HOSIA 1 - Khasi CL Bible (BSI)

¹ Kane ka long ka khubor ba U Trai u la ai ha u Hosia u khun jong u Beri, ha ki sngi mynba u Ussaïah, u Jotham, u Ahas, bad u Hesekaïah ki long ki syiem ha Judah, bad u Jeroboam u khun jong u Joash u long syiem ha Israel.

Ka tnga bad ki khun u Hosia

² Haba U Trai u la kren nyngkong eh ïa ki Israel lyngba u Hosia, U la ong ïa u Hosia, “Khie leit bad shongkurim, ka tnga jong me kan long ka bymïaineh, bad ki khun jong me kin long kum ma ka hi. Ha kajuh ka rukom, ki briew jong nga ki la ieh ïa nga bad ki la long ki bymïaineh.”

³ Kumta u Hosia u la shongkurim ïa ka briew kaba kyrteng ka Gomer, ka khun jong u Diblaim. Hadien ba la kha ïa u khun nyngkong jong ki,

⁴ U Trai u la ong ha u Hosia, “Pynkyrteng ïa u, u ‘Jesreel,’ namar kan ym slem shuh shuwa ba ngan pynshitom ïa u syiem ki Israel namar ki kam pynïap briew ba u kpa tymmen jong u, u Jehu u la leh ha Jesreel. Ngan pynkut noh ïa ka jingsynshar na ka longïing syiem jong u Jehu.

⁵ Bad ha kata ka por ha ka them Jesreel ngan pynjot noh thiaw ïa ka bor jong ka kynhun shipai ki Israel.”

⁶ Ka Gomer ka la kha ïa i khun ba ar — ha kane ka por da i kynthei. U Trai u la ong ha u Hosia, “Pynkyrteng ïa ka, ‘ka Lo-Ruhamah’ namar ngan ym pyn-i jingieit shuh ïa ki briew ka Israel, lane map ïa ki.

⁷ Hynrei ngan pyn-i jingieit ïa ki briew ka Judah. Ma nga U Trai U Blei jong ki ngan pyllait im ïa ki; hynrei ngan ym leh ïa kata da ka thma — da ki waitlam lane ki ryntieh, bad ki khnam lane ki kulai bad ki shipai shong kulai.”

⁸ Hadien ba ka Gomer ka la pyniehnoh buiñ ïa la ka khun, ka la punkhun biang bad ka kha sa uwei u khun;

⁹ U Trai u la ong ha u Hosia, “Pynkyrteng ïa u, ‘u Lo-ammi,’ namar ki briew ka Israel kim dei ki briew jong nga, bad ngam long U Blei jong ki.”

Ka jingpynbha pat ïa ki Israel

¹⁰ Ki briew ka Israel kin sa bun kum u shyiap ka duriaw, kin bun haduh bym lah shuh ban ñiew lane ban thew. Mynta U Blei u ong ïa ki, “Phim dei ki briew jong nga,” hynrei ka sngi kan poi ha kaba un ong ha ki, “Phi dei ki khun jong U Blei uba im.”

¹¹ Ki briew ka Judah bad ki briew ka Israel kin ïasoh lang kawei sa shisien. Kin sa jied tang uwei u nongïalam na ka bynta jong ki, bad sa shisien pat kin sa manbha bad roi kyrhai ha la ka ri. Ho-oid, ka sngi jong ka Jesreel kan long ka sngi kaba khraw!