ÏOANNIS 8 - Khasi CL Bible (BSI)

Ka briew ïa kaba la kem ha ka klim

¹ Nangta uwei pa uwei u la leit phai sha ïing, hynrei U Jisu u la leit sha u lum ki Olib.

² Dang step phyrngab ha ka sngi kaba bud u la leit phai sha ka Templ. Baroh ki briew ki la ïalum sawdong jong u, bad u la shong bad u la sdang ban hikai ïa ki.

³ Ki nonghikai ka Hukum bad ki Pharisi ki la wallam ïa ka briew kaba ki la ïohkem ha ka jingklim, bad ki la pynïeng ïa ka ha khmat jong ki baroh.

⁴ “Ko Nonghikai,” ki la ong ïa U Jisu, “ïa kane ka briew la kem ha ka jingleh hi ha kaba klim.

⁵ Ha ka Hukum jong ngi, u Moses u la hukum ba kaba kum kata ka briew ka dei ban shah lynthem maw haduh ban da ïap. Mynta, me ong kumno?”

⁶ Ki la ong ïa kane ban riam ïa U Jisu, khnang ba ki lah ban mudui ïa u. Hynrei u la dem sha khyndew bad u la thoh ha madan da la ka shympriah kti.

⁷ Katba ki dang ïeng hangta bad kylli jingkylli ïa u, u la ïeng joit bad u la ong ha ki, “Uno uno na phi u bym shym la leh pop to ai ba un lynthem ïa u maw uba nyngkong ha ka.”

⁸ Nangta u la dem biang sha khyndew bad u la thoh ha madan.

⁹ Haba ki la ïohsngew ïa kane, baroh ki la phet, uwei hadien uwei, nyngkong kiba kham rangbah. U Jisu u la sah marwei, lem bad kata ka briew kaba shu ïeng hangta.

¹⁰ U la ïeng joit bad u la ong ïa ka, “Shano ki don? Hato ym don uno uno uba dang sah ban pynrem ïa pha?”

¹¹ “Uwei ruh em, ko Kynrad,” ka la jubab. “Haba kumta te,” U Jisu u la ong, “nga ruh ngam pynrem ïa pha. Khie leit, hynrei wat leh pop shuh.”]

U Jisu u long ka Jingshai jong ka Pyrthei

¹² U Jisu u la kren biang ha ki Pharisi. “Nga long ka Jingshai jong ka Pyrthei,” u la ong. “Uno uno uba bud ïa nga un ïoh ïa ka jingshai jong ka jingim bad da lei lei un ym ïaid ha ka jingdum.”

¹³ Ki Pharisi ki la ong ïa u, “Mynta me phla da lade na ka bynta ïa lade; kaei kaba me ong kam pynshisha ei ei.”

¹⁴ “Em” U Jisu u la jubab, “wat la nga phla da lade na ka bynta ïa lade, kaei kaba nga ong ka long kaba shisha, namar nga tip nangno ba nga la wan bad shano ba ngan leit. Phim tip nangno nga la wan ne shano ba ngan sa leit.

¹⁵ Phi pynlong ïa ki jingbishar kat kum ka rukom briew; ngam ai jingbishar ïano ïano ruh.

¹⁶ Hynrei lada nga dei ban leh kumta, ka jingbishar jong nga kan long kaba shisha, namar ngam long marwei ha kane; U Kpa uba la phah ïa nga u long bad nga.

¹⁷ La thoh ha ka hukum jong phi ba haba ar ngut ki sakhi ki ïamynjur, kaei kaba ki ong ka long kaba shisha.

¹⁸ Nga phla na ka bynta ïa lade, bad U Kpa uba la phah ïa nga u phla ruh na ka bynta jong nga.”

¹⁹ “Shaei uta U Kpa jong me?” ki la kylli ïa u. “Phim ithuh ïa nga lymne ïa U Kpa jong nga,” U Jisu u la jubab. “Lada phi la ithuh ïa nga, phin jin da la ithuh ïa U Kpa jong nga ruh.”

²⁰ U Jisu u la kren ïa kane baroh katba u dang hikai ha ka Templ, ha ka kamra ha kaba la buh ïa ki synduk pdiang jingainguh. Bad ym don mano mano ba la kem ïa u, namar ba ka kynta jong u kam pat poi.

