ÏOANNIS 1 - Khasi CL Bible (BSI)

U Ktien jong ka Jingim

¹ Ha shuwa ban thaw ïa ka pyrthei, u Ktien u la lah don lypa; u la don bad U Blei, bad u long kumjuh kum U Blei.

² Naduh kaba sdang u Ktien u la don bad U Blei.

³ Da u, la thaw ïa kiei kiei baroh; ym don kawei ruh na ka jingpynlong baroh kaba la thaw khlem ma u.

⁴ U Ktien u la long u tyllong jong ka jingim; bad kane ka jingim ka la wanrah ka jingshai ïa u bynriew.

⁵ Ka jingshai ka shai ha kaba dum, bad ka jingdum kam lah ban pynlip ïa ka.

^6-7 U Blei u la phah ïa u nonglamktien jong u, u briew uba kyrteng u Ïoannis, uba la wan ban ïathuh ïa ki briew shaphang ka jingshai, ba baroh ki dei ban shahshkor ïa ka khubor bad ban ngeit.

⁸ U hi da lade um dei ka jingshai; u la wan ban ïathuh shaphang ka jingshai.

⁹ Kane ka la long ka jingshai kaba shisha — ka jingshai kaba wan sha ka pyrthei bad pynshai ha u bynriew baroh.

¹⁰ U Ktien u la don ha ka pyrthei, bad wat la U Blei u la thaw ïa ka pyrthei da u, pynban, ka pyrthei kam shym la ithuh ïa u.

¹¹ U la wan sha la ka jong ka ri, hynrei ki briew jong u hi kim shym la pdiang ïa u.

¹² Katto katne pat, ki la pdiang ïa u bad ki la ngeit ha u; kumta u la ai bor ha ki, ban long ki khun U Blei.

¹³ Kim shym la long ki khun U Blei katba kum ka rukom, kata, da kaba kha kum ki khun u kpa ha ka doh; U Blei hi u la long U Kpa jong ki.

¹⁴ U Ktien la kylla long u briew bad, uba dap da ka jingaiei bad ka jingshisha, u la im hapdeng jong ngi. Ngi la ïohi ïa ka burom jong u, ka burom kaba u la ïohpdiang kum U Khun marwei jong U Kpa.

¹⁵ U Ïoannis u la kren shaphang jong u. U la pyrta jam, “Une u long uta ïa uba nga la kren shaphang jong u, mynba nga la ong, ‘U wan hadien jong nga, hynrei u kham khraw ban ïa nga, namar u la don shuwa ban kha ïa nga.’ ”

¹⁶ Na ka jingdap jong ka jingaiei jong u, u la kyrkhu ïa ngi baroh, da kaba ai ha ngi ïa ka jingkyrkhu kawei hadien kawei pat.

¹⁷ U Blei u la ai ïa ka hukum lyngba u Moses, hynrei ka jingaiei bad ka jingshisha ki la wan lyngba U Jisu Khrist.

¹⁸ Ym don mano mano ruh uba la ïohi ïa U Blei. U Khun ba marwei jong u, uba long kumjuh kum U Blei bad uba don ha syndah jong U Kpa, u la pynpaw shynna ïa u.

Ka Khubor u Ïoannis u Nongpynbaptis

¹⁹ Ki nongsynshar jong ki Jiw ha Jerusalem ki la phah katto katne ngut ki lyngdoh bad ki Lebi sha u Ïoannis, ban kylli ïa u, “Me dei uei?”

²⁰ U Ïoannis um shym la kyntait ban jubab, hynrei, u la kren ha kaba paw bad da kaba shai, u da ong, “Ngam dei u Messaïah.”

²¹ “Te, me dei uei?” ki la kylli, “Hato me dei u Elijah?” “Em, ngam dei,” u Ïoannis u la jubab. “Hato me dei u nongïathuhlypa?” ki la kylli. “Em,” u la jubab.

²² “Te ïathuh ïa ngi me dei uei,” ki la ong. “Ngi hap ban rah ïa ka jubab sha kito kiba la phah ïa ngi. Kumno me ong shaphang ïa lade?”

²³ U Ïoannis u la jubab da kaba shim na u nongïathuhlypa Isaïah: “Nga long ‘ka sur jong uta uba pyrta ha ka ri shyiap: To pynbeit ïa ka lynti ïaid jong U Trai ba un ïaid!’ ”

^24-25 Ki nonglamktien, ïa kiba la phah da ki Pharisi, ki la kylli te ïa u Ïoannis, “Lada mem dei u Messaïah lane u Elijah lane u nongïathuhlypa, balei pat me pynbaptis?”

²⁶ U Ïoannis u la jubab, “Nga pynbaptis da ka um, hynrei hapdeng jong phi don uwei uba ïeng uba phim ithuh.

²⁷ U wan hadien jong nga, hynrei nga ngam long uba bit wat ban law ïa ki ksai juti jong u.”

²⁸ Kane baroh ka la jia ha Bethania kaba don ha ka phang mihngi jong ka wah Jordan, ha kaba u Ïoannis u la pynbaptis.

