HOSIA 7 - Khasi CL Bible (BSI)

¹ “Ha kano kano ka por ba nga kwah ban pynkhiah ïa ki briew jong nga ki Israel bad pynlong ïa ki ban manbha sa shisien pat, baroh kaba nga lah ban ïohi ka long ka jingbymman jong ki bad ka kam sniew kaba ki leh. Ki shukor uwei ïa uwei pat; ki rung jubor ha ki ïing bad ki tuh; ki lute ïa ki briew ha ki lynti bah.

² Kam ju rung ha ki jingmut jong ki ba ngan kynmaw ïa kane ka kam sniew baroh; hynrei ki pop jong ki, ki ker sawdong ïa ki, bad ngam lah khlem da ïohi ïa ki.”

Ka jingïasylla ha ïingsyiem

³ U Trai u ong, “Ki briew ki shukor ïa u syiem bad ki rangbah synshar jong u da ki buit bymman jong ki.

⁴ Baroh ki long kiba shetkylla bad ki bym lah shaniah. Ka jingisih jong ki, ka ing suki kum ka ding ha ka tyndur, ka bym shym la pynkhih da u nongshet kpu haduh ba u 'purew u lah long ban shet.

⁵ Ha ka sngi pyndonburom ïa u syiem, ki pynlong ïa u syiem bad ki rangbah synshar jong u ban dih buaid bad leh bieit da ka waiñ.

⁶ Ho-oid, ki khluit kum ka tyndur da ki jingïasylla jong ki. Baroh shi miet, ka jingbitar jong ki ka nang ing, bad mynstep ka mih kynsan kum ki thylliej ding.

⁷ “Ha ka jingkhluit ka jingbitar jong ki, ki pynïap ïa la ki nongsynshar. Ki syiem jong ki, ki shah pynïap uwei hadien uwei, hynrei ym don na ki uba khot kyrpad ïa nga ban ïoh jingïarap.”

Ki Israel bad kiwei pat ki jaitbynriew

⁸ U Trai u ong, “Ki paid Israel ki long kum u kpu bym pat ih bha.

⁹ Ki shaniah ha ki jaitbynriew sawdong jong ki bad kim sngewthuh ba kane ka jingshaniah ha ki nongwei ka la bam duh noh ïa ka jingkhlaiñ jong ki. Ki sngi jong ki, ki la jan kut, hynrei kim shym la tip ïa kata.

¹⁰ Ka jingsngewmeng ki paid Israel ka kyang pyrshah ïa ki hi. Wat haba kane baroh ka la jia, kim shym la wan phai sha nga, U Trai U Blei jong ki.

¹¹ Ka Israel ka her kum ka paro kaba bieit; nyngkong ki briew jong ka ki wad jingïarap na Ijipt, bad nangta ki mareh sha Assyria!

¹² Hynrei ngan riam da ka jar bad kem ïa ki kum ki sim katba ki dang ïaid. Ngan pynshitom ïa ki namar ki kam bymman ba ki la leh.

¹³ “A ki long kiba la tim! Ki la iehnoh ïa nga bad ïeng pyrshah ïa nga. Ïa ki yn pynduh noh. Nga la kwah ban pyllait im ïa ki, hynrei ka jingmane jong ki ïa nga ka long kaba thala.

¹⁴ Kim shym la duwai ha nga naduh la ka dohnud, hynrei pynban ki bret ïa lade ha madan bad ïam pangnud kumba leh kiba mane blei thala. Haba ki duwai ban ïoh ïa u kew bad ka waiñ, ki ot pynmong ïa lade kum kiba mane blei thala. A haduh katno ki long kiba ïaleh pyrshah!

¹⁵ Wat la dei ma nga uba pynheh pynsan bad pynlong ïa ki kiba khlaiñ, ki ïasuhbuit sniew pyrshah ïa nga.

¹⁶ Ki ïai phai lyndet na nga sha u blei u bymdonbor ei ei ruh em. Ki long ki bym lah ban shaniah kum ka ryntieh kaba kynriang. Namar ki nongïalam jong ki, ki kren meng, kin ïap ha ka jingïap bashyrkhei, bad ki nong Ijipt kin sa ïa-rkhie.”