Phim lah ban leit sha kaba nga leit

²¹ U Jisu u la ong biang ha ki, “Ngan leit noh; phin ïawad ïa nga, hynrei phin ïap ha ki pop jong phi. Phim lah ban leit shano sha ba ngan leit.”

²² Kumta ki nongsynshar jong ki Jiw ki la ong, “U ong ba ngim lah ban leit shano sha ba un leit. Hato kane ka mut ba un pynïap ïa lade?”

²³ U Jisu u la jubab, “Phi dei jong kane ka pyrthei kaba hangne ha tbian, hynrei nga wan najrong. Phi dei na kane ka pyrthei, hynrei ngam dei na kane ka pyrthei.

²⁴ Dei na kata ka daw nga la ïathuh ïa phi ba phin ïap ha ki pop jong phi. Bad phin ïap ha ki pop jong phi lymda phi ngeit ba ‘Nga long uba nga long’.”

²⁵ “Me dei uei?” ki la kylli ïa u. U Jisu u la jubab, “Ïa kaei kaba nga la ïathuh ha phi naduh kaba sdang.

²⁶ Nga don shibun ban ong shaphang jong phi, shibun ban ïoh pynrem ïa phi. Uta uba la phah ïa nga, pynban, u long uba shisha, bad nga ïathuh ïa ka pyrthei tang ïa kaei kaba nga la ïohsngew na u.”

²⁷ Kim shym la sngewthuh ba U Jisu u la kren ha ki shaphang U Kpa.

²⁸ Kumta u la ong ha ki, “Ynda phi la kyntiew ïa U Khun U Briew, phin sa tip ba nga ‘Nga long uba nga long’; te phin sa tip ba ngam leh ïa kaei kaei ha ka bor jong nga hi, hynrei nga ong ïa kaei kaba U Kpa u la bthah ïa nga ban ong.

²⁹ Bad uta uba la phah ïa nga u long lem bad nga; ym shym la iehnoh ïa nga marwei, namar borabor nga leh ïa kaei kaba pynsngewbha ïa u.”

³⁰ Shibun kiba la ïohsngew ïa U Jisu ba u ong ïa kine kiei kiei, ki la ngeit ha u.

Ka jingshisha kan pyllaitluid ïa phi

³¹ Kumta U Jisu u la ong ha kito kiba la ngeit ha u, “Lada phi kohnguh ïa ka jinghikai jong nga, phi long da shisha ki synran jong nga;

³² phin tip ïa ka jingshisha, bad ka jingshisha kan pyllaitluid ïa phi.”

³³ “Ngi dei kiba hiarpateng na u Abraham,” ki la jubab, “bad ngim pat ju la long ki mraw jongno jongno. Me mut aïu, te, da kaba ong, ‘Phin long kiba laitluid?’ ”

³⁴ U Jisu u la ong ha ki, “Nga ong ha phi ïa ka jingshisha: Uno uno uba leh pop u long u mraw ka pop.

³⁵ U mraw um long baroh shi rta u dkhot jong ka longïing, hynrei u khun u dei jong kata ka longïing junom la junom.

³⁶ Lada U Khun u pyllaitluid ïa phi, te phin long da shisha kiba laitluid.

³⁷ Nga tip ba phi long kiba hiarpateng na u Abraham. Pynban phi pyrshang ban pynïap ïa nga, namar ba phin ym pdiang ïa ka jinghikai jong nga.

³⁸ Nga kren shaphang kaei kaba U Kpa jong nga u la pyn-i ha nga, hynrei phi leh ïa kaei kaba u kpa jong phi u la ïathuh ïa phi.”

³⁹ Ki la jubab ïa u, “U kpa jong ngi u dei u Abraham.” “Lada shisha phi long ki khun jong u Abraham,” U Jisu u la phai ktien, “phin leh ïa kita kijuh kiba u la leh.

⁴⁰ Baroh kaba nga la lah leh ka long ban ïathuh ha phi ïa ka jingshisha kaba nga la ïohsngew na U Blei, pynban phi pyrshang ban pynïap ïa nga. U Abraham um shym la leh ïa kaba kum kane!

