ÏOANNIS 12 - Khasi CL Bible (BSI)

La pynsleh ïa U Jisu ha Bethania

¹ Hynriew sngi shuwa ka Niam Ka Jinglait, U Jisu u la leit sha Bethania, ka shnong u Lasaros, u briew ïa uba U Jisu u la pynmihpat na ka jingïap.

² Ki la pynkhreh ka jingbam miet ïa u hangta, ha kaba ka Martha ka la ïarap ban sam; u Lasaros u long uwei na kito kiba la ïashong bam ha ka miej lem bad U Jisu.

³ Te ka Mari ka la shim shiteng litar ka jingiwbih kaba remdor bha ïa kaba la shna na u nard bakynsai, ka la theh ïa ka ha ki kjat U Jisu, bad ka la ñiad ïa ki kjat jong u da u shñiuh khlieh jong ka. Ka jingsma basngewtynnat na ka jingiwbih ka la pyndap ïa ka ïing baroh kawei.

⁴ U Judas Iskariot, uwei na ki synran jong u — uta u ban sa shetkylla ïa u — u la ong,

⁵ “Balei bym die noh ïa kane ka jingiwbih ha ka dor laispah ki sbai rupa bad ïa ka pisa ban ai sha kiba duk?”

⁶ U la ong ïa kane, ym namar ba u da sngewkhia ïa kiba duk, hynrei namar ba u la long u nongtuh. U bat ïa ka pla pisa bad uba la ju shim na ka ban pyndonkam ïa lade.

⁷ Hynrei U Jisu u la ong, “Wat pynwit ïa ka! To ai ba kan buh ïa kaei kaba ka don na ka bynta ka sngi ban tep jong nga.

⁸ Phin don borabor ki briew kiba duk lem bad phi, hynrei phin ym ïoh borabor ïa nga.”

Ka jingïasylla pyrshah ïa U Lasaros

⁹ Bun bah ki briew ki la ïohsngew ba U Jisu u la don ha Bethania, kumta ki la leit shata, ym tang namar jong U Jisu hynrei ban ïohi ruh ïa u Lasaros, ïa uba U Jisu u la pynmihpat na ka jingïap.

^10-11 Kumta ki rangbah lyngdoh ki la ïasylla ban pynïap ïa u Lasaros ruh, namar na kaei kaba la jia ha u, bun ki Jiw ki la kyntait ïa ki bad ki la ngeit ha U Jisu.

Ka jingleit rung badonburom sha Jerusalem

¹² Ha ka sngi kaba bud, u paidbah byllien uba la wan sha ka Jingkhawai Niam Ka Jinglait u la ïohsngew ba U Jisu u dang wan sha Jerusalem.

¹³ Kumta ki la kdiah ïa ki tnat dieng Tlai bad ki la mih ban leit ïakynduh ïa u, ki da pyrta, “Ïaroh ïa U Blei! To U Blei un kyrkhu ïa uta uba wan ha ka kyrteng jong U Trai! To U Blei un kyrkhu ïa u Syiem ki Israel!”

¹⁴ U Jisu u la shem ïa u kada bad u la shong halor jong u, kumba ka Jingthoh Bakhuid ka ong,

¹⁵ “Wat ym sheptieng, ko ka nongbah Seïon! Hangne u syiem jong pha u wan, u da shong halor u khun kada.”

¹⁶ Ki synran jong u kim shym la sngewthuh ïa kane ha kata ka por; hynrei ynda haba la pyndonburom ïa U Jisu, ki la kynmaw ba ka Jingthoh Bakhuid ka la ong ïa kane shaphang jong u bad ki la leh ïa kane na ka bynta jong u.

¹⁷ Ki briew kiba la don ryngkat bad U Jisu mynba u la khot ïa u Lasaros na ka jingtep bad ba u la pynmihpat ïa u na ka jingïap, ki la pynbna ïa kaei kaba la jia.

¹⁸ Dei na kata ka daw balei ba u paidbah u la ïakynduh ïa U — namar ba ki la ïohsngew ba U la leh ïa kane ka kambah.

¹⁹ Ki Pharisi ki la ïakren para ma ki, “Phi ïohi, ngim shym lah leh ei ei ruh em! Khmih, ka pyrthei baroh kawei ka ïabud ïa u!”

Katto katne ngut ki Grik ki ïawad ïa U Jisu

²⁰ Katto katne ngut ki Grik hapdeng jong kito kiba la leit sha Jerusalem ban mane ha ka por jong ka Jingkhawai Niam.

²¹ Ki la leit sha u Philip (uba dei na Bethsaida kaba ha Galilaïa) bad ki la ong, “Ko Rangbah, ngi kwah ban ïohi ïa U Jisu.”

²² U Philip u la leit bad u la ïathuh ha u Andriw, bad baroh ar ngut ki la leit bad ïathuh ïa U Jisu.

²³ U Jisu u la jubab ïa ki, “Ka kynta ka la poi mynta ïa U Khun U Briew ban ïohpdiang ïa ka burom kaba khraw.

²⁴ Nga ïathuh ïa phi ïa ka jingshisha: U symboh kew u ïaisah hi tang shi symboh lymda la pynhap ïa u ha ka khyndew bad u ïap. Lada u da ïap, te u sei shibun ki sohkew.

²⁵ Uno uno uba ieit ïa la ka jong ka jingim un duh ïa ka; uno uno uba isih ïa la ka jong ka jingim ha kane ka pyrthei un ri ïa ka sha ka jingim bymjukut.

