshitom kham palat shuh shuh? Ko Israel, ka khlieh jong phi ka la shah tap lypa da ki jingmong, bad ka dohnud bad jingpyrkhat jong phi ki pang.

⁶ Naduh khlieh haduh kjat ym don kano kano ka bynta kaba khiah halor ka met jong phi. La tap ïa phi da ki jingjngem, ki prum bad ki jingmong ba-lhieh. Ïa ki jingmong jong phi ym shym la pynkhuid lane sop spaiñ. Ym shym la tah dawai ei ei ha ki.

⁷ Ïa ka ri jong phi la pynjot thiaw, ïa ki nongbah la thang duh da ka ding. Katba phi dang khmih, ki nongwei ki kurup ïa ka ri jong phi bad ki pynpra ïa kiei kiei baroh.

⁸ Tang ka Jerusalem hi kaba dang sah, ka nongbah hapoh ka jingshah kerkut — ka bym don jingïada kum ka trep ap phira ha ka bri sohwaiñ lane ka sem ha ka lyngkha sohkhia.

⁹ Lada U Trai Badonbor Baroh um shym ailad ïa ki katto katne ki briew ban lait im, yn jin da la pynjot hi thiaw ïa ka Jerusalem, kumba long ïa ka Sodom bad Gomorrah.

¹⁰ Ko Jerusalem, ki nongsynshar bad ki briew jong pha ki long kum ki jong ka Sodom bad Gomorrah. To shahshkor ïa kaei kaba U Trai u ong ïa pha. Pynleit jingmut ïa kaei kaba U Blei jong ngi u hikai ïa pha.

¹¹ U ong, “Hato pha pyrkhat ba nga kwah ïa ki jingkñia baroh kiba pha ïai ai ïa nga? Nga la ngiah shoiñ ïa ki langbrot kiba pha thang kum ki jingkñia bad ïa ki khleiñ jong ki jingri kiba bha tam jong pha. Nga la jlep ïa ka snam jong ki masi lyngraw bad ki langbrot bad ki blang.

¹² Mano ba la ong ïa pha ban wallam ha nga ïa kane baroh haba pha wan mane ïa nga? Mano ba la ong ïa pha ban leh ïa kane ka jingïaid kyrdem sawdong ha ka templ jong nga?

¹³ Ka long ka bymmyntoi ban wallam ïa ki jingainguh jong pha. Nga la sngewjli da ka jingiw jong ka jingiwbih ba pha thang. Ngam lah shah ïa ki Jingkhawai Niam Bnai Thymmai jong pha, ïa ki Sabbaton jong pha bad ïa ki jingïaseng jong pha; la pyntngit ïa ki baroh da ki pop jong pha.

¹⁴ Nga isih ïa ki Jingkhawai Niam Bnai Thymmai jong pha bad ïa ki sngi bakhuid; ki long ki jingkit bakhia kiba nga la thait ban kit.

¹⁵ “Haba pha rah ïa la ki kti ha ka jingduwai, ngan ym khmih ïa pha. Kam pher haduh katno pha duwai, ngan ym shahshkor, namar ïa ki kti jong pha la tap da ka snam.

¹⁶ To sait pynkhuid ïa lade. Pynsangeh ïa kane ka jingsniew baroh kaba nga ïohi ba pha leh. Ho-oid ban leh ïa kaba sniew

¹⁷ bad to nang ban leh ïa kaba dei. Khmih ba yn leh ïa ka jingbishar hok — ïarap ïa kito kiba shah banbeiñ, ai ha ki khunswet ïa ki hok jong ki, bad ïada ïa ki riewkynthei.”

¹⁸ U Trai u ong, “Mynta, to ngin pynbeit ïa kane ka kam. Pha la khah saw da ka pop, hynrei ngan sait ïa pha ban khuid kum ka ïor. La ki jingkhah tngit jong pha ki saw hain hain, phan lieh kum u shñiuh langbrot.

¹⁹ Lada phan tang shu kohnguh ïa nga, phan bam ïa kiei kiei kiba bha kiba ka khyndew ka pynmih.

²⁰ Hynrei lada pha leh pyrshah ïa nga, pha long kaba la shah tim ban ïap. Ma nga, U Trai, nga la kren.”

Ka nongbah bapop

²¹ Ka nongbah kaba shisien ka la long kaba lah ban shaniah ka la leh kum ka nuti! Ha kawei ka por ka la dap da ki rangbah bahok, hynrei mynta ki sah tang ki nongpynïap briew.

²² Ko Jerusalem, shisien pha la long kum ka rupa, hynrei mynta pham dondor ei ei; pha la long kum ka waiñ babha, hynrei mynta pha long tang ka um.

²³ Ki nongïalam jong pha ki long ki nongïaleh pyrshah bad ki paralok jong ki nongtuh; ki ju pdiang ïa ki jingai sngewbha bad ïa ki jingai tyngka bymdei. Kim ju ïada ïa ki khunswet ha ka ïingbishar lane shahshkor haba ki riewkynthei ki kren ïa ka kam jong ki.

²⁴ Kumta mynta, to shahshkor ïa kaei kaba U Trai Badonbor Baroh, U Blei badonbor jong ka Israel, u ong, “Ngan pynhiarkput halor jong pha, ko nongshun jong nga, bad phan ym pynjynjar shuh ïa nga.

²⁵ Ngan trei pyrshah ïa pha. Ngan pynkhuid ïa pha kumba pynkhuid ïa ka nar, bad ngan weng ïa ka jingbymkhuid jong pha baroh.

²⁶ Ngan ai ha pha ki nongsynshar jong pha bad ki nongai jingmut kum kito kiba pha ju don slem bah mynshuwa. Nangta ïa ka Jerusalem yn khot ka nongbah bahok, baïaineh.”

²⁷ Namar ba U Trai u long uba hok, un pyllait im ïa ka Jerusalem bad ïa uwei pa uwei uba kylla-kaba-mut.

²⁸ Hynrei un pynlwet ïa uwei pa uwei uba leh pop bad uba ïaleh pyrshah ïa u; un pynïap ïa uwei pa uwei uba la iehnoh ïa u.

²⁹ Phin sngewsih ba phi la ju mane ïa ki dieng bad thung ki kper kyntang.

³⁰ Phin jlop kum u dieng Sning baïap, kum ka kper bym don um.

³¹ Kumba u skum u kem ding da i phylliah ding, kumta ïa ki rangbah badonbor yn pynjot da ki kam sniew jong ki hi, bad ym don mano mano ba lah ban pynsangeh ïa ka jingpynjot.