HOSIA 5 - Khasi CL Bible (BSI)

¹ “To shahshkor ïa kane, phi ki lyngdoh! To pynleit jingmut, phi ki paid Israel! To shahshkor, phi kiba na ka longïing u syiem! La khmih lynti ïa phi ban bishar da ka hok — Kumta ka jingbishar kan wan hap ha phi! Phi la long ka jingriam ha Mispah, ka jar ba la pynap ha u lum Tabor,

² ka kharai kaba jylliew ha ka nongbah Akasia; bad ngan pynshitom ïa phi baroh.

³ Nga tip ka Israel ka long kumno — kam lah ban rieh na nga. Ka la long ka bymïaineh, bad ki briew jong ka kim long kiba bit ban mane ïa nga.”

U Hosia u maham pyrshah ïa ka jingmane bleithaw

⁴ Ka jingsniew ba ki briew ki la leh, ka khanglad ïa ki ban wan phai sha U Blei jong ki. Ka jingmane bleithaw ka don ka jingbat bakhlaiñ ïa ki bad kim pdiang ïa U Trai.

⁵ Ka jingsngewmeng jong ki paid Israel ka kyang pyrshah ïa ki. Ki pop jong ki, ki pynlong ïa ki ban jynthut bad kyllon, bad ki paid Judah ki kyllon lang bad ki.

⁶ Ki shim ïa ki langbrot bad ki jingri jong ki ban ai kum ki jingkñia sha U Trai hynrei kane kan ym wanrah jingbha ei ei ïa ki. Kin ym shem ïa u namar u la iehnoh ïa ki.

⁷ Ki la long ki bymïaineh ha U Trai; ki khun jong ki kim long ki jong u. Kumta mynta, ma ki bad ki jaka jong ki kin sa shah pynjot noh shen.

Ka thma hapdeng ki Judah bad ki Israel

⁸ To put ïa ki turoi thma ha Gibeah! Pynsawa ïa ka jingkyrsiew ha Ramah! Pyrta jam shaphang ka thma ha Bethaben! Tur sha ka thma, ko ki rangbah Benjamin!

⁹ Ka sngi ka jingpynshitom ka la wan, bad ki Israel kin sa shah pynjot. Ko ki paid Israel, kane kan jia da shisha!

¹⁰ U Trai u ong, “Nga la bitar namar ba ki nongïalam ka Judah ki la hiarthma ïa ka Israel bad tuh jaka na ka. Kumta ngan theh noh ka jingpynshitom halor jong ki kum ka jingshlei um.

¹¹ Ki Israel kin shah ka jingshah banbeiñ; ka la duh noh ïa ka khyndew kaba dei hok jong ka, namar ka ïai kwah ban wad jingïarap na kito ki bym don ei ei ban ai.

¹² Ngan wallam jingjot halor ki Israel bad ka jingduh halor ki paid Judah.

¹³ “Haba ka Israel ka ïohi haduh katno ka pang jur bad haba ka Judah ka ïohi ïa la ki jingmong, nangta ki Israel ki leit sha Assyria ban pan jingïarap na u syiem uba khrawbor, hynrei um lah ban pynkoit ïa ki lane pynkhiah ïa ki jingmong jong ki.

¹⁴ Ngan tur ïaleh ïa ki paid Israel bad Judah kum u sing. Ma nga hi da lade ngan patar lyngkhot ïa ki, bad nangta ngan iehnoh ïa ki. Haba nga patan tyngeh ïa ki, yn ym don uba lah ban pyllait ïa ki.

¹⁵ “Ngan lyndet noh ïa ki briew jong nga haduh ba kin shahshitom ha ban da biang na ka bynta ki pop jong ki bad wan ban wad ïa nga. Lehse ha ki jingshah shitom jong ki, kin pyrshang ban wad ïa nga.”