HEBRU 9 - Khasi CL Bible (BSI)

Ka jingmane Blei ba kynja pyrthei bad ba kynja bneng

¹ Ka jutang kaba nyngkong ka la don ki rukom pynïaid ïa ka jingmane Blei bad kumjuh ruh ka jaka ba la shna da u briew ban mane.

² Ïa ka Ïingjaiñ la pynïeng, ka bynta kaba ha khmat, ïa kaba la khot ka Jaka Bakyntang. Ha ka la buh ïa u diengpynïeng sharak bad ka miej lem bad u kpu ïa uba la ainguh sha U Blei.

³ Ha lyndet ka jingkah kaba ar la don ka Ïingjaiñ ïa kaba la khot ka Jaka kaba Kyntang Tam.

⁴ Ha ka la buh ïa ka duwan ksiar na ka bynta ban thang ïa ki jingiwbih bad ïa ka Synduk ka Jutang ïa kaba la sop ksiar bad la don u khiew ksiar lem bad ka manna ha u, u diengduh jong u Aaron uba la mih sla, bad ki ar tylli ki mawlyngkniap ha kiba la thoh ïa ki hukum.

⁵ Haneng ka Synduk la don ki kherub kiba long ka dak ka jingdon ryngkat jong U Blei, bad ki thapniang jong ki, ki pyiar halor ka jaka ha kaba la ju map ïa ki pop. Hynrei mynta kam dei ka por ban batai bniah nadong shadong.

⁶ Kane ka long kumno la buh ryntih ïa kita kiei kiei. Ki lyngdoh ki rung shapoh ka bynta kaba ha khmat jong ka Ïingjaiñ man ka sngi ban pyndep ïa ki kamram jong ki,

⁷ hynrei tang u rangbah lyngdoh uba rung sha ka bynta kaba shapoh jong ka Ïingjaiñ, bad u leh kumta tang shisien shisnem. U rah bad u ïa ka snam ïa kaba u ainguh ha U Blei na ka bynta ïa lade bad na ka bynta ki pop ba ki briew ki leh khlem sngewthuh ba ki la leh pop.

⁸ U Mynsiem Bakhuid u pyn-i shai na kine ki rukom pynbeit, ba ïa ka lynti sha ka Jaka kaba Kyntang Tam ym pat lah ban plie, katba kata ka Ïingjaiñ kaba ha khmat ka dang ïeng.

⁹ Kane ka long ka dur kaba kdew sha ka por kaba mynta. Ka mut ba ka jingainguh bad ki jingkñia da ki mrad ïa kiba la ai sha U Blei kim lah satia ban pynjanai ïa ka dohnud jong uta uba mane,

¹⁰ namar ba ki ïadei tang bad ka jingbam, ka jingdih bad ki niam ki rukom pynkhuid babun jait. Kine baroh ki long ki aiñ kiba tang shabar, kiba ïadei tang haduh ka por ba U Blei un seng nongrim da kaei kaba thymmai.

¹¹ Hynrei U Khrist u la lah wan lypa kum U Rangbah Lyngdoh jong kiei kiei kiba bha kiba la don lypa hangne. Ka Ïingjaiñ ha kaba u shakri ka long kaba kham khraw bad kaba kham janai; kam dei ka ïingjaiñ kaba la shna da u briew, kata ka long, kam dei ka bynta jong kane ka pyrthei ïa kaba la thaw.

¹² Haba U Khrist u la ïaid lyngba kane ka ïingjaiñ bad rung tang shisien shapoh ka Jaka Bakyntang Tam, um shym la shim ïa ka snam ki blang bad ki masi kyrtong ban ainguh kum ka jingkñia; hynrei, u shim ïa la ka jong ka snam, bad pynïoh ïa ka jingim bymjukut na ka bynta jong ngi.

¹³ Ka snam jong ki blang bad ki masi kyrtong bad u dpei jong u masi lud la synreit halor ki briew ïa kiba la ñiew bymkhuid kat kum ka jinglehniam, bad kane ka pynkhuid ïa ki da kaba weng noh ïa ka jingbymkhuid katba kum ka jinglehniam.

