HOSIA 11 - Khasi CL Bible (BSI)

Ka jingieit U Blei ïa la ki briew kiba ïaleh pyrshah

¹ U Trai u ong, “Mynba u Israel u dang khynnah, nga la ieit ïa u, bad nga la khot noh ïa u na Ijipt kum u khun jong nga.

² Hynrei katba nga nang khot ïa u, katta u nang phet jngai na nga. Ki briew jong nga ki kñia ainguh sha u Baal, ki thang jingiwbih ha ki bleithaw.

³ Pynban dei ma nga uba hikai ïa ki Israel ban ïaid. Nga la rah ïa ki briew jong nga ha la ki ksang'ti, hynrei kim shym la pdiang ba nga la sumar ïa ki.

⁴ Nga la ring ïa ki sha nga da ka jingsngewieit bad ka jingieit. Nga la rah ïa ki bad pyndei ïa ki ha ka ngab jong nga. Nga la dem sha ki bad nga la bsa ïa ki.

⁵ “Ki kyntait ban wan phai sha nga, bad kumta ki dei ban leit phai sha Ijipt, bad ki nong Assyria kin synshar halor jong ki.

⁶ Ka thma kan khie ha ki nongbah jong ki, bad kan pynkheiñ ïa ki khyrdop ka nongbah. Kan pynjot ïa ki briew jong nga namar ki leh ïa kaei kaba ma ki hi ki pyrkhat ba ka long kaba bha tam.

⁷ Ki ïaleh ban phai lyndet na nga. Kin sa lynñiar namar ka lyngkor kaba ban ïa ki, hynrei yn ym don ban weng ïa ka na ki.

⁸ “Kumno nga lah ban ieh ïa phi, ko Israel? Kumno nga lah ban iehnoh ïa phi? Hato ngan pynjot junom ïa phi kumba nga leh ïa ka Admah, lane ngan leh ïa phi kumba nga leh ïa ka Seboiim? Ka dohnud jong nga kan ym shah ïa nga ban leh ïa kata! Ka jingieit jong nga ïa phi ka long khlaiñ haduh katta katta.

⁹ Ngan ym pynshitom ïa phi ha ka jingbitar jong nga; ngan ym pynjot shuh ïa ki Israel. Namar nga dei U Blei bad ym u briew. Ma nga, uta Uba Khuid ngan long bad phi. Ngan ym wan sha phi ha ka jingbitar.

¹⁰ “Ki briew jong nga kin sa wan bud ïa nga haba nga kyrhuh kum u sing ïa ki nongshun jong ki. Kin wan kyrkieh sha nga na sha sepngi.

¹¹ Kin wan na Ijipt, da kaba her stet kum ki sim, bad na Assyria, kum ki paro. Ngan wanlam pat ïa ki sha ki ïing jong ki. Ma nga, U Trai nga la kren.”

La pynrem ïa ki Israel bad Judah

¹² U Trai u ong, “Ki paid Israel ki la ker sawdong ïa nga da ki jinglamler bad jingshukor, bad ki paid Judah ki dang ïai ïaleh pyrshah ïa nga, U Blei baïaineh bad uba khuid.