⁴¹ Phi leh ïa kaei kaba u kpa jong phi u la leh.” “Tang U Blei hi u dei U Kpa uba ngi don,” ki la jubab, “bad ngi long ki khun bashisha jong u.”

⁴² U Jisu u la ong ha ki, “Lada U Blei shisha u dei U Kpa jong phi, phin da la ieit ïa nga, namar nga la wan na U Blei bad mynta nga don hangne. Ngam shym la wan ha la ka jong ka bor hi, hynrei u la phah ïa nga.

⁴³ Balei phim sngewthuh ïa kaei kaba nga ong? Ka long namar ba phim lah shah ban sngap ïa ka khubor jong nga.

⁴⁴ Phi, phi long ki khun jong u kpa jong phi, u Ksuid, bad phi da kwah ban bud ïa kiba u kpa jong phi u sngewbha. Naduh kaba mynnyngkong u la long u nongpynïap briew bad um ju ïeng ha ka liang jong ka jingshisha, namar ha u kam don ka jingshisha. Haba u ïathuh ïa ka jingshukor, u leh ïa kaei kaba long tynrai ha u, namar u long uba lamler bad u kpa ki jingshukor baroh.

⁴⁵ Hynrei nga ïathuh ïa ka jingshisha, bad na kata ka daw balei ba phim ngeit ïa nga.

⁴⁶ Uno na phi uba lah ban pynshisha ba nga long uba shah pynrem ha ka pop? Lada nga ïathuh ïa ka jingshisha, te balei ba phim ngeit ïa nga?

⁴⁷ Uta uba wan na U Blei u shahshkor ïa ki ktien U Blei. Phi, pynban, phim dei na U Blei, bad dei na kata ka daw balei ba phim shahshkor.”

U Jisu bad u Abraham

⁴⁸ Ki la kylli ïa U Jisu, “Hato ngim shym la ong ïa kaba dei, ba me dei u nong Samaria bad ba me don u ksuid hapoh jong me?”

⁴⁹ “Nga ngam don u ksuid,” U Jisu u la jubab, “Nga burom ïa la U Kpa, hynrei phi pynjahburom ïa nga.

⁵⁰ Ngam shym wad burom na ka bynta ïa lade. Hynrei don uwei uba wad ïa ka bad uba bishar na ka bynta jong nga.

⁵¹ Nga ong ha phi ïa ka jingshisha: Uno uno uba kohnguh ïa ka jinghikai jong nga un ym ïap lano lano ruh.”

⁵² Ki la ong ha u, “Mynta ngi sngewthikna ba me don u ksuid! U Abraham u la ïap, bad ki nongïathuhlypa ki la ïap, pynban me ong ba lada uno uno uba kohnguh ïa ka jinghikai jong me un ym ïap lano lano ruh.

⁵³ U Abraham uba u kpa jong ngi u la ïap; hato mem dawa ba me kham khraw ban ïa u Abraham? Bad ki nongïathuhlypa ruh ki la ïap. Me tharai ba me dei uei?”

⁵⁴ U Jisu u la jubab, “Lada nga wad burom ïa lade, kata ka burom kam dondor ei ei. Uta uba burom ïa nga u long U Kpa jong nga — uta ïa uba phi ong ba u dei U Blei jong phi.

⁵⁵ Phim pat ju ithuh ïa u, hynrei nga ithuh ïa u. Lada nga la ong ba ngam ithuh ïa u, ngan long u nongshukor kum ma phi. Hynrei nga ithuh ïa u, bad nga kohnguh ïa ka ktien jong u.

⁵⁶ U Abraham uba long u kpa jong phi u la shadkmen ba u la ïohi ïa ka por jong ka jingwan jong nga; u la ïohi ïa ka bad u la kmen.”

⁵⁷ Ki la ong ha u, “Mem pat dap wat tang sanphew snem ka rta — bad me la ïohi ïa u Abraham?”

⁵⁸ “Nga ong ha phi ïa ka jingshisha,” U Jisu u la phai ktien. “Ha shuwa ban kha ïa u Abraham, ‘Nga la long.’ ”

⁵⁹ Nangta ki la ïa-khar ïa ki maw ban lynthem ïa u, hynrei U Jisu u la buhrieh ïa lade bad u la mihnoh na ka Templ.