HOSIA 6 - Khasi CL Bible (BSI)

Ka jingkylla-kaba-mut bymshisha jong ki briew

¹ Ki briew ki ong, “Ale ngin ïaleit phai sha U Trai! U la pynmynsaw ïa ngi, hynrei da shisha un pynkhiah ïa ngi; kumta un pynkhiah ïa ngi; u la pynmong ïa ngi, hynrei un sop spaiñ ïa ki jingmong jong ngi, hato un ym leh kumta?

² Ha ki ar ne lai sngi un pynim ïa ngi, bad ngin ïoh im ha ka jingdon ryngkat jong u.

³ To ngin ïai pyrshang ban tip ïa U Trai. Da shisha un sa wan sha ngi kum ka step phyrngab, shisha kum u slap pyrem uba ai um ïa ka khyndew.”

⁴ Hynrei U Trai u ong, “Ko Israel bad Judah, Kaei kaba ngan leh ïa phi? Ka jingieit jong phi ïa nga ka jah noh shen kum u slap mynstep; ka long kum ka umjer, kaba jah noh shen ha ka sngi.

⁵ Namarkata, nga la phah ïa ki nongïathuhlypa jong nga sha phi ryngkat ka khubor jong ka jingbishar bad ka jingpynjot. Kaei kaba nga kwah na phi ka long kaba shisha bad kaba shai.

⁶ Nga kwah ïa ka jingieit baneh jong phi, ym ka jingkñia da ki mrad. Nga kham kwah ba ki briew jong nga kin ithuh ïa nga ban ïa ki jingainguh thang sha nga.

⁷ “Hynrei ki tang mar ïarung ïa ka ri ha Adam, ki la pynkheiñ ïa ka jutang kaba nga la ïateh bad ki.

⁸ Ka Gilead ka long ka nongbah kaba dap da ki riewbymman bad ki nongpynïap briew.

⁹ Ki lyngdoh ki long kum ka kynhun ki nonglute kiba apthap ïa u briew. Wat ha ka lynti sha ka jaka bakhuid ha Shekhem ki pynïap briew. Bad ki leh ïa kane kaba sniew baroh da kaba thmu lypa!

¹⁰ Nga la ïohi ïa kaei kaei kaba shyrkhei ha Israel: Ki briew jong nga ki la pyntngit ïa lade da kaba mane ïa ki bleithaw.

¹¹ “Bad na ka bynta jong phi, ki paid Judah, nga la buh ka por ban pynshitom ïa phi ruh na ka bynta kaei kaba phi leh.