ÏOANNIS 4 - Khasi CL Bible (BSI)

U Jisu bad ka Nong Samaria

¹ Ki Pharisi ki la ïohsngew ba U Jisu u la nang ïoh kham bun ki synran bad u la nang pynbaptis kham bun ban ïa u Ïoannis.

² (Ha ka jingshisha, U Jisu da lade um shym la pynbaptis ïano ïano; tang ki synran jong u ki la leh.)

^3-4 Kumta haba U Jisu u la ïohsngew ïa kaei kaba ki la ïa-ong, u la mihnoh na Judia bad u la leit phai sha Galilaïa; ha ka lynti jong u shata u la dei ban ïaid lyngba ka Samaria.

⁵ Ha Samaria u la leit poi ha ka shnong kaba kyrteng ka Sikhar, ka bym jngai na ka lyngkha kaba u Jakob u la ai ha u Joseph, u khun jong u.

⁶ Ka pukri u Jakob ka la don hangta, bad U Jisu, uba la thait na kata ka jingleit, u la shongthait harud kata ka pukri. Ka long kumba shiteng sngi.

⁷ Ka nong Samaria ka la wan ban tong um, bad U Jisu u la ong ha ka, “To ai um ba ngan dih.”

⁸ (Ki synran jong u ki la lah leit sha shnong ban thied jingbam.)

⁹ Kata ka briew ka la jubab, “Me long u Jiw, bad nga long ka nong Samaria — te kumno me lah ban pan um na nga ban dih?” (Ki Jiw kim pyndonkam ïa kijuh ki khuri bad ki pliang kiba ki nong Samaria ki pyndonkam.)

¹⁰ U Jisu u la jubab, “Lada pha tang shu la tip ïa kaei kaba U Blei u ai bad uei uta uba pan umdih na pha, phan jin da la pan na u, bad u un jin da la ai ha pha ïa ka um kaba ai jingim.”

¹¹ “Ko kynrad,” kata ka briew ka la ong, “mem don ïa ka jingtong, bad ka pukri ka long kaba jylliew. Nangno men ïoh ïa kata ka um kaba ai jingim?

¹² Dei u Jakob, u kpa tymmen jong ngi uba la ai ïa ngi ïa kane ka pukri; ma u bad ki khun shynrang jong u bad ki jingri jong u baroh ki la dih na ka. Hato me kam ba me long kham khraw ban ïa u Jakob?”

¹³ U Jisu u la jubab, “Uno uno uba dih na kane ka um un sliang pat, hynrei uno uno uba dih na ka um kaba ngan ai ha u un ym sliang shuh.

¹⁴ Ka um ïa kaba ngan ai ha u kan long ha u ka umpohliew ka ban pynïoh ïa u da ka um kaba ai jingim bad ai ha u ïa ka jingim bymjukut.”

¹⁵ “Ko Kynrad,” kata ka briew ka la ong, “to ai ha nga ïa kata ka um! Te ngan ym sliang shuh, lymne ngan hap wan shane ban tong um.”

¹⁶ “Khie leit bad khot ïa u tnga jong pha,” U Jisu u la ong ïa ka, “bad sa wan biang.”

¹⁷ “Ngam don tnga,” ka la jubab. U Jisu u la phai ktien, “Ka long kaba dei haba pha ong ba pham don tnga.

¹⁸ Pha la shongkurim ïa ki san ngut ki rangbah, bad u briew uba pha ïashong mynta um dei u tnga trai jong pha. Pha la ïathuh ïa nga ïa ka jingshisha.”

¹⁹ “Nga ïohi ba me long u nongïathuhlypa, ko kynrad,” kata ka kynthei ka la ong.

²⁰ “Ki kpa tymmen nong Samaria jong nga ki la ïamane ïa U Blei halor une u lum, hynrei phi ki Jiw phi ong ba ka Jerusalem ka dei ka jaka ha kaba ngi dei ban mane ïa U Blei.”

²¹ U Jisu u la ong ha ka, “To ngeit ïa nga, ko ka briew, ba ka por kan poi haba ki briew kin ym mane ïa U Kpa halor une u lum ne ha Jerusalem.

²² Phi ki nong Samaria phim da tip shai ïano phi mane; hynrei ma ngi ki Jiw ngi tip ïano ngi mane, namar ka long na ki Jiw ba ka jingpynim ka wan.

²³ Hynrei ka por ka poi bad ka la lah long mynta, haba ha ka bor jong U Mynsiem U Blei ki briew kin mane ïa U Kpa kumba u long hi, da kaba ai ha u ïa ka jingmane kaba shisha kaba u dawa.

²⁴ U Blei u long U Mynsiem, bad tang ha ka bor U Mynsiem jong u ba ki briew ki lah ban mane ïa u kumba u long hi.”

²⁵ Kata ka briew ka la ong ha u, “Nga tip ba U Messaïah un sa wan, bad haba u wan, un sa ïathuh ha ngi ïa kiei kiei baroh.”

²⁶ U Jisu u la jubab, “Dei ma nga, ma nga keiñ uba ïakren bad pha.”

²⁷ Ha kata ka khyllipmat ki synran jong U Jisu ki la wan phai, bad ki la lyngngoh shikatdei eh ban lap ïa u ba u ïakren bad kata ka briew. Hynrei ym don na ki uba la ong ïa ka, “Pha kwah aïu?” lane uba la kylli ïa u, “Balei ba me ïakren bad ka?”

