HOSIA 10 - Khasi CL Bible (BSI)

¹ Ki paid Israel ki la long kum u dieng sohwaiñ uba dap da ki sohwaiñ. Katba ki nang manbha, katta ki nang tei kham bun ki duwan. Katba ka ri jong ki ka nang pahuh, katta ruh ki nang pynitynnat ïa ki rishot maw bakyntang ba ki mane.

² Ki briew kiba ki dohnud jong ki, ki long kiba shukor, mynta ki dei ban shahshitom namar ki pop jong ki. U Blei un pynpra ïa ki duwan jong ki, bad un pynjot ïa ki rishot kyntang jong ki.

³ Kine ki briew shen kin sa ong, “Ngim don syiem, namar ngim shym la sheptieng ïa U Trai. Hynrei kaei kaba u syiem un lah ban leh na ka bynta jong ngi?”

⁴ Ki kren ki ktien bym don jingmut bad pynlong ki jingkular lamler bad ki jingïateh kular bymlarkam. Ka hok ka kylla long bymhok, ka nang san kum ki ñiut ba long bih ha ka lyngkha ba la dep lur.

⁵ Ki briew kiba shong ha ka nongbah jong ka Samaria kin sheptieng bad ïam sngewsih namar ka jingduh noh ïa u masi ksiar ha Bethel. Ma ki bad kita ki lyngdoh kiba shakri ïa u bleithaw kin ïam sngewsih namar jong u. Kin sa ïam pangnud haba yn law lyngkhuit ïa ka jingthaba rong ksiar jong u.

⁶ Ïa uta u bleithaw yn kit noh sha Assyria kum ka jingnguh syiem ïa u patsha uba khraw. Ïa ka Israel yn pynjahburom bad yn pynlehrain namar ki jingai jingmut ba ka bud.

⁷ Ïa u syiem jong ka yn kit noh, kum ka thalab dieng halor um.

⁸ Ïa ki jaka mane blei ha kliar lum Aben, ha kiba ki paid Israel ki mane ïa ki bleithaw, yn pynjot noh. Ki shiah bad ki ñiut kin san ha ki duwan jong ki; ki briew kin sa pyrta ha ki lumbah, “To buhrieh ïa ngi!” bad ha ki lumrit, “To tap ïa ngi.”

U Trai u pynbna ïa ka jingbishar halor ki Israel

⁹ U Trai u ong, “Ki paid Israel kim shym la sangeh ban leh pop pyrshah ïa nga naduh ka por ba ki leh pop ha Gibeah. Kumta ha Gibeah ka thma kan lap ïa ki.

¹⁰ Ngan tur ïaleh ïa kine ki briew bymman bad ngan pynshitom ïa ki. Ki jaitbynriew kin ïalumlang pyrshah ïa ki, bad yn pynshitom ïa ki namar ki pop kiba bun ki jong ki.

¹¹ “Ka Israel ka la long shisien kum ka masi lud kaba la ïoh jinghikai bha, kaba la kloi bad mon ban shoh kew. Hynrei nga la rai ban buh ïa ka lyngkor ha ka ryndang ba-itynnat jong ka bad ban pyndait lyngkor ïa ka na ka bynta ka kam kaba kham eh. Ngan pynlong ïa u Judah ba un lur, bad u Israel un pynlwet khyndew.

¹² Nga la ong, ‘Lur ïa ka khyndew thymmai na ka bynta ïa lade, bet ïa ka jinglehhok, bad ot ïa ka jingkyrkhu ba ka jingmane ïa nga kan pynmih. Ka la dei ka por ïa phi ban phai sha nga, U Trai jong phi, bad ngan sa wan bad theh ki jingkyrkhu halor jong phi.’

¹³ Hynrei pynban phi la bet ïa kaba sniew bad ïoh ot ïa ka jingot jong ka. Phi la bam ïa ki soh ba la pynmih da ka jingshukor jong phi. “Namar ba phi shaniah ha ki kali thma jong phi bad ha ka jingbun paid ki shipai jong phi,

¹⁴ ka thma kan sa wan ha ki briew jong phi, bad ïa ki kut jong phi baroh yn pynjot. Kan long kum ka sngi ha kaba u syiem Shalman u la pynjot ïa ka nongbah Betharbel ha ka thma, ha kaba ïa ki kmie bad ki khun jong ki la pynlwet haduh ban da ïap.

¹⁵ Kata ka long kaei ka ban jia ha phi, ki briew ka Bethel, namar ka pop bashyrkhei kaba phi la leh. Mar ïasdang ka thma, u syiem Israel un ïap.”