ÏOANNIS 7 - Khasi CL Bible (BSI)

U Jisu bad ki para shynrang jong U

¹ Hadien kane, U Jisu u la nang ïaid ha ka Galilaïa; um shym kwah ban leit sha Judia, namar ba ki nongsynshar jong ki Jiw hangta ki la ïakwah ban pynïap ïa u.

^2-3 Ka por jong ka Jingkhawai Niam Ki Ïingtrep ka la jan, kumta ki para shynrang jong U Jisu ki la ong ïa u, “To mihnoh na kane ka jaka bad leit sha Judia, ba ki nongbud jong me kin ïohi ïa kiei kiei kiba me leh.

⁴ Ym don mano mano ba buhrieh ïa kaei kaba u leh lada u kwah ba kiwei kin tip. Naba me leh ïa kine kiei kiei, to ai ba ka pyrthei baroh kawei kan tip shaphang jong me!”

⁵ (Wat ki para shynrang jong u hi kim shym la ngeit ha u.)

⁶ U Jisu u la ong ha ki, “Ka por kaba biang na ka bynta jong nga kam pat poi. Kano kano ka por na ka bynta ïa phi ka biang.

⁷ Ka pyrthei kam lah ban shun ïa phi, hynrei ka shun ïa nga, namar ba nga ïai-ong ba ki lynti jong ka ki long kiba sniew.

⁸ Ma phi to nang ïaleit sha ka Jingkhawai Niam. Nga ngam leit sha kane ka Jingkhawai Niam, namar ba ka por kaba biang kam pat poi na ka bynta jong nga.”

⁹ U la ong ïa kane, bad nangta u la sah noh ha Galilaïa.

U Jisu ha ka Jingkhawai Niam Ki Ïingtrep

¹⁰ Hadien ba ki para shynrang jong u ki la leit sha ka Jingkhawai Niam, U Jisu ruh u la leit; pynban, um shym la leit ha kaba paw, hynrei ha kaba rieh.

¹¹ Ki nongsynshar jong ki Jiw ki la ïawad ïa u ha kata ka Jingkhawai Niam. “Hangno u don?” ki la kylli.

¹² Ka la don ka jingïa-pasiaw kaba jur shaphang jong u hapdeng u paidbah. “U long u briew uba bha,” don kiba la ong. “Em,” kiwei ki la ong, “u ïalam bakla ïa ki briew.”

¹³ Hynrei ym don ba ïakren ha kaba paw, namar ba ki sheptieng ïa ki nongsynshar jong ki Jiw.

¹⁴ Hamar kaba shiteng na ka Jingkhawai Niam ka la jan kut U Jisu u la leit sha ka Templ bad u la sdang ban hikai.

¹⁵ Ki nongsynshar jong ki Jiw ki la lyngngoh haduh katta katta bad ki la ong, “Kumno une u briew u tip katne katne haba um pat ju ïoh jinghikai ei ei?”

¹⁶ U Jisu u la jubab, “Kaei kaba nga hikai kam dei na ka jinghikai jong nga hi, hynrei ka wan na U Blei, uba la phah ïa nga.

¹⁷ Uno uno uba mon ban leh ïa kaei kaba U Blei u kwah, un tip la kaei kaba nga hikai ka wan na U Blei ne la nga kren ha ka bor jong nga hi.

¹⁸ U briew uba kren ha la ka jong ka bor u pyrshang ban ïoh burom na ka bynta ïa lade hi. Hynrei uba wad ïa ka burom jong uta uba la phah ïa u, u long uba shida, bad ym don ka bymshisha ha u.

¹⁹ U Moses u la ai ha phi ïa ka Hukum, hato ym dei kumta? Hynrei ym don uwei na phi uba kohnguh ïa ka Hukum. Balei ba phi pyrshang ban pynïap ïa nga?”

²⁰ “Me don u ksuid hapoh jong me!” u paidbah u la jubab. “Mano ba pyrshang ban pynïap ïa me?”

²¹ U Jisu u la jubab, “Nga la leh ïa kawei ka kambah, bad baroh phi ïa-sngewlyngngoh.

²² U Moses u la hukum ïa phi ban otsher ïa ki khun shynrang jong phi (wat la um shym dei u Moses hynrei ki kpa tymmen jong phi kiba la sdang ïa ka), bad kumta phi otsher ïa u khynnah ha ka sngi Sabbaton.

²³ Lada ïa u khynnah la otsher ha ka sngi Sabbaton ba yn ym pynkheiñ ïa ka Hukum u Moses, balei phi bitar ïa nga namar ba nga pynkhiah ïa u briew ha ka sngi Sabbaton?

²⁴ Wat shu bishar tang da ki jingthew na shabar, bad bishar da ki jingthew bashisha.”

Hato u dei U Messaïah?

²⁵ Katto katne ngut na ki briew jong ka Jerusalem ki la ong, “Hato um dei une u briew ba ki nongsynshar jong ki Jiw ki ïawad ban pynïap?

²⁶ Ha khmih! U ïakren ha u paidbah, bad kim ong ei ei pyrshah ïa u! Hato ka lah ban long ba kim ithuh shisha ïa u ba u dei U Messaïah?

