ÏOANNIS 20 - Khasi CL Bible (BSI)

Ka jingtep kaba thylli

¹ Dang step phyrngab ha ka Sngi U Trai, katba ka dang dum, ka Mari ka nong Magdala ka la leit sha kata ka jingtep bad ka la ïohi ba ïa u mawkhang la weng noh na ka jingkhang ka jingtep.

² Ka la leit mareh sha u Simon Petros bad sha uwei pat u synran, uba U Jisu u ieit, bad ka la ïathuh ha ki, “Ki la ïarah noh ïa U Trai na ka jingtep, bad ngim tip hangno ki la ïabuh ïa u!”

³ Te u Petros bad uta uwei pat u synran ki la leit sha ka jingtep.

⁴ Baroh ar ngut ki la shu mareh, hynrei uta uwei pat u synran u la kham mareh stet ban ïa u Petros bad u la poi nyngkong ha ka jingtep.

⁵ U la dem bad u la ïohi ïa ki jaiñsop linen, hynrei um shym la rung shapoh.

⁶ Nadien jong u la wan u Simon Petros, bad u la leit beit shapoh ka jingtep.

⁷ U la ïohi ïa ki jaiñsop linen kiba la don hangta, bad ïa ka jaiñ kaba spaiñ ïa ka khlieh U Jisu. Kane kam shym don lang bad ki jaiñsop linen hynrei kaba la kli ïa ka jong.

⁸ Te uta uwei pat u synran, uba la poi nyngkong ha ka jingtep, u ruh u la rung shapoh; u la ïohi bad u la ngeit.

⁹ (Kim pat sngewthuh hi ïa ka Jingthoh Bakhuid kaba la ong ba u dei ban mihpat na ka jingïap.)

¹⁰ Nangta ki synran ki la leit phai sha ïing.

U Jisu u la paw ha ka Mari ka nong Magdala

^11-12 Ka Mari ka la ïeng shabar ka jingtep ka da ïam. Katba ka dang ïam, ka la dem bad jngoh shapoh ka jingtep bad ka la ïohi ar ngut ki angel hangta kiba la phong da ki jaiñ balieh, ki da ïashong ha kaba la buh ïa ka met U Jisu, uwei sha khlieh bad uwei pat sha kjat.

¹³ “Ko kynthei, balei pha ïam?” ki la ïakylli ïa ka. Ka la jubab, “Ki la rah noh ïa U Trai jong nga, bad ngam tip shano ki la buh ïa u!”

¹⁴ Te ka la phai dien bad ka la ïohi ïa U Jisu ba u ïeng hangta; hynrei kam shym tip ba u dei U Jisu.

¹⁵ “Ko kynthei, balei pha ïam?” U Jisu u la kylli ïa ka, “Ïano pha wad?” Ka la nang pyrkhat ba u la dei u nongsumar kper, kumta ka la ong ha u, “Lada me la rah noh ïa u, ko kynrad, to ïathuh ïa nga hangno me la buh ïa u, bad ngan ïoh leit bad shim ïa u.”

¹⁶ U Jisu u la ong ha ka, “Ko Mari!” Ka la phai sha u bad ka la ong ha ka ktien Hebru, “Rabboni!” (Kane ka mut “Ko Nonghikai!”.)

¹⁷ “Wat ktah ïa nga,” U Jisu u la ong ha ka, “namar ngam pat shym la leit kiew sha U Kpa. Hynrei khie leit sha ki para jong nga bad ïathuh ïa ki ba ngan leit phai sha u, uba long U Kpa jong nga bad U Kpa jong ki, U Blei jong nga bad U Blei jong ki.”

¹⁸ Kumta ka Mari ka nong Magdala ka la leit bad ïathuh ïa ki synran ba ka la ïohi ïa U Trai bad pynshai ha ki ïa kaei kaba u la ïathuh ïa ka.

U Jisu u la paw ha ki Synran

¹⁹ Ka la long la kham janmiet jong ka Sngi U Trai, bad ki synran ki la ïalumlang hapoh ka kamra kaba la khang skhem, namar ba ki la sheptieng ïa ki nongsynshar jong ki Jiw. Nangta U Jisu u la wan bad u la ïeng hapdeng jong ki. “To ka jingsuk kan long lem bad phi,” u la ong.

²⁰ Hadien ba u la ong ïa kane, u la pyn-i ha ki ïa la ki kti bad ïa la ka krung. Ki synran ki la dap da ka jingkmen haba ki la ïohi ïa U Trai.

²¹ U Jisu u la ong pat ha ki, “To ka jingsuk kan long lem bad phi. Kumba U Kpa u la phah ïa nga, kumta ruh nga phah ïa phi.”

²² Nangta u la pyrsad halor jong ki bad u la ong, “To pdiang ïa U Mynsiem Bakhuid.

²³ Lada phi map ïa ki pop jong ki briew, la map ïa ki; lada phim map ïa ki, ïa ki ym shym la map.”

U Jisu bad U Thomas

²⁴ Uwei na ki khat-ar ngut ki synran, u Thomas (ba la khot uba Kha Synrap), um shym don bad ki haba U Jisu u la wan.

²⁵ Kumta kiwei pat ki synran ki la ïathuh ïa u, “Ngi la ïohi ïa U Trai!” U Thomas u la ong ha ki, “Lymda nga ïohi ïa ki dien preg ha ki kti jong u bad ïoh buh ïa ka shynriah'ti jong nga ha kito ki dien preg bad ïa ka kti jong nga ha ka krung jong u, ngan ym ngeit.”

²⁶ Shi taïew hadien ki synran ki la ïadon lang biang hapoh ïing, bad u Thomas u la don lem bad ki. Ïa ki jingkhang la khang skhem, hynrei U Jisu u la wan bad u la ïeng hapdeng jong ki bad u la ong, “To ka jingsuk kan long lem bad phi.”

²⁷ Te u la ong ha u Thomas, “Buh ïa ka shynriah'ti jong me hangne, bad peit ïa ki kti jong nga; nangta kner ïa la ka kti bad buh ïa ka ha ka krung jong nga. Wat artatien shuh bad to ngeit!”

²⁸ U Thomas u la jubab ïa u, “U Trai jong nga bad U Blei jong nga!”

²⁹ U Jisu u la ong ha u, “Hato me ngeit namar ba me ïohi ïa nga? Katno ki kmen kito kiba ngeit khlem da ïohi ïa nga!”

Ka jingthmu jong kane ka Kitab

³⁰ Ha ka jingïadon ryngkat ki synran jong u, U Jisu u la leh shibun kiwei pat ki kambah ïa kiba ym shym la thoh ha kane ka kitab.

³¹ Hynrei ïa kine la thoh khnang ba phin ïoh ngeit ba U Jisu u long U Messaïah, U Khun U Blei, bad da kaba ngeit ha u phin ïoh ïa ka jingim.