¹⁴ Namar ba kane ka long kaba shisha, kaba katno tam lah ban pyndep da ka snam U Khrist! Lyngba U Mynsiem bymjukut u la aiti ïa lade kum ka jingkñia kaba janai ha U Blei. Ka snam jong u kan pynkhuid ïa ka jingïatiplem jong ngi na ki niam ki rukom ki bymmyntoi, khnang ba ngi lah ban shakri ïa U Blei uba im.

¹⁵ Namar kane ka daw, U Khrist u long uta uba buh ryntih ïa ka jutang kaba thymmai, khnang ba kito ïa kiba la khot da U Blei ki lah ban ïohpdiang ïa ki jingkyrkhu bymjukut kiba U Blei u la kular. Ïa kane lah ban leh namar ka don ka jingïap kaba pyllaitluid ïa ki briew na ki jingbakla kaba ki la leh katba ka jutang kaba nyngkong ka dang treikam.

¹⁶ Ha kaba ïadei bad ka jingai sngewbha da ka jingthoh, ka long kaba donkam ban pynshisha ba u briew uba ai ïa ka u la ïap,

¹⁷ naba ka jingai sngewbha da ka jingthoh kam don jingmut ei ei katba u briew uba ai ïa ka u dang im; ka treikam tang hadien ka jingïap jong u.

¹⁸ Kata ka long balei ba wat ka jutang kaba nyngkong ka treikam tang da kaba pyndonkam da ka snam.

¹⁹ Nyngkong, u Moses u la pynbna ha u paidlang ïa ki hukum baroh kat kum ba la buh ha ka hukum. Nangta u la shim ïa ka snam ki masi kyrtong bad ki blang, u la khleh ïa ka bad ka um, bad u la synreit ïa ka halor kata ka kitab ka hukum bad halor u paidbah baroh, da kaba pyndonkam ïa u tnat Hissop bad katto katne u 'saiwul uba saw.

²⁰ U la ong, “Kane ka long ka snam kaba la shonshab ïa ka jutang ba U Blei u la hukum ïa phi ban kohnguh.”

²¹ Ha kajuh ka rukom u Moses ruh u la synreit ïa ka snam halor kata ka Ïingjaiñ ka Jutang bad halor kiei kiei baroh ïa kiba la pyndonkam ha ka jingmane.

²² Da shisha, kat kum ka Hukum, la jan baroh kiei kiei la pynkhuid da ka snam, bad ïa ki pop la map noh tang lada la theh ïa ka snam.

Ka jingkñia U Khrist ka pyndam noh ïa ki pop

²³ Kito kiei kiei, ïa kiba la shim nuksa na kita kiba la sdang ha bneng, la dei ban pynkhuid ha kata ka rukom. Hynrei kita kiba kynja bneng hi ki donkam ïa ki jingkñia kiba kham bha shuh shuh.

²⁴ Namar U Khrist um shym la leit rung shapoh ka Jaka kaba Kyntang Tam ba la shna da u briew, kaba long tang ka jingpyrthuh bud ïa kata kaba shisha. U la rung shapoh ka bneng hi, ha kaba mynta u mihkhmat na ka bynta jong ngi ha ka jingdon ryngkat U Blei.

²⁵ U rangbah lyngdoh jong ki Jiw u leit rung shapoh ka Jaka kaba Kyntang Tam man ka snem ryngkat bad ka snam ki mrad. Hynrei U Khrist um shym la rung shapoh ban kñia ainguh ïa lade bunsien.

²⁶ Lymda kumta ka la dei ïa u ban shah bunsien naduh myn dang long ka pyrthei. Pynban, mynta haba ka por baroh ka la jan poi sha kaba kut, u la paw tang shisien hi, ban pyndam noh ïa ka pop da kaba kñia ïa lade.

²⁷ Uwei pa uwei u dei ban ïap tang shisien, bad hadien kata yn bishar da U Blei.

²⁸ Ha kajuh ka rukom, U Khrist ruh u la kñia ainguh tang shisien ban bah noh ïa ki pop jong kiba bun. Un sa paw ha ka sien kaba ar, ym ban weng noh ïa ka pop, hynrei ban pynim ïa kita kiba ap khmih lynti ïa u.