HOSIA 8 - Khasi CL Bible (BSI)

U Trai u pynrem ïa ki Israel namar ka jingmane bleithaw

¹ U Trai u ong, “Pynsawa ïa ka jingmaham! Ki nongshun ki hiar kynsan shapoh ha ka ri jong nga kum ki pukni! Ki briew jong nga ki la pynkheiñ ïa ka jutang kaba nga la ïateh bad ki, bad ki la ïaleh pyrshah ïa ka jinghikai jong nga.

² Wat lada ki khot ïa nga U Blei jong ki bad ki kam ba ki dei ki briew jong nga bad ba ki tip ïa nga,

³ ki la kyntait ïa kata kaba bha. Namar kane, ki nongshun jong ki kin buddien ïa ki.

⁴ “Ki briew jong nga ki la jied ïa ki syiem. Hynrei ki la leh ïa kata ha la ka jong ka lynti. Ki thung ïa ki nongïalam, hynrei khlem ka jingpynskhem jong nga. Ki shim ïa ka rupa bad ka ksiar jong ki bad ki thaw ïa ki bleithaw — na ka bynta ka jingjot jong ki hi.

⁵ Nga isih ïa u masi ksiar ba mane da ki briew jong ka nongbah Samaria. Nga bitar lep ïa ki. Sa katno kan shim por shuwa ba kin sangeh noh na kaba mane bleithaw?

⁶ U nongsaiñdur na Israel uba la thaw ïa u bleithaw, bad um dei satia u blei! Ïa u khun masi ksiar ba mane ha Samaria yn sa pynpait lyngkhot lyngkhai.

⁷ Haba ki bet ïa ka lyer, kin ïoh ot ïa ka 'erlangthari! U kew baroh shi pynthor u bym pat ih un ym lah ban pynmih kpu. Hynrei wat lada u pynmih ruh, ki nongwei kin bam ei ïa u.

⁸ Ki Israel kin long kum kiwei pat ki jaitbynriew bad kin long ki bymlarkam kum u khra ba la pait.

⁹ Ki long kiba mutlop kum ki kada khlaw, ki paid Israel kin ïaid ha la ka jong ka lynti. Ki la leit ban wad jingïarap na ki Assyria, bad ki la siew ruh ïa kiwei pat ki jaitbynriew ban ïada ïa ki.

¹⁰ Hynrei mynta ngan lumlang ïa ki bad pynshitom ïa ki. Shen shen kin sa kyrthat ha ka jingpang, haba u patsha ka Assyria u banbeiñ ïa ki.

¹¹ “Katba nang bun ki duwan ba ki paid Israel ki thaw ban pynkhuid ïa ki pop, katta nang bun ki jaka ba ki ïoh ban leh pop.

¹² Nga la thoh ki jinghikai bym lah ñiew shuh na ka bynta ki briew, hynrei ki kyntait ïa ki kum kaei kaei kaba khyllah bad long nongwei.

¹³ Ki ai ïa ki jingkñia sha nga bad ki bam ïa ka doh kñia. Hynrei ma nga U Trai, ngam sngewbha ïa ki, bad mynta ngan kynmaw ïa ki pop jong ki bad pynshitom ïa ki na ka bynta kata; ngan phah biang ïa ki sha Ijipt.

¹⁴ “Ki paid Israel ki la tei ïa ki ïingsyiem, hynrei ki la klet ïa la U Nongthaw. Ki paid Judah ki la tei ïa ki nongbah ba la ker kynroh. Hynrei ngan phah da ka ding ka ban thang duh ïa ki ïingsyiem bad ki nongbah jong ki.”