HOSIA 12 - Khasi CL Bible (BSI)

¹ Kaei kaei baroh ba ki paid Israel ki leh naduh mynstep haduh da miet ka long ka bymmyntoi bad kaba pynjot. Ka jingshetkylla bad ki jingleh jubor ki nang jyllei hapdeng jong ki. Ki ïateh jutang bad ka Assyria, bad ki ïakhaïi bad ka Ijipt.”

² U Trai u don ka jingmudui ban wanlam pyrshah ïa ki paid Judah; un pynshitom ruh ïa ka Israel na ka bynta ka rukom leh ki briew jong ka. Un ainong ïa ki na ka bynta kaei ba ki la leh.

³ U kpa tymmen jong ki u Jakob u la ïaleh ïa u hynmen synrap jong u, u Iso, katba baroh ar ngut ki dang don hapoh ka kpoh ka kmie jong ki; haba u Jakob u la nang san, u ïaleh pyrshah ïa U Blei —

⁴ U ïaleh bad u angel bad u la jop. U la ïam bad pan ïa ka jingkyrkhu. Bad ha Bethel U Blei u la wan sha u kpa tymmen jong ngi u Jakob bad u la ïakren bad u.

⁵ Une u dei U Trai U Blei Badonbor Baroh — U Trai long ka kyrteng ha uba dei ban mane.

⁶ Kumta mynta, ko ki khun ki ksiew u Jakob, shaniah ha U Blei jong phi bad wan phai pat sha u. Long kiba ïaineh bad kiba lehhok, bad ap da kaba ïaishah ïa U Blei jong phi ban leh.

Shuh shuh ki kyntien bishar

⁷ U Trai u ong, “Ki paid Israel ki long bymhok kum ki nong Kanaan; ki sngewtynnat ban shukor ïa ki nongthied da ki tarajur bymhok.

⁸ ‘Ngi long kiba riewspah’ ki ong. ‘Ngi lah lum kyrhai ka spah. Bad ym don uwei ruh ban mudui ïa ngi ba ngi ïoh spah da ka lynti bymhok.’

⁹ Hynrei ma nga, U Trai U Blei jong phi uba la ïalam ïa phi na Ijipt, ngan pynlong ïa phi ban sah biang ha ki ïingjaiñ, kumba phi la leh mynba nga wan sha phi ha ka ri shyiap.

¹⁰ “Nga la kren ha ki nongïathuhlypa bad ai ha ki shibun ki jingïohipaw, bad lyngba ki nongïathuhlypa nga ai jingmaham ïa ki briew jong nga.

¹¹ La katta ruh ki dang mane ïa ki bleithaw ha Gilead, bad kito kiba mane ïa ki kin ïap. Ha Gilgal ki kñia ïa ki masi kyrtong, bad ki duwan hangta kin kylla long kum ki kynton maw ha ki pyntha bym don jingkah.”

¹² U Jakob u kpa tymmen jong ngi u la dei ban phet ïap sha Mesopotamia, ha kaba, ban ïoh ïa ka tnga, u trei na ka bynta ïa uwei u briew bad sumar ïa ki langbrot jong u.

¹³ U Trai u la phah ïa u nongïathuhlypa ban pyllait ïa ki paid Israel na ka jinglongmraw ha Ijipt bad ban sumar ïa ki.

¹⁴ Ki paid Israel ki la pynbitar kthang ïa U Trai; ki dei hok ban shah pynïap namar ki kam sniew jong ki. U Trai un pynshitom ïa ki na ka bynta ka jingpynjahburom kaba ki la wanlam ha u.