²⁸ Nangta kata ka briew ka la iehnoh ïa la u khiew um, ka la leit phai sha shnong, bad ka la ong ïa ki briew hangta,

²⁹ “To wan bad khmih ïa u briew uba la ïathuh ïa nga ïa kiei kiei baroh kiba nga la leh. Hato une u lah ban long U Messaïah?”

³⁰ Kumta ki la ïamih na shnong bad ki la leit sha U Jisu.

³¹ Ha kata hi ka por ki synran ki la ïakyrpad ïa U Jisu, “Ko Nonghikai, to bam ei ei!”

³² Hynrei u la jubab, “Nga don ka jingbam ban bam ïa kaba phi phim tip ei ei.”

³³ Kumta ki synran ki la sdang ban ïakylli para ma ki hi, “Hato la don mano mano ba la wanrah jingbam ïa u?”

³⁴ “Ka jingbam jong nga,” U Jisu u la ong ha ki, “ka long ban kohnguh ïa ka mon jong uta uba la phah ïa nga bad ban pyndep ïa ka kam kaba u la ai ha nga ban leh.

³⁵ Phi don ka jingong, ‘Sa saw bnai bad nangta pat ka aïom ot.’ Hynrei nga ong ïa phi, to da khmih ïa ki lyngkha; ki jingthung mynta ki la ih bad ki la dei ban ot!

³⁶ Uta uba ot u ïoh la ka bainong bad u lum ïa ka jingmih na ka bynta ka jingim bymjukut; ba uta uba bet bad uta uba ot kin ïakmen lang.

³⁷ Ka jingong ka long kaba shisha, ‘Uwei u bet, uwei pat u ot.’

³⁸ Nga la phah ïa phi ban ot ha kata ka lyngkha kaba phim shym la trei; kiwei ki la trei hangta, bad phi ïoh jingmyntoi na ka jingtrei jong ki.”

³⁹ Bun na ki nong Samaria ha kata ka shnong ki la ngeit ha U Jisu namar kata ka briew ka la lah ong, “U la ïathuh ïa nga ïa kiei kiei baroh kiba nga la leh.”

⁴⁰ Kumta haba ki nong Samaria ki la wan ha u, ki la kyrpad ïa u ban sah bad ki, bad U Jisu u la sah hangta ar sngi.

⁴¹ Bun kiwei ki la ngeit namar ka khubor jong u bad ki la ong ha kata ka briew,

⁴² “Ngi ngeit mynta, ym namar kaei kaba pha la ïathuh, hynrei namar ma ngi hi da lade ngi la ïohsngew ïa u, bad ngi tip ba une da shisha u long u Nongpynim jong ka pyrthei.”

U Jisu u pynkhiah ïa u khun jong u rangbah synshar

⁴³ Hadien ba u la pynlut ar sngi hangta, U Jisu u la mihnoh bad u la leit sha Galilaïa.

⁴⁴ Naba ma u hi u la ong, “Ïa u nongïathuhlypa ym ju ñiewkor ha la ka jong ka ri.”

⁴⁵ Haba u la poi ha Galilaïa, ki briew hangta ki la pdiang sngewbha ïa u, namar ba ki la leit sha ka Jingkhawai Niam Ka Jinglait ha Jerusalem bad ki la ïohi ïa kiei kiei baroh kiba u la leh ha ka por ka Jingkhawai Niam.

⁴⁶ Nangta U Jisu u leit biang sha Kana ha Galilaïa, ha kaba u la pynkylla waiñ ïa ka um. Uwei u rangbah synshar ka sorkar u la don hangta uba u khun jong u, u la pang, ha Kapernam.

⁴⁷ Haba u la ïohsngew ba U Jisu u la wan na Judia sha Galilaïa, u la leit sha u bad kyrpad ïa u ban leit sha Kapernam bad ban pynkhiah ïa u khun jong u, uba don ha tmier ka jingïap.

⁴⁸ U Jisu u la ong ha u, “Ym don uwei ruh na phi u ban ngeit lymda u ïohi ïa ki kambah bad ki kamphylla.”

⁴⁹ “Ko Kynrad,” la phai ktien u rangbah synshar, “to wan bad nga shuwa ba u khun jong nga un ïap.”

⁵⁰ U Jisu u la ong ha u, “Khie leit, u khun jong me un im!” Uta u briew u la ngeit ïa ki ktien U Jisu bad u la leit noh.

⁵¹ Katba u dang don ha lynti sha ïing, ki shakri jong u ki la wan shem ïa u bad ka khubor, “U khun jong me un im!”

⁵² U la kylli ïa ki ha ka por aïu ba u khun jong u, u la kham ïohbor, bad ki la jubab, “Mynhynnin ha ka por shi baje nohphai sngi mynba ka jingshit na u ka la iehnoh.”

⁵³ Te u kpa u la kynmaw ba ha kata hi ka kynta mynba U Jisu u la ong ïa u, “U khun jong me un im.” Kumta ma u bad ka longïing jong u baroh ki la ngeit.

⁵⁴ Kane ka la long ka kambah kaba ar kaba U Jisu u la leh hadien ba u la wan na Judia sha Galilaïa.