HOSIA 2 - Khasi CL Bible (BSI)

¹ Kumta khot ïa ki para Israel “Ki briew jong U Blei” bad “kiba ieit da U Trai.”

Ka Gomer bymïaineh — Ki Israel bymïaineh

² Ko khun jong nga, kyrpad jur ïa la ka kmie — wat lada kam dei tnga shuh ïa nga, bad nga ruh ngam dei shuh u tnga jong ka. Kyrpad ïa ka ba kan sangeh noh na kaba klim bad ka jingleh nuti.

³ Lada kam sangeh, ngan law lyngkhuit ïa ka kumba ka la long ha ka sngi ba la kha ïa ka. Ngan pynlong ïa ka, kum ka ri kaba tyrkhong bad ka bymseisoh, bad kan sa ïap namar ka jingsliang.

⁴ Ngan ym pyn-i jingisynei ïa ki khun jong ka; ki long ki khun jong ka nuti bym don jinglehrain.

⁵ Ma ka hi ka la ong, “Ngan leit sha kiba ieit ki jong nga — ki pynbiang ïa nga ka jingbam bad ka um, u 'saiwul bad ka jaiñ linen, ka umphniang Olib bad ka waiñ.”

⁶ Kumta ngan kerkut ïa ka da ki bniap shiah, bad ngan tei da ka kynroh ban khang ïa ka lynti jong ka.

⁷ Kan leit beh nadien ïa kiba ieit jong ka, hynrei kan ym lap ïa ki. Kan wad ïa ki hynrei kan ym shem ïa ki. Te kan sa ong, “Ngan leit phai noh sha u tnga uba nyngkong jong nga — nga kham bit kham biang myn ha kata ban ïa kaba nga long mynta.”

⁸ Kan ym tip ba dei ma nga uba la ai ïa ka u kew, ka waiñ, ka umphniang Olib, bad baroh ka rupa bad ka ksiar ba ka ju pyndonkam ha kaba mane ïa u Baal.

⁹ Kumta ha ka aïom ot ngan shim noh ïa ki jingai sngewbha jong nga da u kew bad ka waiñ, bad ngan shim noh ruh ïa u 'saiwul bad ka jaiñ linen ba nga la ai ïa ka ban phong.

¹⁰ Ngan law lyngkhuit ïa ka ha khmat kiba ieit jong ka, bad yn ym don uno uno ruh uba lah ban pyllait ïa ka na ka bor jong nga.

¹¹ Ngan pynkut noh ïa baroh ki kam sngewbha jong ka — ki jingkhawai ba man ka snem bad man u bnai bad ki jingrakhe ïa ka Sabbaton — bad ïa ki jinglehniam jong ka baroh.

¹² Ngan pynjulor ïa ki dieng sohwaiñ bad ki diengsoh Dumbur jong ka, kiba ka ju ong ba kiba ieit jong ka ki ai ïa ka namar ba ka la shakri ïa ki. Ngan pynkylla ri khlaw ïa ki bri sohwaiñ bad ki brisoh jong ka; ki mradkhlaw kin pynjot ïa ki.

¹³ Ngan pynshitom ïa ka namar kito ki por kiba ka la klet ïa nga mynba ka thang ki jingiwbih ïa u Baal bad ka la pynphuh pynphieng ïa lade da ki jingdeng bakordor haba ka leit bud nadien ïa kiba ieit jong ka. U Trai u la kren.

Ka jingieit U Trai ïa la ki briew

¹⁴ Te ngan leit ïalam biang ïa ka sha ri shyiap; hangta ngan khroh biang ïa ka da ki ktien ieit.

¹⁵ Ngan ai pat ha ka ïa ki bri sohwaiñ jong ka, bad ngan pynlong ïa ka Them Jingshitom sha ka khyrdop ka jingkyrmen. Hangta kan sa phai ktien ïa nga kumba ka la leh mynba ka dang samla, mynba ka wan mihnoh na ka ri Ijipt.

¹⁶ Nangta sa shisien pat kan sa khot biang ïa nga u tnga jong ka — kan ym khot shuh ïa nga u Baal jong ka.

¹⁷ Ngan ym shah shuh ba kan dang kren ïa ka kyrteng u Baal.

¹⁸ Ha kata ka por, ngan pynlong ka jutang bad baroh ki mradkhlaw bad ki sim, khnang ba kin ym pynmynsaw shuh ïa ki briew jong nga. Ngan weng noh ruh ïa baroh ki tiar thma na ka ri, baroh ki waitlam bad ki ryntieh, bad ngan ailad ba ki briew jong nga kin ïoh im ha ka jingsuk bad jingshngain.

¹⁹ Ko Israel, ngan pynlong ïa pha ka tnga jong nga; ngan lehhok bad ïaineh; ngan pyn-i ïa pha ïa ka jingieit baneh bad ïa ka jingisynei bad ngan pynlong ïa pha ka jong nga junom.

²⁰ Ngan bat ïa ka kular jong nga bad nga pynlong ïa pha ka jong nga, bad phan sa pdiang ïa nga kum U Trai.

²¹ Ha kata ka por ngan jubab ïa ki jingduwai ki briew jong nga ki Israel. Ngan phah ïa u slap ba un hap ha ka khyndew

²² bad ka khyndew kan pynmih ïa u kew, bad ki sohwaiñ, bad ki soh Olib.

²³ Ngan pynlong skhem ïa ki briew jong nga ha ka ri bad ngan pynmanbha ïa ki. Ngan pyn-i jingieit ïa kito kiba la ju khot “Lo-Ruhamah,” bad ïa kito kiba la ju khot “Lo-ammi” ngan sa ong, “Phi long ki briew jong nga,” bad kin jubab, “Me long U Blei jong ngi.”