²⁶ Uno uno uba kwah ban shakri ïa nga u dei ban bud ïa nga, khnang ba u shakri jong nga un long lem bad nga hangno hangno ba nga don. Bad u Kpa jong nga un pyndonburom ïa uno uno uba shakri ïa nga.

U Jisu u kren shaphang ka jingïap jong u

²⁷ “Mynta ka mynsiem jong nga ka pisa — bad aïu ngan ong? Hato ngan ong, ‘Ko Pa, wat ai ba kane ka kynta kan wan ha nga?’ Hynrei dei na ka bynta kata nga la wan — khnang ba ngan ïoh ïaid lyngba kane ka kynta jong ka jingshah shitom.

²⁸ Ko Pa, to pyndonburom ïa la ka kyrteng!” Te ka sur ka la kren na bneng, “Nga la wallam ka burom ïa ka, bad ngan leh biang kumta.”

²⁹ Ki paidbah kiba la ïeng hangta ki la ïohsngew ïa kata ka sur, bad don na ki kiba la ong ba ka dei ka jingtied pyrthat, katba kiwei pat ki la ong, “U angel u la kren ha u!”

³⁰ Hynrei U Jisu u la ong ha ki, “Kam dei na ka bynta jong nga ba kane ka sur ka la kren, hynrei na ka bynta jong phi.

³¹ Mynta ka dei ka por ba ïa kane ka pyrthei yn bishar; mynta ïa u nongsynshar jong kane ka pyrthei yn pynhiar khet.

³² Ynda la kyntiew ïa nga na ka pyrthei, ngan khring ïa ki briew baroh sha nga.”

³³ (Haba u ong ïa kane u kdew ïa ka jingïap kaba kumno un shah.)

³⁴ U paidbah u la jubab, “Ka hukum jong ngi ka ïathuh ba U Messaïah un im junom. Kumno, te, me lah ban ong ba ka dei ïa U Khun U Briew ban kyntiew? Uei une U Khun U Briew?”

³⁵ U Jisu u la jubab, “Ka jingshai kan don hapdeng jong phi sa katto katne por. To nang ïaid katba ka jingshai ka dang don, ba ka jingdum kan ym wan lap ïa phi; naba uta uba ïaid ha ka jingdum um tip shano ba u leit.

³⁶ To ngeit ha ka jingshai, namarkata, katba phi dang don ïa ka, ba kumta phin long ki briew jong ka jingshai.” Hadien ba U Jisu u la ong ïa kane, u la leit noh bad u la buhrieh ïa lade na ki.

Ka jingbymngeit jong ki briew

³⁷ Wat la U Jisu u la leh ïa kine ki kambah baroh ha khmat jong ki, kim shym la ngeit ha u, ba yn pyndep ïa kaei kaba u Isaïah u nongïathuhlypa u la ong ba kan long shisha:

³⁸ “A Trai, uno uba la ngeit ïa ka khubor kaba ngi la ïathuh? Hano ba U Trai u pynpaw ïa ka bor jong u?”

³⁹ Bad kumta kim shym lah ban ngeit, namar u Isaïah u la lah ong ruh:

⁴⁰ “U Blei u la pynmatlah ïa ki khmat jong ki bad u la khang khyrdep ïa ki jingmut jong ki, ba ki khmat jong ki kin ym ïohi, bad ba ki jingmut jong ki kin ym shemphang, bad kin ym phai sha nga, ong U Blei, ïa nga ba ngan pynkhiah ïa ki.”

⁴¹ U Isaïah u la ong ïa kane namar u la ïohi ïa ka burom U Jisu bad u la kren shaphang jong u.

⁴² Wat la katta ruh, kiba bun na ki nongsynshar jong ki Jiw ki la ngeit ha U Jisu; hynrei namar ki Pharisi kim shym la kren shaphang jong ka ha kaba paw, ba kin ym shah beh noh na ka synagog.

⁴³ Ki ieit ïa ka jingpynksan u briew ban ïa ka jingpynksan na U Blei.

Ka jingbishar da ki ktien U Jisu

⁴⁴ U Jisu u la ong ha ka sur kaba jam, “Uno uno uba ngeit ha nga u ngeit ym tang ha nga hynrei ruh ha uta uba la phah ïa nga.

⁴⁵ Uno uno uba ïohi ïa nga u ïohi ruh ïa uta uba la phah ïa nga.

⁴⁶ Nga la wan sha ka pyrthei kum ka jingshai, ba baroh kiba ngeit ha nga kin ym sah ha ka jingdum.

⁴⁷ Lada uno uno u ïohsngew ïa ka khubor jong nga bad um kohnguh ïa ka, ngan ym bishar ïa u. Nga la wan, ym ban bishar ïa ka pyrthei, hynrei ban pynim ïa ka.

⁴⁸ Uno uno uba kyntait ïa nga bad u bym pdiang ïa ka khubor jong nga, u don uwei u ban bishar ïa u. Ki ktien kiba nga la kren kin long u nongbishar jong u ha ka sngi kaba khatduh!

⁴⁹ Kane ka long kaba shisha, namar ngam shym la kren ha ka bor jong nga hi; hynrei U Kpa uba la phah ïa nga u la hukum ïa nga ïa kaei kaba nga dei ban ong bad kren.

⁵⁰ Bad nga tip ba ka hukum jong u ka wallam ïa ka jingim bymjukut. Kaei kaba nga ong, namarkata, ka long kaei kaba U Kpa u la ïathuh ïa nga ban ong.”