HOSIA 13 - Khasi CL Bible (BSI)

Ka jingbishar khatduh ïa ki Israel

¹ Ha ki por mynshuwa, haba ka jait Ephraim ka la kren, kiwei pat ki jait Israel ki la sheptieng; ki peit sha u Ephraim. Hynrei ki briew ki la leh pop da kaba mane ïa u Baal, bad na ka bynta kane kin sa ïap.

² Kin nang ïai leh pop shuh shuh da kaba saiñ ïa ki durblei ban mane — ki bleithaw kiba da ka rupa, kiba la saiñdur da ka jingpyrkhat briew, ba la shna da ki kti briew. Bad nangta ki ong, “Ai ki jingkñia sha ki!” Kumno ki briew kin doh ïa kito ki bleithaw — ki bleithaw ha ka dur ki masi kyrtong!

³ Bad kumta kine ki briew kin sa jah kum u lyoh khyndew mynstep, kum ka umjer kaba jah noh shen dang step phyrngab. Kin long kum u stait ba ka lyer ka rong noh na ka kyntem, kum ka tdem kaba mih na ka dpei.

⁴ U Trai u ong, “Nga long U Trai U Blei jong phi, uba ïalam noh ïa phi na ka ri Ijipt. Phim don uwei pat U Blei lait na nga. Nga dei tang ma nga u nongpynim jong phi.

⁵ Nga la bsa ïa phi ha ka ri ba-tyrkhong, ka ri shyiap.

⁶ Hynrei haba phi la rung sha ka ri kaba bha, phi la kdang bad sngewhun, bad nangta phi la sngewsarong bad klet noh ïa nga.

⁷ Kumta ngan tur ïaleh ïa phi kum u sing. Kum u 'labasa ngan apthap ha ki lynti ïaid jong phi.

⁸ Ngan tur ïaleh ïa phi kum ka dngiem kaba la duh ïa la ki khun, bad ngan tar arliang ïa phi. Kum u sing ngan bam ïa phi hangta hi, bad ngan tar ïa phi lyngkhot lyngkhai kum u mradkhlaw.

⁹ “Ngan pynjot ïa phi, ko ki paid Israel! Te uei uba lah ban ïarap ïa phi?

¹⁰ Phi pan ïa u syiem bad ki nongïalam, hynrei mynta kumno ki lah ban pyllait im ïa ka ri?”

¹¹ Ha ka jingbitar jong nga, nga la ai ha phi ïa ki syiem, bad ha ka jingbitar shla jong nga, nga la shim noh ïa ki.

¹² “Ïa ka jingbymman ki Israel bad ki pop jong ki la buh jingthoh, bad ïa ki jingthoh la buh bha khop.

¹³ Ki Israel ki don ka lad ban im, hynrei ka long kaba bieit eh ban shim ïa ka — kum u khunlung uba la dei ban kha, u bym treh ban mih na ka kpoh.

¹⁴ Ngan ym pyllait ïa kine ki briew na ka ri kiba ïap lane pyllait im ïa ki na bor ka jingïap. Wanlam ïa ki khlam jong pha, ko jingïap! Wanlam ïa ka jingpynjot jong pha, ko ka pyrthei kiba ïap! Ngan ym don jingisynei shuh ïa kine ki briew.

¹⁵ Wat lada ki paid Israel ki roi kum ki ñiut, ngan phah ïa ka lyer khluit na mihngi kaba na ri shyiap, bad kan pyntyrkhong ïa ki umpohliew bad ki pung-um jong ki. Kan rong noh ïa kano kano kaba kordor.

¹⁶ Ïa ka Samaria yn pynshitom namar ka ïaleh pyrshah ïa nga. Ki briew jong ka kin ïap ha ka thma; ïa ki khunlung yn bret sha madan, ïa ki kynthei kiba punkhun yn patar.”