²⁷ Hynrei haba U Messaïah un wan, ym don ba tip na-ei ba u wan. Bad baroh ngi tip nangno une u briew u wan.”

²⁸ Katba U Jisu u dang hikai ha ka Templ, u la kren ha ka sur kaba jam, “Hato phi ithuh da shisha ïa nga bad tip nangno nga wan? Ngam shym la wan da ka bor jong nga hi. Uta uba la phah ïa nga, pynban, u long uba shisha.

²⁹ Phim ithuh ïa u; hynrei, nga ithuh ïa u, namar nga wan na u bad u la phah ïa nga.”

³⁰ Te ki la pyrshang ban kem ïa u, hynrei ym don uba la ktah kti ïa u, namar ba ka kynta jong u kam pat poi.

³¹ Hynrei bun na uta u paidbah u la ngeit ha u bad u la ong, “Haba U Messaïah un wan, hato un leh kham bun ki kambah ban ïa kaba une u briew u la leh?”

La phah ïa ki nongap phira ban kem ïa U Jisu

³² Ki Pharisi ki la ïohsngew ba u paidbah u ïa-pasiaw ïa kine kiei kiei shaphang U Jisu, kumta ma ki bad ki rangbah lyngdoh ki la phah katto katne ngut ki nongap phira ban kem ïa u.

³³ U Jisu u la ong, “Ngan don bad phi tang shipor, bad nangta ngan sa leit noh sha uta uba la phah ïa nga.

³⁴ Phin ïawad ïa nga, hynrei phin ym shem ïa nga, namar phim lah ban leit sha kaba ngan don.”

³⁵ Ki nongsynshar jong ki Jiw ki la ïakren para ma ki, “Shano ba un sa leit ba ngi ngin ym shem ïa u? Hato un leit sha ki shnong jong ki Grik ha kaba ki briew jong ngi ki sah, bad ban hikai ïa ki Grik?

³⁶ U ong ba ngin wad ïa u hynrei ngin ym shem ïa u, bad ba ngim lah ban leit sha kaba un don. U mut aïu?”

Ki wahduid jong ka um kaba ai jingim

³⁷ Ha ka sngi kaba khatduh bad kaba khraw tam eh jong ka Jingkhawai Niam, U Jisu u la ïeng joit bad u la ong ha ka sur kaba jam, “Uno uno uba sliang u dei ban wan sha nga, bad uno uno uba ngeit ha nga u dei ban dih.

³⁸ Kumba ka Jingthoh Bakhuid ka ong, ‘Ki wahduid ka um kaba ai jingim kin tuid noh na ka dohnud jong u.’ ”

³⁹ U Jisu u la kren ïa kane shaphang U Mynsiem, uba kito kiba la ngeit ha u kin ïohpdiang. Ha kata ka por ïa U Mynsiem ym pat shym la ai, namar ïa U Jisu ym pat shym la kyntiew sha ka burom.

Ka jingïapait hapdeng ki Briew

⁴⁰ Katto katne ngut na ki briew ha uta u paidbah ki la ïohsngew ïa u ba u ong ïa kane bad ki la ong, “Une u briew u dei da shisha u nongïathuhlypa.”

⁴¹ Kiwei pat ki la ong, “U dei U Messaïah!” Hynrei kiwei ki la ong, “U Messaïah un ym wan na Galilaïa?

⁴² Ka Jingthoh Bakhuid ka ong ba U Messaïah un long uba hiarpateng na u Syiem Dabid bad yn kha ïa u ha Bethlehem, ka shnong ha kaba u Dabid u la im.”

⁴³ Kumta ka la don ka jingïapait hapdeng u paidbah namar U Jisu.

⁴⁴ Don kiba la kwah ban kem ïa u, hynrei ym don uba ktah kti ïa u.

Ka jingbymngeit ki nongsynshar jong ki Jiw

⁴⁵ Haba ki nongap phira ki la leit phai noh, ki rangbah lyngdoh bad ki Pharisi ki la kylli ïa ki, “Balei phi khlem wan ïalam ïa u?”

⁴⁶ Ki nongap phira ki la jubab, “Ym pat ju don uno uno u ban kren kum une u briew!”

⁴⁷ “Hato u la pynbieit ïa phi ruh?” ki Pharisi ki la kylli ïa ki.

⁴⁸ “Hato phi la ju tip ba don uno uno na ki nongsynshar jong ki Jiw ne uwei u Pharisi kiba ngeit ha u?

⁴⁹ Une u paidbah um tip ïa ka Hukum u Moses, te ki long hapoh ka jingtim jong U Blei!”

⁵⁰ Uwei na ki Pharisi hangta u dei u Nikodemos, u briew uba la leit mynshuwa ban ïohi ïa U Jisu.

⁵¹ U la ong ha kiwei, “Kat kum ka Hukum jong ngi ngim lah ban pynrem ïa u briew ha shuwa ban ïohsngew na u bad ban shem kaei ba u la leh.”

^52-53 “Te kumta,” ki la jubab, “phi ruh phi dei na Galilaïa? To pule minot ïa ki Jingthoh Bakhuid bad phin shem ba ym don nongïathuhlypa uba ju mih na Galilaïa.”