ÏOANNIS 3 - Khasi CL Bible (BSI)

U Jisu bad u Nikodemos

¹ La don u nongïalam jong ki Jiw uba kyrteng u Nikodemos, uba dei na ka kynhun ki Pharisi.

² Ha kawei ka miet, une u la leit sha U Jisu bad u la ong ha u, “Ko Rabbi, ngi tip ba me long u nonghikai ïa uba la phah da U Blei. Ym don uno uno uba lah ban leh ïa ki kambah kiba me leh lymda U Blei u don ryngkat bad u.”

³ U Jisu u la jubab, “Nga ïathuh ha me ïa ka jingshisha: Ym don uba lah ban ïohi ïa ka Hima U Blei lymda kha pat ïa u.”

⁴ “Kumno lah ban kha pat ïa u briew uba la rangbah?” U Nikodemos u la kylli. “Kam lah ban long ba un rung shapoh ka kpoh jong ka kmie jong u bad ban kha sa shisien!”

⁵ “Nga ïathuh ha me ïa ka jingshisha,” U Jisu u la jubab, “Ym don uba lah ban rung sha ka Hima U Blei khlem da kha na ka um bad na U Mynsiem.

⁶ Ïa u briew la kha ha ka doh na ki kmie ki kpa kiba long ki briew, hynrei la kha ha kaba kynja mynsiem na U Mynsiem.

⁷ Wat sngewlyngngoh namar ba nga ong ha me, ba ka dei ban kha pat ïa phi baroh.

⁸ Ka lyer ka beh kat sha kaba ka mon; me ïohsngew ïa ka jingsawa ba ka pynmih, hynrei mem tip nangno ba ka wan lane shaei ba ka leit. Ka long kumta ïa uwei pa uwei ïa uba la kha na U Mynsiem.”

⁹ “Kumno kane ka lah ban long?” la kylli u Nikodemos.

¹⁰ U Jisu u la jubab, “Me long u nonghikai uba khraw ha Israel, bad mem tip ïa kane?

¹¹ Nga ïathuh ha me ïa ka jingshisha: Ngi kren ïa kaei kaba ngi tip bad ngi ïathuh ïa kaei kaba ngi la ïohi, pynban, ym don na phi uba mon ban pdiang ïa ka khubor jong ngi.

¹² Mem ngeit ïa nga haba nga ïathuh ïa me shaphang kiei kiei jong kane ka pyrthei; kumno men lah ban ngeit ïa nga, te, haba nga ïathuh ha me shaphang kiei kiei jong ka bneng?

¹³ Bad ym don uno uno uba la ju leit kiew sha bneng lait tang U Khun U Briew, uba la wan hiar na bneng.”

^14-15 Kumba u Moses u la kyntiew ïa u 'seiñ rnong ha u dieng ha ka ri shyiap, ha kajuh ka rukom ka dei ïa U Khun U Briew ba yn kyntiew shajrong, ba uno uno uba ngeit ha u un ïoh ka jingim bymjukut.

¹⁶ Naba U Blei u la ieit katta katta ïa ka pyrthei kat haduh ba u la aiti noh ïa U Khun ba tang marwei jong u, ba uno uno uba ngeit ha u un ym ïap noh hynrei un ïoh ïa ka jingim bymjukut.

¹⁷ Naba U Blei um shym la phah ïa la U Khun sha ka pyrthei ba un long u nongbishar jong ka, hynrei, ba un long u nongpynim jong ka.

¹⁸ Uno uno uba ngeit ha U Khun un ym shah bishar; hynrei ïa uno uno u bymngeit la lah bishar lypa ïa u, namar ba um shym la ngeit ha U Khun ba tang marwei jong U Blei.

¹⁹ Kane ka long kumno ka jingbishar ka trei: Ka jingshai ka la wan sha ka pyrthei, hynrei ki briew ki ieit ïa ka jingdum ban ïa ka jingshai, namar ba ki kam jong ki, ki long kiba sniew.

²⁰ Uno uno uba leh ïa kiei kiei kiba sniew u isih ïa ka jingshai bad un ym wan sha ka jingshai, namar um kwah ba ïa ki kam sniew jong u yn paw.

²¹ Hynrei uno uno uba leh ïa kaei kaba shisha u wan sha ka jingshai khnang ba ka jingshai kan pynpaw ïa kaei kaba u la leh ka long da kaba kohnguh ïa U Blei.

U Jisu bad u Ïoannis

²² Hadien kane, U Jisu bad la ki synran ki la leit sha ka probins jong ka Judia, ha kaba u la pynlut katto katne por bad ki bad u la pynbaptis.

²³ U Ïoannis ruh u dang pynbaptis ha Ainon, ka bym da jngai na Salim, namar ba ka la don shibun ka um ha kata ka jaka. Ki briew ki la ïaleit sha u, bad u la pynbaptis ïa ki.

²⁴ (Kane ka la long ha shuwa ban set byndi ïa u Ïoannis.)

²⁵ Katto katne ngut na ki synran jong u Ïoannis ki la sdang ban ïatainia bad u Jiw shaphang ki bynta ba ïadei bad ka jinglehniam ka jingpynkhuid.

²⁶ Kumta ki la leit sha u Ïoannis bad ki la ong, “Ko Nonghikai, phi kynmaw ïa u briew uba la don lem bad phi ha ka liang mihngi jong ka wah Jordan, ïa uba phi la kren shaphang jong u? Ha khmih, u la pynbaptis mynta, bad baroh ki la leit sha u!”

²⁷ U Ïoannis u la jubab, “Ym don uno uno uba lah ban ïohpdiang ei ei lymda U Blei u ai ïa ka ha u.

²⁸ Phi hi phi long ki sakhi jong nga ba nga la ong, ‘Ngam dei u Messaïah, hynrei, ïa nga la phah ha shuwa jong u.’

²⁹ Ka nongleitkurim ka dei ka jong u nongleitkurim; hynrei u paralok jong u nongleitkurim, uba ïeng marsyndah bad shahshkor, u kmen haba u ïohsngew ïa ka sur jong u nongleitkurim. Kane ka long kumno ba ïa ka jingkmen jong nga la pyndap pura.

³⁰ Ka dei ïa u ban long kham khraw katba ma nga, ngan long kham rit.”

Uta uba wan na bneng

³¹ Uta uba wan na bneng u kham khraw ban ïa baroh. Uta uba wan na ka pyrthei u dei u jong ka pyrthei bad u kren shaphang kiei kiei kiba dei jong ka pyrthei, hynrei uta uba wan na bneng u long halor baroh.

³² U ïathuh ïa kaei kaba u la ïohi bad la ïohsngew, pynban ym don ba pdiang ïa ka khubor jong u.

³³ Hynrei uno uno uba pdiang ïa ka khubor jong u, u pynskhem da kane ba U Blei u long uba shisha.

³⁴ Uta ïa uba U Blei u la phah, u kren ïa ki ktien jong U Blei, namar ba U Blei u ai ha u ïa ka jingdap jong U Mynsiem jong u.

³⁵ U Kpa u ieit ïa la U Khun bad u la buh ïa kiei kiei baroh ha ka bor jong u.

³⁶ Uno uno uba ngeit ha U Khun u don ka jingim bymjukut; uno uno u bymkohnguh ïa U Khun un ym ïoh ïa ka jingim, hynrei un ïaisah ha ka jingpynshitom jong U Blei.