ÏOANNIS 9 - Khasi CL Bible (BSI)

U Jisu u pynkhiah ïa u briew ba la kha matlah

¹ Katba U Jisu u dang ïaid artat, u la ïohi ïa u briew ïa uba la kha matlah.

² Ki synran jong u ki la kylli ïa u, “Ko Nonghikai, ka pop jongno kaba la pynlong ïa u ban kha matlah? Hato ka dei ka pop jong u hi ne ka jong ki kmie ki kpa jong u?”

³ U Jisu u la jubab, “Ka jingmatlah jong u kam don ei ei bad ki pop jong u ne ki pop jong ki kmie ki kpa jong u. U la long matlah khnang ban ïohi ba ka bor jong U Blei ka trei ha u.

⁴ Katba ka dang don ka sngi, ngi dei ban trei ïa ka kam jong uta uba la phah ïa nga; ka miet ka wan haba ym don uba lah ban trei.

⁵ Katba nga dang don ha ka pyrthei, nga long ka jingshai ïa ka pyrthei.”

⁶ Hadien ba u la ong ïa kane, U Jisu u la biah ha ka khyndew bad u la khleh ktieh da ka umbiah; u la kyllan da ita i sboh ktieh ha ki khmat uta u briew bad u la ong,

⁷ “To khie leit bad bta ïa ka khmat jong me ha ka Pung Siloam.” (Kane ka kyrteng ka mut “Ba la phah.”) Kumta uta u briew u la leit, u la bta ïa la ka khmat, bad u la wan phai uba imat pat.

⁸ Ki paramarjan jong u, te, bad ki briew kiba la ïohi ïa u mynshuwa ba u ju khrong, ki la kylli, “Hato une um dei uto u briew uba ju shong khrong?”

⁹ Don kiba la ong, “U dei ma u,” hynrei kiwei ki la ong, “Em, um dei ma u, u shu ïasyriem ïa u.” Kumta uta u briew hi u la ong, “Dei ma nga uta u briew!”

¹⁰ “Kumno ka lah ban long ba mynta me lah ban imat pat?” ki la kylli ïa u.

¹¹ U la jubab, “U briew ïa uba la khot U Jisu u la pynlong ïa i sboh ktieh, u la kyllan ha ki khmat jong nga, bad u la ong ha nga ban leit sha Siloam bad bta ïa ka khmat jong nga. Kumta nga la leit, bad tang mar ïa-bta khmat, nga la lah ban imat.”

¹² “Hangno u don?” ki la kylli. “Ngam tip,” u la jubab.

Ki Pharisi ki jurip ïa kata ka jingpynkhiah

¹³ Nangta ki la ïalam sha ki Pharisi ïa uta u briew uba la ju long uba matlah.

¹⁴ Ka sngi ha kaba U Jisu u la khleh ïa ka ktieh bad U la pynkoit ïa u na ka jingmatlah jong u ka la dei ha ka sngi Sabbaton.

¹⁵ Ki Pharisi, te, ki la kylli biang ïa uta u briew kumno u la ïoh imat pat. U la ïathuh ïa ki, “U la tah khyndiat ka ktieh ha ki khmat jong nga; nga la bta khmat, bad mynta nga la imat.”

¹⁶ Don ki Pharisi kiba la ong, “Uta u briew uba la leh ïa kane um lah ban long na U Blei, naba um shym kohnguh ïa ka hukum Sabbaton.” Hynrei, kiwei pat, ki la ong, “Kumno u briew uba long u nongpop u lah ban leh kum kita ki kambah kat kine?” Bad ka la don ka jingïapait hapdeng jong ki.

¹⁷ Kumta ki Pharisi ki la kylli ïa uta u briew sa shisien, “Me ong u la pynkoit ïa me na ka jingmatlah jong me — haba kumta, me ong aïu shaphang jong u?” “U dei u nongïathuhlypa,” uta u briew u la jubab.

¹⁸ Ki nongsynshar jong ki Jiw, pynban, kim mon ban ngeit ba une u briew u la long uba matlah bad mynta u la lah ban imat pat, tad ynda ki la khot ïa ki kmie ki kpa jong u bad kylli na ki,

¹⁹ “Hato une u dei u khun jong phi? Phi ong ba la kha matlah ïa u; te kumno pat mynta u la imat?”

