HOSIA 9 - Khasi CL Bible (BSI)

U Hosia u pynbna ïa ka jingpynshitom ïa ki Israel

¹ Ko ki paid Israel, sangeh noh kaba rakhe ïa ki Jingkhawai Niam kum ki riewthala. Phi la phai lyndet na la U Blei bad phi la long ki bymïaineh ha u. Ha baroh kawei ka ri phi la die ïa lade kum ki nuti ha u blei Baal bad phi la ieit ïa u kew uba phi pyrkhat ba u la siew na ka bynta jong phi!

² Hynrei shen phin ym ïoh ïa u kew bad ka umphniang Olib kat ban dap biang bad yn ym don waiñ shuh.

³ Ki paid Israel kin ym ïoh shongsah ha ka ri U Trai; hynrei kin hap leit phai sha Ijipt, bad ki hap ban bam ka jingbam ba la kheiñ sang ha Assyria.

⁴ Ha kito ki ri nongwei kin ym lah ban ai ka jingainguh waiñ ha U Trai, lane wanlam ki jingkñia ha u. Ki jingbam jong ki kin pyntngit ïa uno uno uba bam ïa ki, kum ki jingbam ba bam ha ka por ïapbriew. Yn pyndonkam ïa ki tang ban pynkdang ïa la ka jingthngan; ym don kawei ruh ka ban shim kum ka jingainguh ha ka Templ U Trai.

⁵ Bad haba ka por kan poi na ka bynta ki Jingkhawai Niam ba la jied na ka bynta ban pyndonburom ïa U Trai, kin ïaleh kumno hangta?

⁶ Haba ka jingjot ka wan bad ïa ki briew la pynsakma, ki nong Ijipt kin lumlang ïa ki — kin lumlang ïa ki ban tep hangta ha Memphis! Ki jingdon jingem jong ki kum ka rupa bad ki jaka ha kaba ki ïing jong ki shisien ki la ïeng yn tap da ki ñiut bad ki bniap shiah.

⁷ Ka por jong ka jingpynshitom ka la poi, ka por ha kaba ki briew kin ïoh ïa kaei kaba ki dei hok. Haba kata ka jia, ki Israel kin tip ïa ka! “Une u nongïathuhlypa,” phi ong, “u dei uba bieit. Une u briew uba ïoh mynsiem u dei uba lamwir.” Phi ki briew phi isih jur ïa nga namar ba la jyllei eh ki pop jong phi.

⁸ U Blei u la phah ïa nga kum u nongïathuhlypa ban maham ïa ki briew jong u ki Israel. La katta ruh shano shano ba nga leit, phi pyrshang ban riam ïa nga kum ïa ka sim. Wat ha ka Templ U Blei, ki briew ki dei ki nongshun jong u nongïathuhlypa.

⁹ Ki la long sniew khlem jingkyrmen ha kaei kaei kaba ki leh, kumba ki la long ha Gibeah. U Blei un kynmaw ïa ka pop jong ki, bad un pynshitom ïa ki na ka bynta kata.

Ka pop ki Israel bad kaba mih na ka

¹⁰ U Trai u ong, “Haba nga lap nyngkong ïa ki Israel, ka long kumba lap ïa ki sohwaiñ kiba mih ha ri shyiap. Haba nga ïohi nyngkong ïa ki kpa tymmen jong phi, ka long kumba ïohi ïa u soh Dumbur uba ih nyngkong ha ka aïom. Hynrei haba ki la wan sha u lum Peor, ki la sdang ban mane ïa u Baal, bad tang katto katne por ki la kylla long kiba isaitmet kum kita ki blei ba ki ieit.

¹¹ Ka jingkhraw ki Israel kan her noh kum ka sim, bad yn ym don shuh ki khun ban kha na ki, yn ym don shuh ki kynthei ki ban armet, yn ym don jingpunkhun shuh.

¹² Hynrei wat la ki ïoh pynheh pynsan ïa la ki khun, ngan shim noh ïa ki bad ngan ym pynsah im uwei ruh. Haba ngan iehnoh noh ïa kine ki briew, kiei kiei kiba shyrkhei kin wan jia ha ki.”

¹³ A Trai, nga lah ban ïohi ïa ki khun jong ki ba ki shah beh kthong bad shah pynïap.

¹⁴ Kaei kaba ngan kylli na phi ban leh ïa kine ki briew? Pynlyngki ïa ki kynthei jong ki! Pynlong ïa ki ba kin ym lah ban sumar ïa ki khunlung jong ki!

Ka jingbishar U Trai ïa ki Israel

¹⁵ U Trai u ong, “Baroh ki kam sniew jong ki, ki la sdang ha Gilgal. Ka la long hangta ba nga sdang ban isih ïa ki. Bad namar ka jingsniew ba ki la leh, ngan beh noh ïa ki na ka ri jong nga. Ngan ym ieit shuh ïa ki; baroh ki nongïalam jong ki, ki la ïaleh pyrshah ïa nga.

¹⁶ Ki paid Israel ki long kum u jingthung uba ki thied ki la tyrkhong bad um pynmih soh ei ei shuh. Kin ym ïoh khun shuh, hynrei wat lada ki dang ïoh, ngan pynïap ïa ki khun thep mynsiem jong ki.”

U nongïathuhlypa u kren shaphang ka Israel

¹⁷ U Blei uba nga shakri un kyntait ïa ki briew jong u, namar ba kim shym la shahshkor ïa u. Kin kylla long ki nongïaidwir hapdeng ki jaitbynriew.