HOSIA 4 - Khasi CL Bible (BSI)

Ka jingkynnoh U Trai pyrshah ïa ki Israel

¹ U Trai u don ka jingkynnoh pyrshah ïa ki briew kiba shong ha ka ri. To sngap, ko Israel, ïa kaei kaba u ong: “Ym don jingïaineh ne ka jingieit ha ka ri, Bad ki briew kim pdiang ïa nga kum U Blei.

² Ki ïateh kular bad ki pynkheiñ ïa ki, ki lamler, ki pynïap briew, ki tuh, bad ki klim. Ki kam sniew ki nang jyllei, bad ka don ka jingïa-pynïap briew kawei hadien kawei pat.

³ Bad kumta ka ri kan sa tyrkhong, kiei kiei baroh kiba im ha ka kin ïap. Baroh ki mrad bad ki sim, bad wat ki dohkha ruh, kin ïap.”

U Trai u kynnoh ïa ki lyngdoh

⁴ U Trai u ong, “Wat ai ba uno uno un kynnoh ïa ki briew lane pynrem ïa ki — ka jingmudui jong nga ka long pyrshah ïa phi ki lyngdoh.

⁵ Mynmiet bad mynsngi phi ïaid bakla, bad ki nongïathuhlypa kim long kham bha ban ïa phi. Ngan sa pynjot ïa ka Israel, ka kmie jong phi.

⁶ Ki briew jong nga ki shu jot ei namar kim pdiang ïa nga. Phi ki lyngdoh phim suidñiew ban pdiang ïa nga bad phi la kyntait ïa ka jinghikai jong nga, bad kumta nga la kyntait noh ïa phi bad ngan ym pdiang ïa ki khun jong phi kum ki lyngdoh jong nga.

⁷ “Katba phi ki lyngdoh phi nang ïabun, katta phi nang leh pop pyrshah ïa nga; bad kumta ngan pynkylla ïa ka burom jong phi sha ka jingjahburom.

⁸ Phi kylla riewspah na ki pop ki briew jong nga, bad kumta phi kwah ïa ki ban nang leh pop shuh shuh.

⁹ Phin sa shah ïa kajuh ka jingpynshitom kum ki riewpaidbah! Ngan pynshitom ïa phi bad pynlong ïa phi ban siew na ka bynta ka jingsniew ba phi leh.

¹⁰ Phin sa bam ïa la ka bynta na ki jingkñia hynrei phin ïai thngan. Phin sa mane ïa ki blei pynkharoi, hynrei la katta ruh phin ym ïoh khun satia, namar phi la phai lyndet na nga bad bud ïa kiwei pat ki blei.”

U Trai u pynrem ïa ka jingmane blei thala

¹¹ U Trai u ong, “Ka waiñ, kaba rim bad kaba thymmai ruh, ka pyntlot ïa ka bor pyrkhat ki briew jong nga!

¹² Ki pan ïa ki jingpynpaw na u lyngkhot dieng! u diengduh u batai ïa ki kaei ba ki kwah ban tip! Ki la iehnoh ïa nga. Kum ka briew kaba la kylla nuti, ki la aiti ïa lade ha kiwei pat ki blei.

¹³ Ha ki jaka kyntang ha kliar ki lumbah ki kñia ainguh, bad ha ki lumrit ki thang jingiwbih hapoh ki dieng kiba jrong bad kiba ïar namar ka jingkahtngen jong ki ka long kaba sngewtynnat! “Kaba mih nangta, ki khun kynthei jong phi ki ïaleh nuti, bad ki pyrsa kurim kynthei jong phi ki ïaklim.

¹⁴ Wat la katta ruh ngan ym pynshitom ïa ki na ka bynta kane, namar ma phi hi phi ïa-ïaid lang bad ki nuti kiba ha ka templ, bad ryngkat bad ki, phi ai ki jingkñia ba-thala. Kumba ka proberb ka ong, ‘Ki briew kiba khlem pyrkhat kin sa jot noh.’

¹⁵ “Wat lada phi ki briew ka Israel phim ïaineh ha nga, ai ba ki Judah kin ym ngop ha kijuh ki jingleh pop. Wat leit mane sha Gilgal lane sha Bethaben, lane pynlong ki jingïateh kular ha ka kyrteng U Trai uba im.

¹⁶ Ki paid Israel ki long mutlop kum ki khashor. Kumno ngan bsa ïa ki kum ïa ki langbrot ha ki pyntha phlang?

¹⁷ Ki paid Israel ki don hapoh ka jingshoh bieit ki bleithaw. Ai kin ïaid ha la ka jong ka lynti.

¹⁸ Hadien ba ki la dih shibun ka waiñ, ki ïaleh sngewbha ha ki kam nuti jong ki, ki jied ïa ka jingjahburom ban ïa ka burom.

¹⁹ Yn sa rong noh ïa ki kumba kit da ka lyer, bad kin sa shah ka jinglehrain namar ba ki kñia ha ki blei thala.