²⁰ Ki kmie ki kpa jong u ki la jubab, “Ngi tip ba u dei u khun jong ngi, bad ngi tip ba la kha matlah ïa u.

²¹ Hynrei ngim tip kumno pat ba mynta u la ïoh imat, lymne ngim tip mano ba la pynkoit ïa u na ka jingmatlah jong u. Kylli ïa u; u la biang ka rta, bad u lah ban jubab da lade hi!”

²² Ki kmie ki kpa jong u ki la ong ïa kane namar ba ki la sheptieng ïa ki nongsynshar jong ki Jiw, kiba la lah mynjur lypa ba uno uno uba ong ba u ngeit ba U Jisu u long U Messaïah un shah beh noh na ka synagog.

²³ Dei na kata balei ba ki kmie ki kpa jong u ki la ong, “U la biang ka rta; to kylli ïa u!”

²⁴ Ha ka sien kaba ar ki la khot biang ïa uta u briew ïa uba la kha matlah, bad ki la ong ha u, “To kular ha khmat U Blei ba men ïathuh ïa ka jingshisha! Ngi tip ba une u briew uba la pynkoit ïa me u dei u nongpop.”

²⁵ “Ngam tip la u dei u nongpop ne um dei,” uta u briew u la phai ktien. “Tang ïa kane kawei nga tip: Nga la long uba matlah, bad mynta nga la imat.”

²⁶ “U la leh aïu ïa me?” ki la kylli. “Kumno u la pynkoit ïa me na ka jingmatlah jong me?”

²⁷ “Nga la dep ïathuh ïa phi,” u la jubab, “bad phim shym la shahshkor. Balei ba phi kwah ban ïohsngew biang ïa ka? Lehse ma phi, ruh, phi kwah ban long ki synran jong u?”

²⁸ Ki la tim ïa u bad ki da ong, “Me long u synran jong une u briew: Hynrei, ngi long ki synran u Moses.

²⁹ Ngi tip ba U Blei u la kren ha u Moses; katba ïa une u briew, te, ngim tip wat nangno u wan!”

³⁰ Uta u briew u la jubab, “Kata te kaba da phylla! Phim tip nangno u wan, hynrei u la pynkoit ïa nga na ka jingmatlah jong nga!

³¹ Ngi tip ba U Blei um ju shahshkor ïa ki nongpop; u shahshkor ïa ki briew kiba burom ïa u bad ba leh ïa kaei kaba u kwah ïa ki ban leh.

³² Naduh myn dang long ka pyrthei ym pat don mano mano ba la ïohsngew ba uno uno u ai jingïoh imat pat ïa u briew uba la kha matlah.

³³ Lymda une u briew u la wan na U Blei, un ym lah ban leh ïa kaba kum kane.”

³⁴ Ki la jubab, “La kha bad la pynsan ïa me hapoh ka pop — bad me pyrshang ban hikai ïa ngi?” Bad kumta ki la beh noh ïa u na ka synagog.

Ka jingmatlah ba kynja mynsiem

³⁵ Haba U Jisu u la ïohsngew ïa kaei kaba la jia, u la shem ïa uta u briew bad u la kylli ïa u, “Hato me ngeit ha U Khun U Briew?”

³⁶ Uta u briew u la jubab, “To ïathuh ïa nga u dei uei, ko Kynrad, khnang ba ngan lah ban ngeit ha u!”

³⁷ U Jisu u la ong ha u, “Me la lah ïohi ïa u, bad u dei uta uba ïakren bad me mynta.”

³⁸ “Nga ngeit, ko Trai!” uta u briew u la ong, bad u la dem khohsiew ha khmat U Jisu.

³⁹ U Jisu u la ong, “Nga la wan sha kane ka pyrthei ban bishar, khnang ba kiba matlah kin ïohi bad kito kiba ïohi kin long matlah.”

⁴⁰ Katto katne ngut na ki Pharisi kiba ïadon hangta lem bad u ki la ïohsngew ïa u ba u ong ïa kane bad ki la kylli ïa u, “Da shisha mem mut ba ngi ruh ngi matlah?”

⁴¹ U Jisu u la jubab, “Lada phi la long kiba matlah, te phin ym long kiba la shah pynrem; hynrei naba phi kam ba phi ïohi, kane ka mut ba phi dang don ha ka jingpynrem.”