U Khunlangbrot jong U Blei

²⁹ Ha ka sngi kaba bud, U Ïoannis u la ïohi ïa U Jisu ba u wan sha u, bad u la ong, “Ha khmih, U Khunlangbrot jong U Blei, uba kit noh ïa ka pop jong ka pyrthei!

³⁰ Une u long uta ïa uba nga la kren mynba nga la ong, ‘U briew uba wan hadien jong nga, hynrei u long uba kham khraw ban ïa nga, namar u la don shuwa ban kha ïa nga.’

³¹ Ngam pat shym la tip u dei uno, hynrei nga la wan ïa ka ban pynbaptis da ka um, khnang ba yn ïoh pynithuh ïa u ha ki paid Israel.”

³² Bad u Ïoannis u la ai ïa kane ka jingphla: “Nga la ïohi ïa U Mynsiem ba u hiar kum ka paro na bneng, bad u shongsah halor jong u.

³³ Ngam pat shym la tip hi ba u dei ma u, hynrei U Blei, uba la phah ïa nga ban pynbaptis da ka um, u la ong ha nga, ‘Men sa ïohi ïa U Mynsiem ba u hiar bad u shongsah ha u briew; u dei uta, uba pynbaptis da U Mynsiem Bakhuid.’

³⁴ Nga la ïohi ïa kata,” la ong U Ïoannis, “bad nga ong ha phi ba une u dei U Khun U Blei.”

Ki Synran kiba nyngkong jong U Jisu

^35-36 Ha ka sngi kaba bud, u Ïoannis u dang ïeng biang hangta bad ar ngut na ki synran jong u, mynba u la ïohi ïa U Jisu ba u dang ïaid nangta. “Ha khmih U Khunlangbrot U Blei!” u la ong.

³⁷ Ki ar ngut ki synran ki la ïohsngew ïa u ba u ong ïa kane bad ki la leit lem bad U Jisu.

³⁸ U Jisu u la phai, u la ïohi ïa ki ba ki bud ïa u, bad u la kylli, “Phi ïawad aïu?” Ki la jubab ïa u, “Hangno me sah, ko Rabbi?” (Kane ka kyntien ka mut “U Nonghikai”.)

³⁹ “To wan bad khmih,” u la jubab. (Ka la long ha kata ka por kumba saw baje janmiet.) Kumta ki la leit bad u, bad ki la ïohi hangno u sah, bad ki la pynlut ïa kaba sah jong ka sngi bad u.

⁴⁰ Uwei na ki u la long u Andriw, uba shi para bad u Simon Petros.

⁴¹ Mar kumta u la shem ïa u Simon, u para jong u bad u la ong ha u, “Ngi la shem ïa u Messaïah.” (Kane ka kyntien ka mut “U Khrist”.)

⁴² Te u la ïalam ïa u Simon sha U Jisu. U Jisu u la peit ïa u bad u la ong, “Ka kyrteng jong me ka long u Simon u khun jong u Jona, hynrei yn khot ïa me u Kephas.” (Kane ka long kumjuh kum ka kyntien “Petros” kaba mut “u mawsiang”.)

U Jisu u khot ïa u Philip bad ïa u Nathanael

⁴³ Ha ka sngi kaba bud, U Jisu u la kut jingmut ban leit noh sha Galilaïa. U la shem ïa u Philip bad u la ong ha u, “To wan bad nga!”

⁴⁴ (U Philip u dei na Bethsaida, ka shnong ha kaba u Andriw bad u Petros ki sah.)

⁴⁵ U Philip u la shem ïa u Nathanael bad u la ong ïa u, “Ngi la shem ïa uta ïa uba u Moses u la thoh ha ka kitab jong ka Hukum bad ïa uba ki nongïathuhlypa ruh ki la thoh shaphang jong u. U long U Jisu, u khun jong u Joseph, uba na Nasareth.”

⁴⁶ “Hato kano kano kaba bha ka lah ban mih na Nasareth?” U Nathanael u la kylli. “To wan bad khmih,” la jubab u Philip.

⁴⁷ Haba U Jisu u la ïohi ïa u Nathanael ba u wan sha u, u la ong shaphang jong u, “Une u dei u kynja Israel uba shisha, ym don kano kano ka bymshisha ha u!”

⁴⁸ U Nathanael u la kylli ïa u, “Kumno me ithuh ïa nga?” U Jisu u la jubab, “Nga la ïohi ïa me mynba me dang don ha trai u dieng Dumbur ha shuwa ba u Philip un khot ïa me.”

⁴⁹ “Ko Nonghikai,” la jubab u Nathanael, “me long U Khun U Blei! Me long u Syiem ki Israel!”

⁵⁰ U Jisu u la ong, “Hato me ngeit tang namar ba nga la ïathuh ïa me ba nga la ïohi ïa me mynba me dang don ha trai u dieng Dumbur? Men sa ïohi ïa kiei kiei kiba kham khraw ban ïa kane!”

⁵¹ Bad u la ong ha ki, “Nga ïathuh ha phi ïa ka jingshisha: Phin sa ïohi ïa ka bneng ba la plie bad ki angel jong U Blei ba ki ïakiew bad ïahiar ha U Khun U Briew.”