HOSIA 3 - Khasi CL Bible (BSI)

U Hosia bad ka briew bymïaineh

¹ U Trai u la ong ha nga, “Khie leit biang bad leh-ieit ïa ka briew kaba dang ïaleh nuti bad uba ieit jong ka. Me dei ban ieit ïa ka kumba nga ruh nga dang ieit ïa ki paid Israel, wat la ki phai sha kiwei pat ki blei bad ki ieit ban ainguh ha ki bleithaw da ki soh kismis.”

² Kumta nga la siew khatsan lyngkhot ka rupa bad shispah sanphew kilo u barli ban thied ïa ka.

³ Nga ong ïa ka ba ka dei ban ap slem ïa nga khlem da leh nuti lane klim; bad ha kane ka por ngan ïai ap ïa ka.

⁴ Ha kane kajuh ka rukom ki briew ka Israel kin hap ban ap slem khlem ki syiem ne ki nongïalam, khlem jingkñia lane rishot mawkyntang, khlem bleithaw lane dur ban pyndonkam ha kaba khan blei.

⁵ Hynrei ka por kan poi haba ki paid Israel sa shisien pat kin phai sha U Trai U Blei jong ki; bad sha uba hiarpateng na u Dabid u syiem jong ki. Nangta kin sheptieng ïa U Trai bad kin sa ïohpdiang ïa ki jingai babha ki jong u.